Шығарманы оқи отырып тұтас бір шаңырақ құлап түскендей әсерде қаласың. Казино, қыз-қырқынның қызығымен кеткен отағасы Аян «есіл-дерті ақша, әкесінен де асқан бай боламын деп жанталасып жүрген ұлы, шетелді шарлап қыдырудан шаршамайтын қызы, арбаға таңылған мылқау немересі – бәрінің орны кенеттен бадырая айқындалып, төңіректі билеп төстеген мағынасыздықты Ғаділбегі емделіп жатқан аурухана жаққа қайғыдан есеңгірей теңселе басқан Науаттың бейнесі одан әрмен қатайтқандай. Ар азабының жауапкершілігі осынша өкінішті боларын мұны ешқашан кешпеген, жеке басы мен тәнінің сұранысын ғана күйттейтін Бота сияқтылар сірә де ұғынар ма?! Ешкімді жақсы көрмей-ақ бақытты. Денесі ештеңеден сескенбейді, жамандықтан тітіркенбейді, бір де бір ісіне өкінбейді.
Қазақтардың өзгере бастаған мінез, құлқының сипатын Мираның «Ақынның тағдыры» мұңлы драмасынан да көреміз. «Ақын тағдыры» автор ескерткендей тым мұңлы, тым ащы. Махаббат сезімінің мұншалық сергелдеңге салып, жақындарының, әсіресе аяушылықтан жұрдай Пәтиқаның адам айтса нанғысыз қатыгездік танытып, көз жұмған Тайжан ананың сүйегіне жуытпай, қақаған қыста үйге кіргізбеуін, естімеген елде көп, әрең қабылдайсың. Ана болжамы еміс-еміс еске түскендей: «Адуын қатындар құсап жағаңа жармасып, беттен алмайтын, абалап, итше арпылдамайтын, томаға тұйық адамның көз жасы тұздай ащы болады! Ащы! Тым ащы! Сол көз жас бара-бара қара жерді ағартқан сорға айналады. Егер одан ажырасатын болсаң, Пәтиқаның көз жасы сені түбі жібермейді. Күндердің күнінде табаныңмен таптаған Пәтиқаға зар болып қаласың! Ентігіп жете алмай, өкініп жүресің сосын...».
Еркінғали Дарабасов – ақындық шабытпен шырқалған ерекше бейне. Махаббат құдіретінің кез келгеннің пешенесіне бұйырмайтын буырқанысы драманың басынан аяғына дейін сақталған. Дәл осылай – Еркінғалидай сезіну де, дәл осылай – Еркінғалидай түйсіну де бір бақыт.
Мира ешкімге, жазушылардың да ешқайсысына ұқсамайды. Бұрынғылардан да, кейінгілерден де қолтаңбасы мүлдем бөлек. Алдыңғы толқын, біздер, кітаптарымызды үкімет есебінен шығаруға дағдыланғанбыз. Кезінде пәтерді де бәріміз үкіметтен алғанбыз. Ал, Мираға мұның бірі де бұйырған емес. Пәтер түгілі бір де бір жинағы үкімет есебінен жарық көрмепті. Мемлекет тарапынан ауыз толтырып айтарлықтай бірде-бір марапат та алмаған. 2003 жылы «Арыс» баспасынан алғаш шыққан «Махаббат бағынан» бастап «Ар азабына» дейінгі бес-алты кітабының қандай қиындықпен оқырман қолына тигенін елестете беріңіз. Мираның әрбір әңгімесінің оқырманға берер ойы, сюжеті, сөз саптауы бөлек. Қуаныштысы – кезекті әр туындысының жаңалық ретінде қабылданып, Әбдіжәміл Нұрпейісов, Дулат Исабеков, Мереке Құлкенов сынды белгілі тұлғалардың назарына ілініп, лайықты бағасын алуы. Айгүл Ісмақова, Гүлжаһан Орда, Толымбек Әбдірайым, Дүйсенкүл Жақан сияқты қаламгерлер мен белгілі ғалым, сыншылардың талдау обьектісіне айналуы да көп жайтты аңғартады. Қазақстан Жазушылар одағының IV құрылтайында да екі құрылтай аралығында прозалық кітаптарын шығарғандар арасынан Мира Шүйіншәлиеваның да есімі ерекше аталды. Одақтың кейінгі Әдеби жыл қорытындысында Нұрлан Қами «Ар азабы» атты жинағына енген «Сіңлімнің сүйгені» хикаясын өз ойымен талдап, «шынайы жазылған жақсы шығарма, автордың шеберлігіне ризамыз» деп айтты. Сол жыл қорытындысында белгілі ғалым Айгүл Ісмақова да «Өкініш» атты Мираның үш бөлімнен тұратын мұқабасы қалың жаңа төртінші кітабын әдебиетке қосылған жазушының үлесі дей келе, «Адасқан ару» атты әңгімесінде «шолақ балақ, қылшық бет» Нүкістің арбауы арқылы абайсызда теріс дін жолына түсіп, пәлен жыл оқыған «қос қызыл дипломның» қайырын көрмей күннің қапырығында тұншығып киініп, бақытын байлаған Райханның аянышты тағдырын қазіргі қоғамдағы қазақ әйелінің дерті екеніне ерекше тоқталды.
Мираның сүйікті анасы 53 жасында өмірден озып, рухына бағыштап 1984 жылы «Сағыныш» деген новелла жазып, содан былайғы бүкіл саналы ғұмыры шығармашылықпен байланысты жалғасуда. Батыс Қазақстан облысы, Бөкейордасы ауданы, Бисен ауылында туып, Орал педагогикалық институтын бітірген Мираның журналистік, ақындық, жазушылық және драматург ретіндегі түрлі бағыттағы еңбегін қалай насихаттасақ та артық емес.
Қайталай айтқымыз келетіні – осы сұлу да (актриса да болар еді, киноға да түсер еді, алда-жалда ынта қойса) сүйкімді жан, жазудың ауыр жүгін қайыспай көтерген талантты жас әріптесіміздің уақыт тамырын дөп басуы, қоғам дертін дәл анықтауы, алдыңғы толқын, аға-апалары, біздер мағынасына бойлап та үлгермеген дәуір тынысына батылдықпен ілесіп, назарға іліне қоймаған, ілінсе де қауқарымыз жете бермейтін аса өзекті тақырыпты, бүгінгінің түйткілін меңгеруі.
Мира Шүйіншәлиева қолтаңбасының басты ерекшелігі – уақыт пен қоғамның сипатын үндестіре білуі. Жаһанданудың жағымды, жағымсыз ағыстарының қазақ тірлігіндегі быт-шыт көрінісін суреттеп, әзірге көркемделе қоймаған мүлдем тосын кейіпкерлер легін әкелуі. Жазушы ештеңені, ешкімді дәріптемейді, сынап мінемейді, өліп-өше таңырқамайды, бұрын-соңды дағдыланып үйренбеген іс-әрекет үстіндегі түрлі мінез, қылықтарды бүкпесіз жайып салады. Мира шығармаларында шындық қана шырқырайды. Рас, психологиялық қатпарынан гөрі қаһармандарының қақтығысында табиғи анайылау тұрпат басым түсіп жатады кейде. Бұл өзін ақтап та тұрғандай. Қазір қалыптасқан мейлі өнер, мейлі өмірдегі менталитет лиризмге титтей де мұқтаж емес. Дөрекіліктің, тұрпайылықтың, пасықтықтың, сатқындықтың, қатыгездіктің дәуренінде таусыла табынатындай, үлгі қылатындай дәнеңе қалмағандықтан да жасандылыққа жүгінбейді автор. Іліп аларлықтай өнегесі жоқтығына қарамастан түйткілге толы тірлігімен, опасыздыққа, жауыздыққа көндіге жүріп, мақсатына жеткені, жасықтығынан, бейшаралығынан құрдымға кеткені бар, қай-қайсы да жағымды, жағымсыз табиғилығымен есте сақталады.
Қазақ прозасының классигі Бейімбет Майлин кеңес өкіметі орнаған тұстағы формациялық өзгерістерді уытты тілмен, әжуа, мысқылмен, күлкі, кекесінмен (осының бәрінің астарындағы мұң қандай десеңізші) қалай шебер суреттесе, Мира Шүйіншәлиева да дәл солай көбіміз мән, мазмұнын әлі түсініп үлгермеген заман панорамасын тайға таңба басқандай анықтап отыр. Өткен ғасырлардағы Шұға, Әбдірахман, Раушан коммунист және кешегі, бүгінгі Ләйлә, Алуа, Ғаділбек, Еркінғали, тағы басқаларының арасында логикалық байланыс бар. Бұған ден қоймағанмен, халқымыздың қарама-қайшы түрлі даму үрдістерін ерікті, кейде еркінен тыс кешіп келе жатқан теперіші әлгінде аталған, аталмаған жүздеген, мыңдаған әдеби бейнелер арқылы санамызға сіңгені рас. Солай жалғаса береді де. Жоғарыда айтқан – автор қолтаңбасының ерекшелігі, яғни уақыт пен қоғамның сипатын үндестіруіндегі батыл ізденісі шығармаларының өміршеңдігін дәлелдеп, оқырман қызығушылығын арттыра түсуде. Кейіпкерлерінің тағдыр тәлейін Қыз Жібек, Төлеген, Баян сұлу – Қозы Көрпеш, Дездемона, Ромео, Фархад, Шырын, Шұға, Тоғжан, Ұлпан, т.б. салыстырудың еш айыбы жоқ. Жас ғалымның құсадан жынданып кетуі, сазгер, ақынның жар опасыздығына арбалуы, әп-әдемі бойжеткеннің қадіріне татымайтын біреуге жабысып, «сабыр түбі сары алтынды» қалқан етіп, ана атануы, тәп-тәуір азаматтың кезбеге айналуы – бәрі айналып келгенде жалпыға ортақ, адамзатқа тән ақ пен қараның мәңгілікке ұласар айқасы. Бүгінгінің Қарабай, Жантықтарын, Отелло, Яголарын, Печориндерін, Мырқымбайларын, Еңліктерін, Татьяналарын, Сүзге, Сүйінбикелерін, Катариналарын, Қарашаштарын осы Мираның драмаларынан, хикая, әңгімелерінен көріп біліп отырғаныма сенбесеңіздер, «Махаббат бағы», «Шүберек қуыршақ», «Өкініш», «Жүректегі құпия», «Ар азабы» кітаптарын мұқият оқуға кеңес беремін.
Мағира ҚОЖАХМЕТОВА,
Қазақстанның еңбек сіңірген қайраткері