Аудан жайындағы деректерде Ертіс өзенін жағалай жайқалған мұндағы қарағайлар бес тізбек құрап өскендіктен ауданға Бесқарағай атауы берілгендігі айтылады. «Семей орманы» табиғи резерватына қарасты орманның 60 пайызының осы аудан аумағында орналасқаны белгілі. «Жүрген соң күнде көріп бауырында, таулардың биіктігі байқалмайды» дегендей, облысымызда Бесқарағай ауданының барлығын білгенімізбен бұл өңірдің ешкімге ұқсамайтын осындай өзгешеліктерге ие екендігін байқамаппыз. Дұрысы, мән бермеппіз. Осы жолы жұмыс сапарымен барғанда бұған көз жеткізіп, өзімізге жаңалық ашқандай болдық.
«Үсіген сәбіз» немесе бүршік теру процесі қалай жүреді?
Бесқарағай, Катонқарағай немесе Марқакөлге қарай бет алсаңыз, жолдың қос қапталынан немесе тау бөктерінен, жота беткейлерінен сұлу қарағайларды көрер едіңіз. Тіпті көзіңізді ала алмай, көлік терезесінен қайта-қайта қарай береріңіз анық. Асықпай жүрсеңіз, аз-кем аялдап, суретке түсетініңізге де күмәніміз жоқ. Алайда сол сіз тамсанып келе жатқан қарағайлардың кейбіріне 200, кейбіріне 100 жыл болғанын ойлап көрдіңіз бе? Сіз суретке түскен қарағайдың бір жылда қанша сантиметрге өсетінін тіпті де ойға алмағаныңызға бәс тігер едік. Хош, мәселе онда емес. Біз жұрт бір күнде өсіп шыққандай қызыға тамашалайтын қарағайлардың қалай, қандай еңбекпен өсірілетінін «Семей орманы» табиғи резерватына қарасты Канонерка филиалының тұқымбағының жұмысымен танысқанда білдік.
Тұқымбақтағы жұмыс күзде, нақтырақ айтсақ, қазан айында қарағайдың бүршігін жинаудан басталады екен. Бүршік дегеніміз – іші толған қарағайдың тұқымы. Бүршіктің қауашағындағы тұқым тиіннің де сүйікті асы. Терілген бүршік бір қарағанда үсіген сәбізге ұқсайды екен. Өзім қоймадан алғаш рет көріп, таңғалдым, бұған дейін бүршік деп ойлап жүргенім орман ішіндегі пісіп, шашылып қалғаны екен. Қысқасы, тұқымбақта қазан-қараша айларында бүршік теру жұмысы қарқын алып, желтоқсанда бүршікті кептіру процесі басталатын көрінеді. Үсіген сәбіз секілді бүршігіңіз жақсылап кептіргеннен кейін барып қана ашылады екен. Кептіру уақыты – 40 сағат. «50-60 градус ыстық температурада кептіреміз. Бүршік ашылғанда ішінен ұрық шығады. Биыл біз 11 тонна бүршік тердік. Әр филиалдың жоспары әртүрлі. Әуелі өзіміздікін, одан кейін басқа филиалдардан түскен бүршіктерді кептіреміз», дейді тұқымбақ бастығы Сырым Елемес.
Кептірілген бүршік әрі қарай сұрыптауға жіберіліп, сапалы тұқым іріктелгеннен кейін арнайы техника көмегімен кішкене ыдысқа (өздері кассета деп атайды) бір-бір дәннен жеке-жеке салынады екен. Салынғанға дейінгі топыраққа су құю, тыңайтқыш қосу деген процестері өз алдына бөлек әңгіме. Кассетаға салынған тұқым одан кейін үш жылыжайға (әрқайсысына 550 мың данадан) жіберіліп, бұл жерде наурыз айынан мамыр айына дейін күтімге алынып, мамырда қар еріп, күн жылынғанда даладағы шынықтыру алаңына шығарылады. Иә, дене шынықтыру пәні деген секілді кішкене қарағайлар да «денесін» шынықтырады.
«Шынықтыру алаңы не үшін керек? Кішкене қылтанақ қарағайларды күнге, суыққа шынықтыру, бойларын үйрету үшін қажет. Үш жылыжай босағаннан кейін тағы да қарағай көшеттерін әкелеміз. Шынықтыру алаңында көшеттер күзге дейін тұрады. Сенесіз бе, сенбейсіз бе, осы уақыт ішінде, яғни алты ай мөлшерінде қарағай бар болғаны 7-15 сантиметрге өседі. Қарағайды отырғызу, бекітілген жоспарға сәйкес жан-жаққа тарату жұмыстары күзде басталады. Қарағайды көктемде де егіп жатады. Өзім күзде отырғызғанды қолай көремін. Өйткені қыс бойы жауған қар көктемде еріп, су тамырларға барады. Көктемде ексе, маусым, шілдеде күн ыстық болса, жас көшеттер солып қалуы мүмкін», дейді табиғат жанашыры.
Көшеттерді шапшаң өсіру – швед технологиясы
Қарағайды күзде отырғызу, көшеттерді осылай күтіп-баптау швед технологиясы көрінеді. Қазір жарты жылда өсіп шығатын 15 сантиметрлік қарағай бұрын табиғи жағдайда, далада екі жыл бойы өсірілген екен. Тұқымбақта әуелі жылыжайда, сосын шынықтыру алаңында өсірілген қарағай көшеттерін сақтайтын тоңазытқышы бар үлкен қойма жұмыс істейді. Сырым Мұратұлы бізді сондай қойманың біріне кіргізіп, Елбасының тікелей бастамасымен құрылған, бүгінде жайқалған орманға айналған Астана маңындағы жасыл белдеуге көктем туа жіберілетін 50 мың дана қарағай көшеттерін көрсетті. Тұқымбақ қызметкерлері елорда іргесіндегі орман алқабына бұған дейін де 50-100 мың данадан кішкене қарағай көшеттерін бірнеше мәрте жіберген екен. Орман алқабы дегеннен шығады, Мемлекет басшысы Астанада өткен Жастар жылының ашылу салтанатында: «Ел Тəуелсіздігінің 30 жылдығына қарай «Жасыл ел» қозғалысының базасында «Жасыл қала – жасыл ауыл» жалпыұлттық жобасын іске қосу қажет. 20 жылда Астананың айналасында қолмен отырғызылған орман пайда болды. Бұл – 80 мың гектар жасыл екпелер, соның нəтижесінде қаланың іші экологиялық жағынан тазара түсті. Астананың үлгісі бойынша бүкіл өңірдегі елді мекендердің жасыл экожүйесін дамыту қажет» деген еді. «Біздің облыстағы аудандардың барлығы Бесқарағай, Катонқарағай, Марқакөл секілді ағашқа бай емес. Егер Абай, Тарбағатай, Аягөз аудандары ағаш отырғызу жағынан көмек сұраса, жәрдемдесуге дайынсыздар ма?» деп сұрадық тұқымбақ басшысынан. Жоғарыда аталған аудандарда, ондағы ауылдарда орман алқаптарының сирек екендігі жергілікті жұртқа белгілі. «Бесқарағайдың қарағайы бұл аудандарды жерсіне қоя ма екен?! Әуелі жерді зерттеу керек. Біз тек қарағай көшеттерін өсірумен шұғылданамыз. Ағаш егумен айналысатын арнайы мекемелер бар. Солардың көмегіне жүгіну керек шығар», деді С.Елемес.
Қарағай қанша жыл өмір сүреді?
Бесқарағай ауданындағы бұл тұқымбақ жыл сайын 3 миллион дана қарағай көшеттерін өсіріп, шығарады екен. Өсірілген көшеттер өртенген жерлерге, кәрі ағаштардың орнына, еліміздегі орман шаруашылығы филиалдарына жіберілетін көрінеді. Сырым Мұратұлының айтуынша, қазіргі таңда «Семей орманы» резерватына 135 мың гектарға, Канонерка филиалына қарасты тұқымбаққа 1 мың гектар жерге ағаш отырғызу қажет.
2016 жылы БҰҰ бағдарламасы аясында ашылған тұқымбақта бүгінде 35 адам қысы-жазы тұрақты түрде еңбек етеді. Ал жаз кезінде 50-ге жуық кісіні уақытша жұмысқа алады. Алайда, Орталық Азиядағы жалғыз тұқымбақ қызметкерлерін толғандырған мәселелер де жоқ емес. «Біздегі бір мәселе – жалақының аздығы. Жазда күн ыстықта еңбектеп, шөп жұлып, күтіп-баптау оңай ма? Қызметкерлердің алатын жалақысы 40 пен 60 мыңның аралығында. Олардың жалақыларын 100 мың теңгеден асырса жақсы болар еді», дейді тұқымбақ басшысы.
Сырт көзге сұлу көрінгенімен қарағайдың өте баяу өсетінін елдің бірі білсе, бірі білмеуі мүмкін. Жай ағаштар жылына 1-1 жарым, тіпті 2 метрге дейін өссе, қарағай суы мол, жері құнарлы болғанның өзінде әрі кетсе 50 сантиметр қосады. «Неге баяу өседі дейсіз бе? Табиғат солай жаратқан. Нағыз жетілді, өсті, пісті деген қарағайға жоқ дегенде 80 жыл керек. Мына біз өсіріп жатқан кішкене қарағайларды біз де, біздің баламыз да көрмейді. 80-90 жылдан кейін ғана 20 метрден асады. Ең биік қарағай – 30 метрге, қалыңдығы 1 метрге дейін барады. Кейбір қарағайлар 200 жыл өмір сүреді. Бесқарағайдың реликті қарағайлы орманы еліміздің ешбір аймақтарына ұқсамайды. Мұндай орман әлемде тек Канадада ғана бар. Осы құндылығымызды, осы байлығымызды көздің қарашығындай сақтауымыз керек», дейді табиғат жанашыры.
Азамат ҚАСЫМ,
«Egemen Qazaqstan»
Шығыс Қазақстан облысы,
Бесқарағай ауданы