Қазақстаннан үйренеріміз бар – дейді Қырғызстан халқы Ассамблеясы кеңесінің төрағасы
Сенбі, 12 мамыр 2012 8:05
Қазақстан Республикасының Президенті жанындағы Мемлекеттік басқару академиясының Этносаралық және конфессияаралық саланы зерттеу жөніндегі орталығында Қазақстан халқы Ассамблеясы атынан сайланған Парламент Мәжілісінің депутаттары, Ассамблеяның Ғылыми-сараптамалық кеңесі мүшелері, академияның магистранттары Қырғыз Республикасының Президенті Алмазбек Атамбаевтың елімізге ресми сапары аясында Астанаға келген делегациясының құрамындағы Қырғызстан халқы Ассамблеясы кеңесінің төрағасы, Қырғыз Республикасы Президентінің кеңесшісі Бектемір Мурзубраимовпен кездесті.
Сенбі, 12 мамыр 2012 8:05
Қазақстан Республикасының Президенті жанындағы Мемлекеттік басқару академиясының Этносаралық және конфессияаралық саланы зерттеу жөніндегі орталығында Қазақстан халқы Ассамблеясы атынан сайланған Парламент Мәжілісінің депутаттары, Ассамблеяның Ғылыми-сараптамалық кеңесі мүшелері, академияның магистранттары Қырғыз Республикасының Президенті Алмазбек Атамбаевтың елімізге ресми сапары аясында Астанаға келген делегациясының құрамындағы Қырғызстан халқы Ассамблеясы кеңесінің төрағасы, Қырғыз Республикасы Президентінің кеңесшісі Бектемір Мурзубраимовпен кездесті.
Кездесу Қырғызстан халқы Ассамблеясының бастамасымен бауырлас екі ел ассамблеялары арасындағы екіжақты қарым-қатынасты нығайту, Қазақстанның мәдениетаралық үнқатысу саласындағы жетістіктерімен, этносаралық толеранттылықтың қазақстандық үлгісімен және Қазақстан халқы Ассамблеясы қызметімен, оның Парламенттегі өкілдігімен, сондай-ақ, ҚХА-дан сайланған депутаттар жұмысымен кеңінен танысу мақсатында ұйымдастырылды.
Жиын барысында тараптар этносаралық толеранттылық пен қоғамдық келісімді бекіту бойынша гуманитарлық саладағы бірлескен әріптестікке, мемлекет, өңір тұрақтылығын қамтамасыз етуге қатысты бірқатар мәселені талқы таразысына салды.
«Мен бұл сапар аясында «АЛЖИР» мемориалды-мұражай кешенін араладым, онда болғаннан кейін көңіліміз түсіп кеткендей болды. Әрине, қаншама заман өтсе де, қаншама ұрпақ алмасса да, тарих ешқашан ұмытылмайды. Әсіресе, келешек буын үшін, жастар үшін тарихтың алатын орны үлкен. Бұл мұражай сонысымен құнды. Сондай-ақ, мен ҚХА Хатшылығында өткен кездесуге қатыстым. Кездесу барысында Хатшылық басшылығымен пікір алмасулар болды. Бұдан бір жыл бұрын, яғни 2011 жылдың 20 маусымында Қазақстан халқы Ассамблеясы мен Қырғызстан халқы Ассамблеясы арасындағы ынтымақтастық туралы меморандумға қол қойылған еді. Бұл меморандумға сәйкес, тараптар қос мемлекеттің достығын нығайту үшін әріптестік қарым-қатынастың қажеттілігін мойындай келе, гуманитарлық, мәдениет және мәдени мұра, өзара үнқатысу бағыттары бойынша тәжірибе алмасу әлеуетін пайдалана отырып, этносаралық және конфессияаралық қатынастар саласындағы бірлескен іс-шараларды іске асыруды келіскен болатын», деді Б. Мурзубраимов. Ол өз сөзінде бүгінде елдің Жогорку Кенешінде 120 депутат болса, оның 15-і түрлі этнос өкілдерінен тұратынына тоқталды. Оның айтуынша, өткен жылы ҚХА-ның Қырғызстанға сапары барысында этносаралық толеранттылықтың қазақстандық үлгісі кеңінен таныстырылған. «Біз қазақстандық үлгіні тұтастай көшіріп алуды көздемейміз. Алайда, бұл салада Қазақстаннан көп нәрсе үйренуге болатын секілді. Этносаралық және конфессияаралық татулықтың қазақстандық үлгісі дүниежүзілік ауқымда кеңінен танымал. Этносаралық мәселелермен айналысатын мұндай ұйымның баламасы әлемде жоқ десе де болады. Біз осы үлгіні өз елімізде қолдану үшін де басшылыққа алмақпыз. Мәселен, Қырғызстан халқы Ассамблеясы жанынан ғылыми-сараптамалық кеңес құру ойымызда бар. Ең бастысы, Орталық Азия өңірінде, Қазақстанда бейбітшілік, тұрақтылық, өзара түсіністік болғанын қалаймыз. Осы бағытта Қазақ елінен, оның тәжірибесінен үйренетін тұсымыз көп», деді Қырғызстан халқы Ассамблеясы кеңесінің төрағасы.
Қазіргі таңда екі ел арасында этносаралық ынтымақтастықты дамыту мәселелері бойынша тығыз байланыс орнатылған. Мәселен, биылғы жылдың наурыз айында ҚХА делегациясының Қырғыз Республикасына жасаған екі күндік жұмыс сапары, сапар аясында «Қазақстан мен Қырғызстанның этносаралық қатынастар саласындағы мемлекеттік саясаты» атты халықаралық семинардың ұйымдастырылуы осының дәлелі дер едік.
Астанаға сапары аясында Б.Мурзубраимов Ұлттық академиялық кітапханадағы ҚХА депозитарийін тамашалап, «Атамекен – Қазақстан картасы» этномәдени мұражай-кешенін аралады.
Ләйла ЕДІЛҚЫЗЫ,
«Егемен Қазақстан».