Бүгінде қазақстандықтар ғана емес, бүкіл әлем жұртшылығы Нұрсұлтан Назарбаевтың жеке басының қасиеттерін, егеменді Қазақстанның саяси жүйесі негіздерін және жоғарғы билікті өзгертудің мәдениеті мен озық дәстүрін қалыптастырудағы тарихи рөлін оң бағалауда.
Мемлекет басшысының өз еркімен өкілеттігінен бас тартуы посткеңестік кеңістікте алғаш рет болып отыр. Көптеген елдерде биліктің ауысуы кезінде кісі өлімі, төңкеріс немесе сайлауда жеңіліс табу орын алады.
Мұны Ельциннің тәжірибесімен салыстыруға болмайды, өйткені оның орнынан түсуі кезінде Ресейдің бірінші президентінің рейтингі ең аз сыни өлшемдерден төмен болды.
Елбасы президенттік қызметін өзінің биік беделін сақтай отырып аяқтады. Бұл сөзімізге халық тарапынан бұқаралық ақпарат құралдары мен әлеуметтік желілер арқылы айтылған пікірлер дәлел бола алады. Сондай-ақ туыстарымыздың және әріптестеріміздің тәуелсіз еліміздің негізін салушы – Елбасы Нұрсұлтан Әбішұлы Назарбаевтың жасаған барлық істері үшін алғысын айтып, оның өз өкілеттігін тоқтатқанына өкінішін білдірген пікірлерін де көптеп естіп жатырмыз.
Тарих, келер ұрпақ әлі Нұрсұлтан Назарбаевтың еліне жасаған қызметінің, сондай-ақ президенттік өкілеттігін өз еркімен тоқтатуының әділ бағасын беретін болады. Ол биліктің еріксіз түрде ауысуының алдын алды. Елбасы өз билігін тоқтатуға дайындықпен келді. Елбасы «майдан қыл суырғандай» ептілікпен, барлық процедуралық және конституциялық талаптарды сақтап, процестің тазалығын қамтамасыз ете отырып өз шешімін қабылдады. Ол осы қадамы арқылы ұрпаққа үлгі-өнеге қалдырды. Дәлірегі, Елбасы ұрпаққа Қазақстанда алдағы уақытта биліктің ауыстырудың тиімді жолын, халықтың мүддесін барынша ескере отырып жүзеге асыру қажеттігін аңғартты.
Біз тәуелсіз өмір сүруге үйренуіміз керек. Саяси таңдауға жауапкершілікпен қараған абзал. Бұл орайда депутаттар мен президентті сайлау, жергілікті билік органдарымен сындарлы диалог жүргізу, бюджетті және даму бағдарламаларын бақылауды жүзеге асыру маңызды. Нұрсұлтан Назарбаевтың тиісті заңдарды алға жылжыту және билік тармақтары арасындағы өкілеттіктерді бөлу мәселелерінде көп үлгі көрсетті.
Бізге халқымыздың бірлігі мен ынтымағын сақтау аса маңызды. Бұл орайда қазақ халқы негізгі жауапкершілікті өз мойнына алу керек. Елбасымыз халықты елімізді сақтауға, бейбітшілік пен бірлікті нығайтуға үнемі шақырып келеді. Біздің бірлігіміз, татулығымыз баға жетпес құндылығымыз. Тыныштық пен татулықты ту еткеніміз үшін халқымызды барлық әлем сыйлайды, құрметтейді әрі дана, бейбітшілікті жақтайтын ұлт ретінде таниды.
Биліктің ауысуына үреймен қараудың қажеті жоқ. Еліміздің жаңа Президенті Қасым-Жомарт Тоқаев Елбасы Нұрсұлтан Назарбаевтың сенімді серігі әрі шәкірті. Ол Н.Назарбаевтың саясатын одан әрі жалғастырады. Қ.Тоқаев өз ұстазының ұстанған бағытына сенеді. Көп векторлы сыртқы саясатымыздың негізгі сәулетшілерінің бірі ретінде Қ.Тоқаев біздің өңірде өз мүдделері бар негізгі геосаяси ойыншылар арасындағы теңгерімді қамтамасыз етуді сенімді түрде жалғастыра алады.
Нұрсұлтан Назарбаев елімізде америкашыл, қытайшыл немесе ресейшіл көшбасшы болмауы қажеттігін, Қазақстанды мемлекеттік мүдделерімізге сай қызмет ететін, тәуелсіздігімізге құрметпен қарайтын тұлғаның басқарғанын қалайтынын ұқтырды.
Еліміз саяси дамудың жаңа кезеңіне шығады. Алдымызда президенттік сайлау тұр. Бұл сайлауда жаңа тұлғалар танылады. Осы саяси науқан халқымыз үшін үлкен сын. Біз еліміздің, өзіміздің тағдырымызға тікелей әсер ететін жауапты таңдау мүмкіндігіне ие боламыз. Бұл өз кезегінде біздің халқымыз үшін жетілу сынағы болмақ. Қалай десек те, халық осы саяси науқанда өзінің дұрыс таңдауын жасайды деген сенім мол. Еліміз аман, жұртымыз тыныш болсын.
Талғат ҚАЛИЕВ,
саясаттанушы
