![Кен орнындағы өрт ауыздықталды](/article_photo/1553830076_article_b.jpeg)
Тиісті орындардың мәліметінше, оқиғаның негізі аталған кен орнындағы күрделі учаскеде наурыз айының 13-24-і аралығында жүргізілген ұңғыманың құрылысы барысында, сондай-ақ күрделендірілген бұрғылау ерітіндісімен ұңғыманы жуу жұмыстарын, грифондарды жою үшін жөндеу-оқшаулау жұмыстарын жүргізу барысында шыққан техногендік сипаттағы газ-су аралас табиғи бұрқағынан басталған. Араға 12 күн салып кен орнының орталық бөлігіне тән болып табылатын бұл сұйықтық, яғни жер бетіне шыққан газ-су қоспасының ошағы жана бастады. 10-15 метр биіктікте алаулай жанған өртті сөндіру оңай болмады. Құрамында Төтенше жағдай департаментінің өкілдері, экологтар, тәртіп сақшылары, өндірістік қауіпсіздік мамандары, ҚМГ, «Маңғыстаумұнайгаз» АҚ, «СиБУ» ЖШС және Маңғыстау облысы әкімдігінің қызметкерлері бар жедел өрт сөндіру штабы құрылып, оқиға орнына «Семсер-Өрт сөндіруші» ЖШС жауынгерлік тобы, Ақтау қаласының МӨҚҚ 6 өрт сөндіру тобы келіп жеткен.
Өртті сөндіруге 4 автоцистерна, 1 жылжымалы сорғы стансасы, 1 газ-су сөндіруші автокөлігі келіп, жедел жұмысқа кірісті. Олармен бірге, өрт шыққан жерде Маңғыстау облысының ТЖД, «Файр протекшн ЛТД» ЖШС жеке құрамының 53 адамы және өрт сөндіру техникасының 12 бірлігі жұмылдырылған. Өртті сөндіру барысында жанған жерді тасымалданатын лафеттік оқпандармен сөндіру үшін бірнеше рет талпыныстар жасалғанмен, өрт ошағына кірме жолдардың жоқтығына байланысты өртті ауыздықтау мүмкін болмады. Екі-үш күн бойы өртті ауыздықтау және төтенше жағдайды жою үшін барлық шара қолданылып, төтенше оқиға орнына 80 маман, 25 түрлі техника жұмылдырылды.
Нәтижесінде 27 наурыздан 28 наурызға қараған түнде аталған ұңғыма маңайындағы грифонда шыққан өрт сөндірілді. Қазір пайда болған грифондар жабылып, газ-су аралас табиғи бұрқақтың жер бетіне шығуы тоқтатылды. Ал оқиға орнында зардап шеккендер мен қаза болғандар жоқ. Алдын ала мәліметтер бойынша, материалдық шығын көлемі шамалы. Сондай-ақ қазіргі сәтте қайта қалпына келтіру үшін кешенді жұмыстар жүргізілуде. Мамандар алдағы уақытта осындай төтенше жағдайлар қайталанбас үшін жан-жақты сараптамалық жұмыстар жүргізетін болады.
Гүлайым ШЫНТЕМІРҚЫЗЫ,
«Egemen Qazaqstan»
Маңғыстау облысы