Ол – Мемлекеттік орталық музейдің сол иығын ала жайғасқан даңқты композитор Нұрғиса Тілендиевтің ескерткіші. Енді бұл құбылыстың астарында қандай тылсым күш, нендей сиқырлы сыр бар деңізші?! Әрине, ең алдымен композитордың әйгілі «Құстар әні» санаңызға жылт еткізіп сәулесін шаша қояды. Содан, «бұл өзі құстар әлемін айрықша сазды әнімен әлдилеген композитордың шығармашылық зор еңбегінің қайтарымы-ау» деген дүрия көңілмен жымиып, ой құшасыз. Шынайы үйлесімдік жүрегіңізді шым еткізеді. Құдірет-ай!.. Көкірегіңді «Құстар, құстар сызылтып ән салады, Сол әнімен тербетеді даланы...» деп басталатын Тілендиев әні кернейді.
Қараңызшы... әнеу бір «көктемді қанатына қондырған» көк кептер, ұлы дарынның сұқ саусағының ұшын ғана әдейі көздегендей болып, қалықтай келіп қонды. Бейне дәл осы сәт саңлақ сазгердің оң қолындағы дирижер таяқшасы да баяу тербеліп, нота-құстарды үркітіп алмайын дегендей асқан ептілікпен сермеліп бара жатқандай... Салтанатты көріністі сырттай бақылап тұрудың өзі бір ғанибет!
Қас-қағым сәтті қалт жібермей таспаға іліп түсірген қазақ фотожурналистикасының маэстро-майталманы, сезімтал шебері – Нұрманбет аға Қизатұлы.
Жыл-он екі ай осылай! Көгершін құстардың композитор ескерткішін айналып ұшып, аймалап қонып, дамыл таппай жүргені... Ғажап!
Талғат СҮЙІНБАЙ,
«Egemen Qazaqstan»
АЛМАТЫ
