Бубновский әдістемесі омыртқа жарығы, артрит, артроз сынды буын және омыртқа ауруларын емдейтін заманауи кинезитерапияның түріне жатады. Бұл орталық Қазақстанда алғаш рет 2001 жылы Астана қаласында ашылып, 18 жылдан бері жұмыс істеп келеді.
«Әдістің негізгі авторы елордаға жиі келіп, науқастарға кеңес беріп тұрады. Семинар Ұлттық денсаулық сақтау орталығымен бірлесіп халыққа бұл әдіспен қалай емделетіні, осындай аурулармен ауырғанда не істеу қажет екендігі туралы ақпарат алу үшін жасалып отыр. Қазір әр орталыққа айына 200-ден астам адам келеді. Астанада 35 мыңнан астам науқас біздің орталыққа келіп, сырқаттарынан айығып кетті. Бұл емдеу әдісінің ерекшелігі науқастар өзі қимыл-қозғалысқа түсу арқылы емделеді. Емдеу Бубновскийдің арнайы жаттығулары арқылы жүргізіледі. Қазіргі кезде Астанада осы аурумен ауыратын науқастарды емдеуге арналған 5 орталығы бар», – деді Бубновский орталығының бас дәрігері Равиль Таирханұлы.
ТМД елдері мен алыс шетелдерде өзін көрсете білген әдістемені Михаил Бубновскийдің әкесі, ресейлік белгілі хирург, профессор, медицина ғылымдарының докторы, ағзаны сауықтыру жөніндегі көптеген кітаптың авторы Сергей Бубновский әзірлеген. Әдістемені қолданған жылдары 1,5 миллионнан астам адам қозғалу мүмкіндігіне ие болған.
«Денсаулық – қозғалыста» деген ұранмен жұмыс істейтін Бубновский орталығы және Қоғамдық денсаулық сақтау ұлттық орталығының миссиясы бірдей. Өйткені басымдық – емдеу емес, халыққа қалай ауырмау керектігін, аурудың алдын алу, денсаулықты қалпына келтіру шараларын үйрету, өз денсаулығын басқару.
«Қоғамдық денсаулық сақтау ұлттық орталығы Бубновский орталығымен бірлесіп осы семинарды ұйымдастырды. 350 адам қатысты. Оның ішінде науқастар, реабилитолог және невропатолог дәрігерлер бар. Кинезитерапия – ежелден белгілі емдеу әдісі. Өйткені баяғыда Грекияда, Римде осы емдеу түрін қолданған екен. Медицинаның атасы Гипократтың өзі осындай қимылмен, дене шынықтырумен емдеу тәсілін пайдаланған. Соңғы 30 жылдың ішінде бұл емдеу түрі С.Бубновскийдің бастамасымен қайта жаңғырды. Оның орталығы ТМД елдерінде ғана емес, дүние жүзінің басқа да елдерінде ашылды», – деді Қоғамдық денсаулық сақтау ұлттық орталығы директорының кеңесшісі Дәулетхан Серғазыұлы.
Денсаулық сақтау саласындағы әріптестік шеңберінде жеке меншік сектор мен халықтың мүдделі топтарының бірлескен күштерімен, ұйымның ешқайсысы жеке қамтамасыз ете алмайтын денсаулық көрсеткіштерін жақсартуға қол жеткізе алады. Осыған байланысты Қоғамдық денсаулық сақтау ұлттық орталығы құрылған сәттен бастап халықаралық және қоғамдық бірлестіктермен, денсаулық сақтау және білім беру ұйымдарымен ынтымақтастық туралы меморандумдар жасасты. ҚДСҰО халықтың өмір сүру сапасын жақсартуға бағытталған міндеттерді шешу аясында Бубновский орталығымен де өзара іс-қимыл жасауға ниетті.
«Егемен-ақпарат»
