Медицина • 20 Наурыз, 2019

Кемеңгерлік пен парасат биігіндегі тұлға

689 реткөрсетілді

М.О.Әуезов атындағы Әдебиет және  өнер институтының директоры, филология ғылымдарының докторы,  Қазақстанның еңбек сіңірген қайраткері, Алматы қалалық мәслихатының депутаты Кенжехан Матыжанов Елбасының қабылдаған шешіміне қатысты пікір білдірді. 

Нұрсұлтан Назарбаев шын мәніндегі Елбасы деген ардақты атқа лайық кемеңгер саясаткер екенін тағы да бір дәлелдеді. 

Отыз жылға жуық мемлекет басында болып, қаншама қиын-қыстау жағдайлардан шашасына шаң жұқтырмай шыға білген, Қазақстанды тәуелсіздік тұғы­рына «мәңгілікке» қон­дырып, әлемдік өркениет көші­нің алдыңғы легіне қосқан тарлан тұлға бұл жолы да парасат биігінен таныла білді. Бұл – әлемдік өркениеттің озық үлгісі. Осы тарихи шешім арқы­лы ол өзінің адамзаттық құн­ды­лықтарға, әлемдік демо­кратия­лық үрдіске, ұлттық мүддеге адал әлемдік деңгейдегі тұлға екендігін дәлелдеді. 

Нұрсұлтан Назарбаев басшылығы кезінде еліміздің білім, мәдениет, ұлттық рухының қаншалықты түлеп өскендігін тарата айтсақ, талай томға жүк болар еді. Тәуелсіздік дәуірінде әлемдік білім нәрінен сусындаған, еркін, тәуелсіз, мүлде жаңа ұрпақ дү­ниеге келді. Он жыл бойына қазақ әдебиеті мен өнерін, тарихын түгендеген «Мәдени мұра» бағдарламасы бойынша ұлан-ғайыр шаруалар атқарыл­ды. Осы уақыт аралығында Қазақстан археологиясының өркендегені сондай, республика көлемінде бес «Алтын адам» табылған екен. Ал қаншама мәдени ескерткіштер қалпына келтіріліп, сандаған музейлер есіктерін айқара ашты! Астана қаласындағы әлемдік сәулет өнерінің үлгісіндегі мәдени ошақтар қазақ өнерінің шал­қарын кеңейтіп тұр. «Болашаққа бағдар: рухани жаңғыру» атты бағдарламалық мақаладан бас­тау алған қазақ әліпбиін латын негізіне көшіру, әлемдегі ең озық жүз оқулықты қазақ тілінде сөйлету, қазақтың киелі жерлері, туған жерге тағзым, Қазақстанның 100 жаңа тұлғасы сияқты қоғамдық сананы жаңа белеске көтеретін қаншама келелі істер қолға алынды. Осы игілікті істің заңды жалғасы болған «Ұлы даланың жеті қыры» атты мақаласының өзінде қаншама терең ойлар мен келешегі кемел шаруалар жатыр. Бір ғана «Дала фольклоры­ның антологиясы» мен «Ұлы даланың көне сарындары» жинағын заманауи технология­мен жарыққа шығарудың өзі әдебиет пен өнер мамандарына үлкен жауапкершілік жүктеп отыр. Осының өзі-ақ Елбасының жас ұрпаққа әлпештеп, аялап ұстайтын құнарлы асыл мұра қалдырғанының айғағы. Ол өз еңбектері арқылы біз қастерлеп айтатын «Мәңгілік ел», «Ұлы дала елі», «Қазақ елі»  сияқты қасиетті ұғымдарды санамызға сіңіре білді. Сол арқылы ұлттың рухын көтеріп, кемел келешекке деген сенімін ұялатты.

Демек, Нұрсұлтан Назарбаев еңбек­терінде тереңнен тартып, келешекке қарай алтын арқау болып тартылған ұлттық сананың ұзақ өркендеу жолы жатыр. Қазақстанның тарихын түген­деп, бүгінін бекемдеп, ер­теңі­не бағдар түзе білген тұл­ғаға құрмет көрсету биік мәде­ниет белгісі болу керек. Елба­сы сондай құрметке лайық екен­дігін тағы бір танытып отыр.

 

Баннер
Соңғы жаңалықтар

Ұқсас жаңалықтар