Кеңестің кезекті отырысы өтті
Сәрсенбі, 25 сәуір 2012 7:22
Кеше Пекинде Шанхай ынтымақтастық ұйымына мүше мемлекеттер Қорғаныс министрлері кеңесінің кезекті отырысы болды, оған Қазақстан Республикасының Қорғаныс министрі Әділбек Жақсыбеков қатысты, деп хабарлады ҚР Қорғаныс министрлігінің баспасөз қызметі.
ШЫҰ-ға мүше мемлекеттердің қорғаныс ведомстволарының басшылары ашық және достық жағдайда көптеген мәселелерді қарастырды, 2011 жылы Астана қаласында қабылданған ШЫҰ қорғаныс министрлерінің 2012-2013 жылдарға арналған ынтымақтастық жоспарының жүзеге асырылуында прогрестің бар екендігі атап өтілді.
Сәрсенбі, 25 сәуір 2012 7:22
Кеше Пекинде Шанхай ынтымақтастық ұйымына мүше мемлекеттер Қорғаныс министрлері кеңесінің кезекті отырысы болды, оған Қазақстан Республикасының Қорғаныс министрі Әділбек Жақсыбеков қатысты, деп хабарлады ҚР Қорғаныс министрлігінің баспасөз қызметі.
ШЫҰ-ға мүше мемлекеттердің қорғаныс ведомстволарының басшылары ашық және достық жағдайда көптеген мәселелерді қарастырды, 2011 жылы Астана қаласында қабылданған ШЫҰ қорғаныс министрлерінің 2012-2013 жылдарға арналған ынтымақтастық жоспарының жүзеге асырылуында прогрестің бар екендігі атап өтілді.
Қорғаныс министрлері аймақтағы мемлекеттер үшін маңызы бар қауіпсіздікті қамтамасыз ету, Ұйым аумағында бейбітшілік пен тұрақтылықты сақтау мәселелеріне баса назар аударды. ШЫҰ-ның келешекте рөлін арттыру мақсатында сындарлы идеялар айтылып, халықты жаппай қырып-жоятын қаруларды таратпау, терроризм, сепаратизм және экстремизммен күреске халықаралық тұрғыда күш салу сөз болды.
Өз сөзінде Әділбек Жақсыбеков Қазақстан ШЫҰ шеңберіндегі ынтымақтастыққа көп көңіл бөлетіндігін, сондай-ақ Ұйымның болашағы зор екендігін, ал біздің еліміз әскери саладағы бағыттар бойынша өзара іс-қимылды дамытуға ниетті екендігін атап өтті.
Кеңестің қорытындысы бойынша бірлескен коммюнике қабылданды, сондай-ақ Тәжікстанда 8-14 маусым аралығында өтетін «Бейбіт миссия-2012» бірлескен жаттығуының мәні бекітілді.
Сол күні Әділбек Жақсыбеков өз әріптесі, ҚХР Қорғаныс министрі, генерал-полковник Лян Гуанлемен кездесті. Кездесуде екі ел қорғаныс ведомстволарының екі жақты, көп жақты пішіндегі өзара қарым-қатынастары талқыланды.
Кеңес шеңберінде ШЫҰ-ға мүше мемлекеттер қорғаныс ведомстволарының басшыларын Қытай Халық Республикасы Төрағасының орынбасары Си Цзиньпин қабылдады. Қорғаныс министрлері атынан Әділбек Жақсыбеков сөз сөйледі. Қазақстан қорғаныс ведомствосының басшысы Қытай жағының қонақжайлығына алғысын білдірді және Қазақстан Республикасының Президенті Нұрсұлтан Назарбаевтың «ШЫҰ-ның құрылуы мәдени, тіл және сауда-саттық жағынан тарихи байланысы бар, бейбіт дамуға, тату көршілік пен ынтымақтастыққа талпынған халықтардың заңды көрінісі болды. ШЫҰ мемлекетаралық байланыстағы біздің аймақтың болашақтағы сипаты мен келбетін анықтайтын жаңа мәдениетті бейнелейді», деген сөзімен қорытындылады.