19 Наурыз, 2019

Қиындықтан санавиация құтқарады

771 реткөрсетілді

Астанадағы «Қазақстан инжиниринг» зауытында құрас­тырылған француздық Eurocopter компаниясының «ЕС-145» маркалы тікұшағын Қостанайдағы санавиация пайдалана бастады.

Үш айдың ішінде онымен бірнеше рет ауыр жағдайдағы науқастар алыс аудандардан облыстық ауруханаға жеткізілді. Мысалы, таяуда ғана Денисов аудандық ауруханасында жат­қан науқасты тікұшақпен көзді ашып-жұмғанша облыстық ауру­ханаға әкеліп, емін жалғас­тырды. Осыған дейін бүйрек жетім­сіздігі салдарынан өлім­мен арпалысқан науқастың кө­зінде жарық дүниеге деген үміт оты жылтырады. Дә­рігер-реа­ни­матолог Ирина Шап­ко 30 жыл­дан астам уақыттан бері бұл са­ла­­ның қызметін бес сау­сақтай біледі.

– Тікұшақ – санавиация қыз­меті үшін өте қолайлы көлік. Мен отыз жылдан бері ұшақпен де, тікұшақпен де ұшып жүрмін. Біз науқасқа тезірек жетуіміз ке­рек, ерте жеткен сайын оның өмірін сақтап қалуға да үміт көп. Мұндайда тікұшақ тез ұшады әрі ұшақ секілді қо­ну алаңын іздеп жатпай­ды, аурухананың ауласына қо­на салады. Ал жаңадан пай­далана бастаған «ЕС-145» тік­ұшағының іші медицинаның, санавиацияның талаптарына сәйкес жабдықталған. Өте қолайлы, ішінде науқас жататын орын, 2 сағатқа жететін оттегі баллоны, жасанды демал­дыру құралы бар. Сонымен қа­тар ұшаққа қарағанда, бұл тік­ұшақ­тың іші жылы. Мен аудандарға үш рет ұшып шық­тым, барлығында ауа ра­йының құбылмалығына, желдің күштілігіне қарамастан науқасты сәтті алып келдік, – дейді Ирина Шапко.

Жылдың қай мезгілінде де нау­қастарды шалғай аудандар мен қалалардан облыс орталығына жеткізу қиын мәселе. Екі араның шалғайлығы мен жолдың на­шар­лығы қандай қолайлы машина болғанымен, ауыр халдегі адам­ды алып жүруге мүмкіндік бермейді. Мұндайда бар үміт санитарлық авиацияға артылады. Өткен жылы облыста шалғай аудандардағы науқастарға бару үшін 52 рет әуе кемелері пайдаланылыпты, бірақ соның 18-інде ғана тікұшақ ұшқан. 

«ЕС-145» тікұшақтың көп мақсатты моделі болғандықтан, елімізде оны үш бағытта пайдаланады. Табиғат апаттарынан, басқа да оқиғалардан төтенше жағдайлар қалыптасқан кезде адамдарды құтқару үшін тік­ұшақтың ептілігі сыннан өткен. Денсаулық сақтау сала­сында алыс елді мекендерден нау­қас­тарды орталық ауруханаларға жеткізу үшін санавиация пайдаланып отыр. Үшіншіден, жер­­гілікті әкімдіктер арнайы сұ­раныс беріп, мамандар егін­нің көгін қарағанда, көктемгі су тас­­қыны кезінде қардың қалың­ды­­ғын бақылағанда, тағы басқа қа­­жеттілік кезінде тікұшаққа мінеді. 

– Денсаулық сақтау саласы үшін тікұшақтың ыңғайлылығы бірден білінеді. Ұшақ арнайы қону алаңы болмаса аудандарға бара алмайды. Ал тікұшақ ауру­ха­на ауласына да қона береді. Ен­ді алдағы уақытта барлық аудан­дар мен қалаларды аралап, ауруханалардың дәл алдынан тікұшақ қонатын алаңдар салуды талап ететін боламыз. Оған ұзындығы 25 метр, ені 15 метр алаңқай болса жетіп жатыр, тек айналасындағы ағаш­тарды қырқып, кедергі бол­май­тындай етсе жарайды, – дейді «Қазәуеқұтқару» ком­пан­ия­сының өкілі Азамат Мол­дағалиев. 

Облыста санавиацияның тік­­­ұшақты пайдалануына кесе көлдене тұратын проблемалық мәселе де жоқ емес. «ЕС-145» әлем­дегі ең қауіпсіз тікұшақ са­нал­ғанымен, оның жанар-жағар май багының көлемі аз. Қостанайдан сонау Торғай­ға барып келгенше оған тағы да май құюға тура ке­леді. Ал облыс өңірінде Қос­та­­най мен Арқалықтан басқа жерде тікұшаққа май құятын нүкте­лер жоқ. Торғайдағы баяғы әуежайдың орны да қалған жоқ. 

– Алдағы уақытта облыс өңі­рінде бірнеше май құю нүк­телерін жасауды қолға алмай болмайды. Ол үшін жанар-жа­ғар май цистернамен апарып қойыла ма, қай аудандарда болуы тиіс деген мәселелер ше­шімін табады деп ойлаймын, – дейді Азамат Рамазанұлы. 

Ең басты құндылық – адам өмірі. Сондықтан ажалмен арпалысатын санавиация жұ­мы­сы­ның сәтті, нәтижелі болуына қызмет ететін тікұшақтың ке­дер­гісіз ұшуы алдағы уақытта жол­ға қойылатын болады. 

Нәзира ЖӘРІМБЕТ,

«Egemen Qazaqstan»

ҚОСТАНАЙ

Соңғы жаңалықтар

Жақсылық жүрек жылытады

Қазақстан • Кеше

Ұқсас жаңалықтар