Аймақтар • 14 Ақпан, 2019

Медбике атқарар мерейлі міндет

256 реткөрсетілді

Адам өмірінде аяқ астынан орын алатын жүрек талмасы, қан қысымының көтерілуі немесе әртүрлі жарақаттар алу секілді жағдайлар болмай тұрмайды. Мұндай сәтте әр минуттың өзі адамның өмірін сақтап қалуға әсерін тигізуі мүмкін. Алғашқы медициналық-санитарлық көмектің жедел, тез берілуінің әрі қолжетімді болуының қажеттілігі де осында. Мұның өзі сала қызметкерлеріне үлкен жауапкершілік жүктейді. Бейнелеп айтқанда, олардың жұмысы ұстараның жүзінде тұрғандай қиын да күрделі. Бұған күнделікті тәжірибемізде де айқын көз жеткізіп жүрміз. 

Мемлекет басшысы Қазақстан халқына Жолдауында алғашқы медициналық-санитарлық көмек көр­сету қызметкерлерінің осындай тынымсыз еңбегін ескеріп әрі баға­лай келіп, тиісті ынталандыру шараларын белгілегені мәлім. Бұл осы салада қызмет етіп жүрген ден­сау­лық сақшыларының мерейін бір кө­те­ріп тастағаны анық. Қазіргі кезде тұрғын­дар­ға аталған көмекті көрсетуде мед­би­келердің рөлі жоғары. Өмір мен өлім айқасқан сәтте медициналық-сани­тар­лық көмектің сапалы әрі жедел болуы өте өзекті. 

Осы орайда Ақтөбе қаласындағы алғашқы жедел жәрдем ауру­ха­на­сы­ның бас медбикесі Жұмасұлу Қияқ­бае­ва былай дейді. 

− Тәні қиналған адамға шұғыл меди­циналық көмек беру – парызы­мыз. Бұл өзім секілді орта буын ме­ди­цина қызметкерлері үшін өте жауап­ты әрі көкейкесті мәселе деп біле­мін. Жолдауда айтылғандай учас­келік медицина қызметкерлерін ма­тер­иалдық тұрғыда ынталандыру, жалақыларын кезең-кезеңімен 20 пайызға көбейту – олардың өз қыз­ме­ті­не деген құлшынысы мен ынтасын көте­реді. Алғашқы медициналық-сани­тарлық көмек жүйесі денсаулық сақтау саласындағы ауыр да күрделі буын­дар­дың бірі. Сондықтан Мемлекет басшы­сының қолдауы бізге үлкен сенім сый­лады. 

Бүгінде ауруханаларда орта буын медицина қызметкерлерінің атқаратын жұмыс ауқымы арта түсті. Дәрігер тағайындаған нормалардың іске асуын жүйелі жолға қою және дәрігер кепілдемесінің толықтай орындалуын бақылау медбикелердің бірінші кезектегі міндеті болып қала бермек. 

Орта буын медицина қызмет­кер­ле­рінің саладағы ағарту-түсіндіру жұмыстарына араласа бастауы олардан кәсіби шеберлік пен біліктілікті, өзін-өзі ұдайы жетілдіру талаптарын күтеді. Сондықтан медбикелер тұрғындармен жүргізілетін жұмыс кезінде әркімнің өз денсаулығын күте білуі, аурудың алдын алу және саламатты өмір салтын сақтай білуге үндеу секілді мәселелерге тереңірек мән беруінің пайдасы зор болмақ. Сонымен бірге медбикелердің мамандығын көтеру мен жетілдіру жөніндегі шаралар алға қойған мақсаттарды орындап шығуға өз ықпалын тигізе алары анық.

Президент Жолдауында қойылған басты міндеттердің бірі − медицина мекемелерін цифрландыру. Ақтөбедегі жедел жәрдем ауруханасында бұл мәселе шешімін тауып үлгерген. Бұл жағымды жайт өз кезегінде жұмыс сапасының артуына көмегін тигізбек. Айталық, бұған дейін орта буын медицина қызметкерлері қызмет уақытының біраз бөлігін қағаздан үйілген құжаттар мен ауру тарихын жүйелеуге жұмсап келсе, цифр­ландыру енгізілгеннен кейін олар үнемделген уақытын пациенттердің жай-күйіне жан-жақты әрі тереңірек көңіл аударуға бөле бастады. 

Темір ҚҰСАЙЫН,

«Egemen Qazaqstan»

АҚТӨБЕ 

Соңғы жаңалықтар

ШҚО-да қар көшкіні жүрді

Аймақтар • Кеше

Ұқсас жаңалықтар