Бірлік барда ауыртпашылық қорқынышты емес – дейді Қазақстан халқы Ассамблеясының мүшелері
Бейсенбі, 29 наурыз 2012 7:58
Ақпанның ортасын ала басталған қарғын су Оңтүстік халқына үлкен әбігер әкелгендігі белгілі. Ең үлкен қиындық Арыстың етегінде отырған Ордабасы ауданының орталығы – Темірланда болды. Су тасқынынан 937 үй зардап шекті. Облыстық жұмылдыру даярлығы, азаматтық қорғаныс, апаттар мен дүлей зілзалалардың алдын алу және жоюды ұйымдастыру басқармасы бастығының орынбасары Көктембек Табылдиев осы үйлердің 661-і жарамды, 66-сы апатты жағдайда, 6-уы мүлде жарамайды дейді. Қарғын су іргетасынан асқан, қам кірпішіне су намы сіңген 121 үй де көмек қажет етеді.
Бейсенбі, 29 наурыз 2012 7:58
Ақпанның ортасын ала басталған қарғын су Оңтүстік халқына үлкен әбігер әкелгендігі белгілі. Ең үлкен қиындық Арыстың етегінде отырған Ордабасы ауданының орталығы – Темірланда болды. Су тасқынынан 937 үй зардап шекті. Облыстық жұмылдыру даярлығы, азаматтық қорғаныс, апаттар мен дүлей зілзалалардың алдын алу және жоюды ұйымдастыру басқармасы бастығының орынбасары Көктембек Табылдиев осы үйлердің 661-і жарамды, 66-сы апатты жағдайда, 6-уы мүлде жарамайды дейді. Қарғын су іргетасынан асқан, қам кірпішіне су намы сіңген 121 үй де көмек қажет етеді.
Бүгінде бұл үйлердің тұрғындары қауіпсіз жерлерге көшірілген. Өз өтеніне оралып, амалдап тұрып жатқандары да бар. Күн жылынғаннан кейін олар палаткаларға көшіріліп, жарамсыз үйлердің құрылысы басталады.
Оңтүстікте ауыр жағдай орын алғанда Елбасы Үкіметке шұғыл тапсырма беріп, Премьер-Министрдің бірінші орынбасары С.Ахметов облысқа арнайы келген. Топан су алған ауылдарды көріп, Шардара су қоймасы, Көксарай су реттегішіндегі қалыптасқан жағдайға қанығып, Елбасыға баяндаған. Нұрсұлтан Әбішұлы үй-жайы суға кетіп, көңілі жүдеген халыққа басу айтып, мемлекет тарапынан көмек болатындығын жеткізді. Шетелдерде әдетте барлық үйлер сақтандыру компаниялары арқылы сақтандырылады. Мемлекеттің апатты жағдайдағы міндеті – адам шығынына жол бермеу. Барлық күш осыған жұмылдырылады. Осыны ескерткен Елбасы барлық мәселені Үкіметтің мойнына артып қоюға болмайтындығын айтты. Әлемдік тәжірибеде бар үрдісті ешкім жоқ демейді.
Бірақ, қалай болғанда да, Үкімет те, қарапайым халық та апатқа ұшыраған жұрттың қатарға тез қосылуына қолдан келер көмектің барлық түрін жасап жатыр. Осыдан бірер апта бұрын облыстық кәсіподақ ұйымының төрағасы Д.Шерімқұлов пен “ОҚО Азаматтық альянс ассоциациясының” төрайымы К.Әліпованың мұрындық болуымен үндеу қабылданып, арнайы есеп-шот ашылған болатын. Оңтүстік жұрты қайырымды келеді. Су тасқынынан зардап шеккендерге керек жылы киім-кешектерді былай қойғанда, есеп-шот ашылған бір аптада түскен қаржы күніге 1 млн. теңгеге жуықтайды екен. Енді бұл әрекет республикалық қарқын алды. Оның бір жарқын дәлелі – Парламент депутаты Қуаныш Айтахановтың бастамасымен халық қалаулыларының бір күндік жалақыларын аударғаны.
Жақында Оңтүстікте “Қазақстандағы мемлекеттік этносаясатты жүзеге асыру және этноконфессиялық қатынастарды реттеу” тақырыбында аймақтық семинар-тренинг өткен. Конференцияға келген этномәдени бірлестіктердің мүшелері де Оңтүстіктегі қиын ахуалға өз үндерін қосып, азаматтық позициясын танытты. Олардың бірқатары апатқа байланысты құрылған қоғамдық қор мүшелерімен кездесуге келді. Облыстық кәсіподақ ұйымының мәжіліс залында өткен басқосуда облыс әкімінің орынбасары Әли Бектаев Ассамблея мүшелеріне қарғынға байланысты Үкімет және облыс әкімдігі тарапынан жасалынып жатқан жұмыстарды баяндап берді.
Қазақстан халқы Ассамбеясы төрағасының орынбасары Е.Тоғжанов: “Осындай қиын кездеріңізде жандарыңызға жалау, көңілдеріңізге демеу болайық деп арнайы келдік. Оңтүстіктегі қиыншылықтарды жеңетін бір күш бар, ол – бірлік. Біз сіздермен біргеміз”, дей келіп, Ассамблея атынан Оңтүстікте ашылған есеп-шотқа 10 млн. теңге аударатындықтарын айтты. “Ахыка” Қазақстан түріктері қоғамының төрағасы Зиядин Қасанов: “Тағы да көмегіміз болады, әзірге үлесіміз”, деп 1 млн. теңгені комиссия төрайымы К.Әліповаға қолма-қол табыстады. Қорға республикалық ұйғыр этномәдени бірлестігінің төрағасы Ахметжан Шардинов 7 млн. теңге, “Алматы” локомотив депосының бастығы Болат Мұсақожаев бір күндік жұмыс күні есебінен 5 млн. теңге аударуға уәде берді.
Жиын соңында облыс әкімінің орынбасары Әли Әбдікерімұлы қиналғанда қол созған ағайынға Оңтүстік халқы атынан алғыс айтты.
Бақтияр ТАЙЖАН.
ШЫМКЕНТ.