Аймақтар • 06 Наурыз, 2019

Жұмысқа ұлттық киіммен келетін ұжым

1038 реткөрсетілді

Жүз бірінші көктемін қарсы алған «Жетісу» газетінің редакциясы ұлттық мән-мағынасы зор бастама көтерді. Бұдан былай газет ұжымы жұмысқа ұлттық киіммен келетін болады. Мыңдаған жылдың жұмбағын жасырған қазақы ою-өрнек енді ұлттық мүдде біріктірген газет қызметкерлерінің үстінде жарқырамақ. Сондай-ақ жаңа бастама белгілі бір уақыт аясында шектеліп қалмайды.

Байырғы басылымның тілшілері бұл үрдісті Алғыс айту күнінен бастады. Ұлыстың ұлы күніне дайындықты осыдан бастаған ұжымын алдымен «Жетісу» газетінің бас редакторы Әміре Әрін құттықтап, нөмірден-нөмірге дейін деп өмір сүретін, үнемі қауырт жүретін әріптестеріне ақжарма тілегін жеткізді. 

– Бұл бастаманың мақсаты сырт киім үлгісімен ғана қазақ екені­мізді айғақтау емес, сонымен бірге, ұлтқа деген шексіз құрмет, өзге­лерге өнеге көрсетуді өзімізден бас­тап, нақты іспен көрсету десек те бо­лады. Алатаудың ар жағындағы қырғыз ағайынның Парламентте ақ қалпақпен, өзбек бауыр­лардың ала шапанмен жүретінін, тәжіктердің мектеп формасына дейін ұлттық киімге негізделгенін ескерсек, Ұлы дала перзенттері неге төл құндылығын мақтан тұтпасқа?! Бұдан тыс, біздің қызметкерлеріміз Жетісу жұртшылығы алдында кем­бағал жандарға қайырымдылық көр­сету үшін бірнеше концерттік бағдар­ламалар ұсынып, талай жанның жү­ре­гін жібітті. Марқұм Есенқұл Жақып­беков оқуларын елімізде алғаш ұйымдастырды. Тоғызқұмалақ, ат жарысы, хандойбы секілді ұлттық спорт түрлерінің бұқаралық сипат алуына тікелей қатысып, бастамашы атанды. Жа­ңа бастама Ұлыстың ұлы күнін 22 наурыз күні түске дейін киіз үй аралап, көже ішумен аяқтайтын көзбояу көрініске тосқауыл болмақ. Ғасыр толған қасиетті шаңырақтың бастамасы әрі қарай да ұлттық нақышта жалғасын таба береді, – дейді Әміре Әрін.

Көңілге де көктем сыйлаған газет журналистерінің бұл бастамасы ең алдымен Ұлыстың ұлы күні – Наурызға деген ерекше құрметті білдіреді. Қа­шанда халық пен билік арасына алтын көпір орнатып, ақпараттардың ақ-қарасын ажыратып, жұртшылыққа жіліктеп жеткізетін абыз басылымның бас­тамасы басқа да әріптестерге ой салып, әрі қарай жандана түседі деген сенімдеміз.

Айнаш ЕСАЛИ,

«Egemen Qazaqstan» 

Алматы облысы

Соңғы жаңалықтар

Ұқсас жаңалықтар