Әлемде жылына 36 миллионнан астам адам инфекциялық емес аурулардан көз жұмады екен. Бұл өлімнің 63 пайызын құрайды. Ал Қазақстанда қайтыс болатындардың 80 пайызы қатерлі ісік, ас қорыту, тыныс алу және жүрек-қантамыр жүйесі ауруына шалдыққандар көрінеді. Бұл деректер Астанада дұрыс және қауіпсіз тамақтану мәдениетін қалыптастыру мәселелері талқыланған дөңгелек үстелде айтылды.
Жиында сөз алған Қоғамдық денсаулық сақтау ұлттық орталығының директоры Уәлихан Ахметов экономикалық ынтымақтастық және даму ұйымы елдерінің әлемдік тәжірибеде мойындалған Дүниежүзілік денсаулық сақтау ұйымының дұрыс тамақтану мәселелері жөніндегі ұсыныстарына, Қазақстандағы ағымдағы жағдайға және дұрыс тамақтану саясатын қамтамасыз ету бойынша міндеттерге жан-жақты тоқталды.
ДДСҰ-ның инфекциялық емес аурулардың алдын алу және оған қарсы күрес жөніндегі Еуропалық кеңсесінің басшысы, тамақтану, дене белсенділігі және семіздік жөніндегі бағдарламаның менеджері Жоао Бреда ДДСҰ-ның, ұлттық институттар мен қоғамдық денсаулық сақтау саласындағы қауымдастықтардың өзара іс-қимылы туралы айтып берді. Шетелдік маман тұздың мөлшерін айқындап, тұтыну қаптамасындағы таңбалауға тамақ өнімдерінің ерекше белгілерін енгізуді ұсынып отыр. Бұл елімізде дұрыс және қауіпсіз тамақтану мәдениетін қалыптастыруға мүмкіндік бермек. «Біріншіден, тұздың мөлшерін күніне 5 грамға дейін азайту керек. 5 грамм дегеніңіз жарты қасыққа жетер-жетпес. Үйде тұзды мүмкіндігінше пайдаланбаған абзал. Екіншіден, жеміс-жидектер мен көкөністерді жиі тұтыну қажет. Яғни, күні бойы жеміс-жидектер мен көкөністерден тұратын 5 түрлі тағам жеу өте маңызды. Үшіншіден, қантты аз тұтыну, газдалған және тәтті сусындар өндірісіне қантты аз қосу», дейді ол.
Қоғамдық денсаулық сақтау ұлттық орталығы ДДСҰ Еуропалық кеңсесі бірлесіп өткізген дөңгелек үстелге қатысушылар, сонымен қатар тамақ өнімдеріне және ауыз суға, тиімді және дұрыс тамақтанбауға байланысты аурулардың таралу деңгейін төмендету, тамақтану, тамақ өнімдерінің қауіпсіздігі саласында және қоғамдық денсаулық сақтау саласында ғылыми зерттеулер жүргізу сияқты мәселелерді талқылады.
Майгүл СҰЛТАН,
«Egemen Qazaqstan»
