Елдің әлеуметтік-экономикалық өркендеуін, халқының баянды бақытын ойлаған Нұрсұлтан Әбішұлының кемел саясатының арқасында бүгінгідей жетістікке қол жеткіздік. Бұл орайда атқарған еңбегі орасан. Сенім биігінен көрінген тұлғаның билік басындағы басшыларға дұрыс жол көрсетуі – әбден құптарлық іс. Көпті көрген адам ретінде оның таңдауына ешқандай күмән болмауы тиіс екенін баса айтқым келеді. Көреген басшы, сұңғыла саясаткер, қарымды қайраткерге еліміздің әр азаматының құрметі ешқашан ортаймайды. Дамыған отыз елдің қатарына қосылу үшін оның бастамасымен елімізде қолға алынған бағдарламалар, стратегиялық жоспарлар сәтті жүзеге асып келеді. Оған үлес қосу – бәріміздің міндетіміз.
Парламент отырысында Қазақстан Президенті Қасым-Жомарт Тоқаевтың Астана қаласының атауын Нұр-Сұлтан деп өзгерту туралы ұсынысын солтүстікқазақстандықтар да бірауыздан қолдады. Кезінде астананы Арқаның төсіне ауыстыру тосын оқиғадай әсер еткені бәріміздің есімізде. Көбіміз мемлекет ауқымынан тыс, ойға сыймайтындай ұсыныс ретінде қабылдағанымыз рас. Қазір қарап отырсам, астананы көшіру процесі тұтас дәуірлік эпопея іспеттес. Жаңа елорданың жылнамасын, тарихи шежіресін Елбасы ұғымынан бөле-жару мүмкін емес. Аз ғана уақыттың ішінде сәулет өнерінің жауһар туындысына айналып,үздік үлгідегі рухани, мәдени шаһарлармен теңесті. Ерке Есілдің жағасында бой көтерген әсем астанамызға Елбасы есімінің берілуі заңдылық дер едім. Бұдан былай облыс орталығындағы ең ұзын көшелердің бірі де Елбасы есімімен аталады.
Халқымыздың басты байлығы – тәуелсіздігі. Ата-бабаларымыз ғасырлар бойы армандап келген егемендікке қол жеткізген Нұрсұлтан Әбішұлын қалай ұлықтасақ та жарасады. Соның бірегейі – елорда енді Нұр-Сұлтан деп аталғанына бек қуаныштымыз.
Ескендір ЕЛЕУСІЗОВ,
облыстық Ардагерлер кеңесінің төрағасы
Солтүстік Қазақстан облысы
