Үлкеннің көрінбегені бірден көзге түседі
Жұма, 14 қыркүйек 2012 7:39
Қытайда ғана емес, ел төрағасының орынбасары, алда сол төрағалыққа тағайындалатыны ресми түрде айқын болған Си Цзиньпиннің біраздан бері көпшілік алдына шықпағаны бүкіл әлемде түрлі-түрлі әңгімелерге арқау болып отыр.
Жұма, 14 қыркүйек 2012 7:39
Қытайда ғана емес, ел төрағасының орынбасары, алда сол төрағалыққа тағайындалатыны ресми түрде айқын болған Си Цзиньпиннің біраздан бері көпшілік алдына шықпағаны бүкіл әлемде түрлі-түрлі әңгімелерге арқау болып отыр.
Қай елде болмасын бірінші басшының сайлануы – айрықша оқиға. Ал әлемдегі жетекші елдердің басшысы кім болатыны сол әлемге ортақ оқиғадай. Өйткені, әлемдік үлкен саясат сол елдерге, оның басшыларына тікелей байланысты. Содан да сол жетекші елдер басшыларының сайлануы барша жұрттың назарына ілінеді.
Әрине, жұрт Қытай басшылығына кімнің сайланатынына да назар аударады. Бірақ бұл елде бірінші басшының сайлануы өзгешерек. Оны билеуші партияның басшылығы айқындайды. Ал мұнда кездейсоқ адамның келуі әсте де мүмкін емес. Ол жылдар бойы сынақта жүреді. Бұған дейін осылай болған. Уақыты жеткенде бірінші басшы ауыстырылады. Сол бірінші басшының тікелей қатысымен оның орнын басатын адам күні бұрын таңдалады және сайланады.
Билікке қазіргі ел басшысы Ху Цзиньтао да солай келген. Оның орнын басатын Си Цзиньпиннің таңдалғанына да біраз болды. Алдымен ол төрағаның орынбасары және басқа да тиісті лауазымдарға сайланды. Енді оның ең жоғарғы партиялық органда, партия съезінде партияның Бас хатшысы қызметіне сайлануы және ҚХР төрағалығына бекітілуі қалып отыр. Си Цзиньпиннің бұл қызметке бекитіні ел ішінде ғана емес, бүкіл әлемде мойындалып қойған. Тіпті басқа елдердің басшылығы өздерінің ресми қарым-қатынасын басқалармен емес, қазір Си Цзиньпинмен жүргізгенді қалайды.
Міне, сол адам жұрт көзіне түспей жүр. Егер төтенше себебі болмаса, ол мүмкін емес жай. Ел басшылығы бұл адамның көрінбей кеткені жұрт назарын аударып, түрлі әңгіме туғызатынын жақсы біледі. Сондықтан да оған жол бермейді. Соған қарамай, бұл адамның біраздан бері «жоғалып кетуі» шындық. Және бұған байланысты түрлі-түрлі қауесет айтылады. Оны біраз адам автомобиль апатына ұшырапты дейді, қатты сырқат екен деген де сөз бар. Ресми орындар үнсіз. Апатқа ұшырауы, аурулығы туралы қауесет айтылуы өз алдына, саясатшылар оны билікке қатыстыра да әңгіме етеді – партия басшылығында ішкі күрес бар екен дейді, Си Цзиньпиннің сайлануына күмән келтіріледі.
Қалыптасқан тәртіп бойынша ел басшысын сайлайтын Компартия съезі алдағы қазан айында өтуге тиіс. Бұл жиын жайында әлі хабар жоқтығы жұртты таңдандырады. Қалай дегенде де, түсініксіз жай бар.
Сөйтсе де, Си Цзиньпин туралы азын-аулақ мағлұмат бере кеткен жөн болар. Ол партиялық шенеуніктің отбасында дүниеге келген. Әкесі Си Чжуньсюн провинция губернаторы, ел үкіметі басшысының орынбасары болған. Өзі барлық партиялық басшылық буынынан өтіп, ең жоғары биікке кінәратсыз жеткен. Жасы – 59-да. Дәстүрлі басшылық мерзімін өтеуге толық сай келеді. Күні ертең ұлы Қытай елінде билік тізгінін ұстайтынына ешқандай күмән жоқ еді. Ал енді сондай биікке көтерілген адамның біраз уақыт көрінбей қалғаны қалай? Біраз жұрт онымен бірге тағы бір партия басшылығының адамы – Хэ Гуцзянның көрінбей кеткенінен көбірек қауіп қылады.
Мамадияр ЖАҚЫП, «Егемен Қазақстан».
