Әрідегі тарихына ой көзімен үңіліп, сөз сабақтайтын болсақ, медаль 1854-1856 жылдары Қырым соғысы кезінде мейірбикелердің отрядын бастаушы ағылшын санитарының атын иеленген екен. Әлемнің әр түкпірінде осындай медальмен 1408 мейірбике марапатталыпты. Оның бесеуі Қазақстаннан. Нақтырақ айтатұғын болсақ, Антонина Дмитриева, Рәзия Ысқақова, Анна Дмитриенко, Мария Смирнова және Вера Широкая. Кейін арада көп жыл өткен соң осы колледждің түлегі, Санкт-Петербург қаласындағы наркология ауруханасының бас мейірбикесі Любовь Клокова Ф.Найтингейл атындағы медальмен марапатталған. Осы бір мейірбикеге көрсетілген құрметтен кейін ержүрек адамдардың ерлікті бейбіт күнде де жасайтындығын аңғаруға болады.
Жоғары колледж директоры Қарақат Қадырбаева қоғамдық мұражай 1990 жылы «халықтық» атағына ие болғандығын мақтанышпен айтады. Мұражайдың арнайы төсбелгісі бар екен. Төсбелгі өз ісінің хас шеберлеріне, таңдаулы мейірбикелерге табысталып, есімдері мұражайдың Құрмет кітабына енгізіледі.
Мұражай кеңесі «Мейірбандық» еріктілер қозғалысы бойынша арнайы бағдарлама әзірлеген. Негізгі мақсаты – облыстағы денсаулық сақтау ұйымдарымен әріптестік қарым-қатынас орнатып, науқастар мен мүгедектерге көмек көрсету.
Колледж бастамашылдығымен іргедегі облыстық аурухана аумағының көрнекті жеріне «Мейірбикелер аллеясы» ұйымдастырылған. Аллеядағы соғыс жылдарындағы және бейбіт өмірдегі медицина қызметкерлерінің ерлігі мен қажырлы еңбегін бейнелейтін стелла салтанатты шаралар жиі өткізетін ұлағатты орынға айналған.
Байқал БАЙӘДІЛ,
«Egemen Qazaqstan»
Ақмола облысы
