Көрменің ашылу салтанатына Түркияның Қазақстандағы Төтенше және өкілетті елшісі Невзат Уянык, дипломатиялық корпус өкілдері, Парламент депутаттары мен зиялы қауым қатысты.
Жас суретші 15 жасынан бастап Астана қаласындағы «Балалар сурет мектебі. ЮНЕСКО клубы» атты мектепте қосымша сурет өнерін оқып, академиялық білім алған. Қазіргі таңда түрік мәдени орталығында түрік тілін үйренуші, Қазақ ұлттық өнер университеті «Сценография» факультетінің 5-курс студенті. Назерке Кемелбаева өзінің алғашқы сурет көрмесін Түркия еліне арнап отыр. Көрмеге суретшінің түрік елінің мәдени тыныс-тіршілігі мен рухани құндылықтарын айшықтайтын 40-тан аса жұмысы қойылды. Шығармалардың арасында Түркияның түрлі қалаларында орналасқан ескі мәдени мекендер – «Мевлана кесенесі/ Конья», «Акдамар шіркеуі/Ван», «Ысқақ-Паша сарайы/ Аары» мен ежелгі қалалардың «Понт патшаларының мазарлары/Амасья», «Румели Хисар бекінісі/Ыстанбұл», «Ежелгі Эфес қаласы/ Измир» суреттері де бар.
– Түркияның сұлулығын бір ғана суретпен жеткізу мүмкін емес. Сондықтан да бүгінгі көрмеге қойылған туындыларым арқылы осынау ғаламат өлкенің бар ғажабын жан-жақты қырынан ашуға, көрсетуге тырыстым. Мен үшін Түркия – талабыма шабыт сыйлаған таңғажайып мекен. Әсіресе тарихи мекендері мен айналасын қоршап жатқан асау теңіздерінің толқыны жан дүниемді айрықша сезімге бөледі. Содан шабыт алдым. Әрине жеке шығармашылығыма арналған алғашқы көрмем болғаннан кейін қатты толқып тұрмын. Жастарға үлкен мүмкіндік сыйлап, шабытына шабыт үстейтін осындай жобалар мен бағдарламалардың көп болуын тілеймін. Бұл біз секілді жас шығармашылық иелерінің өзіне деген сенімін арттырып, тың серпіліс сыйлайды. Осы тұрғыда мені қолдап, мүмкіндігіме сенген барша ұстаздарым мен аталмыш көрмені ұйымдастырушыларға алғысымды білдіремін», – дейді көрме авторы.
Көрмеде куә болғанымыздай, суретшінің жұмысында Түркияның тарихи мекендерінен бөлек, теңіз тақырыбы кеңінен қамтылыпты. Сонымен қатар түрік халқының тұрмыстық тыныс-тіршілігі, салт-дәстүрі мен өнері де жан-жақты әрі түрлі ракурста сөйлейді. Жас суретшінің қолтаңбасынан жастық романтика мен нәзік лириканың иірімдерін аңғару қиын емес. Өзіндік стилі мен көркем көре білу эстетикасы сәтті қабысқан қылқалам иесі болашағынан зор үміт күттіреді.
Назерке ЖҰМАБАЙ,
«Egemen Qazaqstan
