Кездесуді ашқан Мемлекет басшысы жиынға қатысушыларды және еліміздің бүкіл әйелдер қауымын
8 наурыз – Халықаралық әйелдер күні-мен құттықтады.
Қазақстан Президенті көп балалы аналарға қолдау көрсетуге арналған жаңа ауқымды әлеуметтік шараларды жүзеге асырудың маңыздылығын айтып, бұл көмектің көлемі біртіндеп арта беретінін атап өтті.
– Негізінен, бұл қолдау шаралары табысы төмен көп балалы отбасылар үшін әлеуметтік көмекті күшейтуге бағытталатын болады. Әлеуметтік төлемдер мен жәрдемақылар көлемі артып, бюджет саласындағы жалақысы төмен қызметкерлердің еңбекақысы өседі, тұрғын үйлер салынады. Сондай-ақ «Бақытты отбасы», «Құтты мекен» және «Ауыл – ел бесігі» жобалары жүйелі қолдау көрсетуге бағытталған, – деді Елбасы.
Нұрсұлтан Назарбаев келешек ұрпақты тәрбиелеу ісінде әйелдердің айрықша рөл атқаратынын айтты.
– Әлемдегі ең маңызды нәрсе әйелдің қолынан келеді. Ол адамға өмір сыйлайды. Орта есеппен, бір отбасында үш бала тәрбиеленіп отыр десек, бір жылда шамамен 400 мың сәби өмірге келеді. Бала – бір отбасының байлығы мен мақтанышы ғана емес, тұтас елдің баға жетпес капиталы. Сондықтан біздің аналарымыз, әсіресе көп балалы аналар, ерекше құрмет пен алғысқа лайық. Олар халқымыздың игілігін еселеп, нағыз ерлік көрсетіп отыр, – деді Мемлекет басшысы.
Елбасы қазақстандықтардың әл-ауқаты мен отбасылық өмірдің құндылықтары мемлекеттің берік негізі саналатынын атап өтті.
– Қарқыны күшті әрі жаңашылдыққа толы заманда сіздер ел игілігі үшін өз әлеуеттеріңіз бен қабілеттеріңізді табысты жүзеге асырып келесіздер. Түрлі салалар мен бағыттарда жаңа белестерді бағындырып, маңызды нәтижелерге қол жеткізіп отырсыздар. Менің жаңғыру жөніндегі идеяларымды іске асырудың бастауында әйелдер қауымы тұр, – деді Қазақстан Президенті.
Нұрсұлтан Назарбаев әйелдердің ел өміріне белсенді атсалысып отырғанын атап өтті.
– Бүгінде білім беру және денсаулық сақтау саласындағы әйелдердің үлесі 70 пайызға жетсе, қаржы және сақтандыру мекемелерінде 60 пайызды құрайды, ал ауыл шаруашылығында – 45 пайыз. Бизнесте, шығармашылық саласы мен спорт әлемінде зор табысқа қол жеткізген әйелдер аз емес. Бізге, яғни ерлер қауымына, сіздерден қалып қоймау үшін ойланатын кез келді, – деді Мемлекет басшысы.
Мемлекет басшысының қабылдауына жасанып, ерекше көңіл күймен келген қонақтар арасынан Премьер-Министрдің орынбасары, Президент жанындағы Әйелдер істері және отбасылық-демографиялық саясат жөніндегі ұлттық комиссия төрағасы Гүлшара Әбдіқалықова сөз бастады.
– Тәуелсіздігіміздің 27 жылы ішінде әйелдерге үлкен мүмкіндіктер жасалды, жаңа ұрпақ қалыптасты. Осы уақыт аралығында көптеген салаларда озық жетістікке жеткен әйелдер аз емес. Ал әйелдер Сіздің халықтың әл-ауқатына байланысты жүргізіп отырған мемлекеттік саясатыңызды қолдайды, – деді Г.Әбдіқалықова.
Ал «Астана-Зеленстрой» АҚ бригада жетекшісі Наталья Ермолина елорданы гүлдендіру, көріктендіру ісіне 20 жылдан аса белсенді үлес қосып келе жатқан маман ретінде Астананың құлпыра түскендігі үшін Елбасына алғысын білдірді.
Бұдан соң сөз алған Алматы облысы Алакөл аудандық Аналар кеңесінің төрағасы Ұлжалғас Дүйсебаева 45 жыл ұстаздық еткен мерейлі жан. Ол еліміздің жетістіктеріне көңілі толатындығын айта келе, Мемлекет басшысына Алакөл ауданының деңгейінде табысты жүргізіп отырған жоба туралы да айтып берді.
– Тәуелсіздік жылдары өзінің болашағына сенген талай жас отау құрды. Оның ішінде өмірдің ыстық-суығына шыдай алмай, ажырасып кеткендер де аз болған жоқ. Бұл мәселе мені, 45 жыл ұстаз болған, бүгінде 4 бала, 5 немере тәрбиелеп отырған ана ретінде, әже ретінде, қатты алаңдатады. Сондықтан біздер – Алматы облыстық Аналар кеңесі «Ақ отауға – ақ бата» жобасын қолға алдық. Алакөл ауданынан бастау алған бұл жобаның мақсаты – жастарды ата-баба дәстүрімен, аға ұрпақ өнегесімен тәрбиелей отырып, отауының босағасының берік болуына жол сілтеу. Бүгінде осы жоба аясында бас қосқан 42 отбасы тату-тәтті өмір сүруде, ал 70 отбасына ақыл-кеңесімізді айтып табыстырып, оларды ажырасудан сақтап қалдық, – деген Ұлжалғас Дүйсебаева ішкі қуанышын жасыра алмады.
Бұл мәліметтер, яғни ақ жаулықты аналардың жас отбасылардың берік болуына қосып жүрген үлесі Мемлекет басшысының да көңілінен шықты.
– Барлық өңірлер осы жобаны қолдаса ғой... Ажырасу үшін сотқа бет алған жастарды шақырып алып, ақыл-кеңестерін берсе құба-құп. Кейбіреулер үй-жайы болмағаннан кейін, кейбіреуі бөлек тұруды аңсап уақытша қиындықтарға төзбейді. Әрбір ана өз ұлы мен қызын келіні мен күйеу баласынан артық көрудің, қызғанудың кесірі де тиіп жатады. Осындайда, ақ жаулықты аналар жастарды түсіністікке шақыруы керек, – деп Мемлекет басшысы оң пейілін білдірді.
Өз кезегінде «ДАНА» жеке білім беру мектебінің бас директоры Күләнда Батырбекова Алматы облысының аумағында бірнеше балабақша мен мектеп салғандығын, халықты жұмыспен қамтуда белсене жұмыс істеп жатқанын баяндады. Осы орайда ол кәсіпкерлікті қолдап, мемлекет-жекешелік әріптестігінің дамуына серпін берген Мемлекет басшысының әлеуметтік саладағы ұстанған саясатына ризашылығын білдірді.
Ал Елбасымен кездесуге келген Қазақстан полициясының өкілі Айжан Әбішеваның тағдыры мүлдем ерек. Оның жары полиция лейтенанты Ришад Әбішев осыдан сегіз жыл бұрын өз үйінің алдында әйел адамды белгісіз қарақшылардан қорғап қалмақ болған сәтінде, ауыр жараланып, соның салдарынан көз жұмған. Бұл жанқиярлық ерлігі үшін Р.Әбішев «Айбын» орденімен марапатталған. Кейін Алматы қалалық полиция басшылығы оның зайыбына пәтер беріп, қызметке шақырған.
– Мен Отанға қызмет ететін адамдардың еңбегі бағаланатындығына сенімдімін. Біздің қызметкерлер күні-түні ел тыныштығын күзетуге жұмылдырылған. Бүгінгінің батырлары өз арамызда жүр, – дей келе полиция капитаны А.Әбішева өз сөзін Мемлекет басшысына ризашылық білдірумен түйіндеді.
Жуырда ғана Жастар жылының ашылуында Мемлекет басшысының алдында «Сен менен алыстама» деген өлеңін оқып берген ақын қыз Мақпал Мыса арада екі ай өткенде Мемлекет басшысынан шақырту алып, тағы бір жүздесуге мүмкіндік алған.
– Сіздің «Рухани жаңғыру», «Ұлы даланың жеті қыры» атты мақалаларыңызда айтылған ойлар тарихтың жаңа беттерін ашып, көркем туындылардың тууына ықпал етіп жатыр. Сол үшін де Сізге барша қаламгерлердің атынан ризашылығымды білдіргім келеді, – деген ақын қыз бұл жолы Президенттің сұрауы бойынша туған жеріне арнаған жыр шумақтарынан шашу шашты.
Кездесу барысында Қостанай облысы Мичурин ауылдық округінің әкімі Вера Клочко ауылдық елді мекен тұрғындарын жұмыспен қамту, жаңа жұмыс орындарын ашу, кәсіпкерлікті қолдау, жастарға көмек көрсетудегі жетістіктерін сөз етті.
Ал «Атыраумұнаймаш» кәсіпорнында 12 жылдай уақыттан бері краншы болып жұмыс істейтін Айжан Асмағамбетова өзге замандастарына қарағанда, Елбасы алдындағы толқуын жасыра алмады. Кәдімгі жұмысшы мамандығының иесі көк тіреген кранды шебер басқарғандай сөзге де жүйріктігін көрсетті.
Бұдан соң сөз алған Қызылорда облыстық онкологиялық орталығының бөлімше меңгерушісі, онколог-дәрігер Виктория Юн қызметке тұрғалы он жылдың ішінде бес мемлекетте білімін жетілдіріп, қолы алтын маманға айналған.
– Менің маман болып жетілуіме туған елім – Қазақстаным көп мүмкіндік жасады. Медицина саласында әйелдер қауымының үлесі басым. Солардың атынан Сізге медицина саласына ерекше ықыласыңыз үшін алғысымызды білдіреміз. Елімізде өмір сүру ұзақтығының көрсеткіші жыл сайын артып келеді. Бұл біреулер үшін әншейін цифр болғанымен, мен маман ретінде бұл көрсеткішті тұтас денсаулық сақтау саласының, дәрігерлердің еңбегінің көрінісі деп білемін. Бірақ әр адамның денінің саулығы өзіне байланысты. Осы орайда көпшілік Сізден үлгі алуы тиіс, – деді В.Юн.
«Назарбаев Университет» ДББҰ Ғылым және технологиялар мектебінің ассистент-профессоры Анар Сандығұлова – «Болашақ» бағдарламасы бойынша Ирландияда оқып, әлемдік деңгейдегі білім нәрімен сусындаған маман. Қазіргі қызметінде аутизмге шалдыққан балаларға роботтехникасының әсерін зерттеуде. Осы орайда А.Сандығұлова жастардың білім алуына барынша жағдай жасап отырған Елбасына ерекше ризашылығын білдірді.
Ал «Qazaq-Oner» қолөнершілер орталығының басшысы Айгүл Жансерікова қолдан басқан киізден бұйым жасау арқылы ұлттық қолөнерімізді насихаттап, еліміздің атын асқақтатып жүргендігін асқан қуанышпен баяндады. Ол намысқа тырысып, мақсатына жеткенше тыным таппайтын жандардың бірі ретінде Алматыда үлкен орталық ашуға қол жеткізген. Ал Елбасының «Ұлы даланың жеті қыры» атты мақаласы кәсіпкер келіншекті қанаттандыра түскен. Бүгінде А.Жансерікова басқаратын кәсіпорында жасалған кәдесыйлар алыс-жақын шетелдердегі көрмелерге қойылуда.
Ішкі сезімін аса мақтанышпен жеткізген кәсіпкер кәдімгі алқызыл алманың киізден жасалған, көздің жауын алатындай пішіндерін Мемлекет басшысына тарту етті.
Кездесуде сөз алған шығысқазақстандық ұстаз Нұржамал Садықова білім саласындағы жетістіктерін, батысқазақстандық «Нұр» шаруа қожалығының басшысы Светлана Маутеева мен қостанайлық «Кішкентай» әлеуметтік ателье» жобасының жетекшісі Айгүл Мұстафина кәсіпкерлік саласындағы табыстарын мемлекеттің, Елбасының ұстанған саясатымен байланыстыра отырып баяндады. Әсіресе сал ауруы, аутизм дертіне шалдыққан балаларға арналған киім тігу жобасын жолға қойған А.Мұстафинаның әлеуметтік жаңашылдық іспетті кәсібін Мемлекет басшысы жоғары бағалады.
Ал бүгінде аты жаһанға жайылған актриса Самал Еслямова Мемлекет басшысына алдағы жоспарларын айтып берді.
Канн кинофестивалінде «Үздік әйел рөлі» номинациясы бойынша жеңімпаз атанған жерлесіміз атағы жер жарып тұрғанымен, өзіндік қарапайымдылығы мен ұяңдығын сақтап қалғандығын қазақы ілтипатымен тағы бір дәлелдеді.
– Құрметті Нұрсұлтан Әбішұлы, мен үшін бүгін үлкен мәртебелі, есте қалар күн. Мен әлемнің қай мемлекетінде жүрсем де Қазақстанға әрқашан үлкен қуанышпен, үлкен бақытпен ораламын. Елді сағынамын, елдің аспанын сағынамын. Осы аспанымыздың ашық, елімізде бейбітшіліктің салтанат құруы Сіздің еңбегіңіздің арқасы деп білемін, – деді актриса.
Осы орайда Елбасы: «Самал Еслямова еліміздің атын әлемге танытты. Оған қоса, мигранттардың аянышты тағдырына әлем назарын аударды. Құдайға шүкір, тәуелсіздігіміздің 27 жылында отандастарымыз шет жерде жалшы болған жоқ», – деп шүкіршілігін жеткізді.
Ал Ақтөбедегі «Life4job» ЖШС директоры Айнұр Бақтығалиева жуырда «Нұр Отан» партиясы Саяси Кеңесінің құрамына кіргендігін, Мемлекеттің оңтайлы саясаты арқылы шетелде білім алғанын айта келе, қазір төрт саланы қамтитын отбасылық кәсіпті жүргізіп отырғанын жеткізді.
– Мемлекет өз кәсібін ашқысы келген жандардың қолын қаққан емес. Қазірдің өзінде бизнесті автоматтандыруға байланысты да ауқымды көмек көрсетілуде. «Даму» қоры арқылы субсидия төленіп, жеңілдетілген несиелер беріліп жатыр. Сондықтан да білім алып, кәсібін ашқысы келген жастардың алдында ешқандай кедергі жоқ, – деді А.Бақтығалиева.
Ал Мемлекеттік күзет қызметі Президенттік оркестрінің жетекші солисі Клара Төленбаева сөз алған сәтте әншінің қоңыр дауысына кездесуге қатысушылар ерекше назар аударды.
Ол: «Бірлігі жарасқан ұжымда қаншама шығармашылық жобамды іске асырдым. Үш балапаным Астанада дүниеге келіп, өсіп-өніп жатырмыз», деген жезтаңдай әнші Мемлекет басшысына өнер саласына ерекше қолдауы үшін алғысын айта отырып, барша арулардың құрметіне тамылжыта ән шырқап берді.
Кездесу соңында Қазақстан Президенті еліміздің әйелдер қауымы өміріміздің айнасы екенін әрі халқымыздың мінез-құлқын айшықтайтынын айтты.
– Біздің міндетіміз – сіздер үшін жасампаз бастамаларыңыздың толық жүзеге асуына жағдай жасау, – деді Елбасы.
Нұрсұлтан Назарбаев үстел басындағы жиыннан соң 36 жасында жеті бала сүйіп отырған Алтынай Сәрсенбаеваға – «Алтын алқа», ал алты баланың анасы Мәншүк Мәмбетоваға «Күміс алқа» тақты. Осы орайда «Атым Мәншүк болған соң, батыр атанбай қоймаймын деп өз-өзіме серт бергенмін. Сол мақсатыма жеттім» деп ағынан жарылған «Күміс алқа» иегері жиналғандарды ду күлдірді.
Салтанатты жиыннан соң елден ерек арулар Мемлекет басшысының қолынан сыйлық алып, естелік суретке түсті.
Серік ӘБДІБЕК,
«Egemen Qazaqstan»
