Міндетін адал атқаруда
Сәрсенбі, 4 қаңтар 2012 7:07
Бейбіт адамдардың өміріне қауіп төнгенде өз өмірлерін өзгелер үшін ойланбай қия алатын полиция қызметкерлері екендігі, олардың сын сағаттағы батыл да ұтымды қимылдары тыныштықты сақтап қалатындығы, ел үшін, жер үшін намысты қолдан бермейтіндігі қазір айтпаса да баршаға аян. Мұндай санаттағы полиция қызметкерлері Алматы қаласының ІІД-інде көптеп қызмет етеді. Солардың бірқатары Тәуелсіздіктің 20 жылдығы қарсаңында арнайы марапатқа ие болды.
Сәрсенбі, 4 қаңтар 2012 7:07
Бейбіт адамдардың өміріне қауіп төнгенде өз өмірлерін өзгелер үшін ойланбай қия алатын полиция қызметкерлері екендігі, олардың сын сағаттағы батыл да ұтымды қимылдары тыныштықты сақтап қалатындығы, ел үшін, жер үшін намысты қолдан бермейтіндігі қазір айтпаса да баршаға аян. Мұндай санаттағы полиция қызметкерлері Алматы қаласының ІІД-інде көптеп қызмет етеді. Солардың бірқатары Тәуелсіздіктің 20 жылдығы қарсаңында арнайы марапатқа ие болды.
Қызметтерінде ең жоғары көрсеткіштерге қол жеткізген тәртіп сақшыларын Алматы қалалық ІІД бастығы, полиция генерал-майоры Ерлан Тұрғұмбаев марапаттады. Ол полицейлерге ордендер мен медальдар тапсырып, тәртіп сақшыларын арнаулы марапат қағаздарымен құттықтады. Олардың ішінде арнайы жедел әрекет ету жасағының сарбаздары да болды.
«Арнайы жасақтың сақшылары тепсе темір үзетін, қиын жағдайда шұғыл әрекет етуге қабілетті, тәжірибелі қызметкерлер. Осы жігіттердің кәсібилігі мен қайсарлығының арқасында көптеген қылмыстар мен құқық бұзушылықтар ауыздықталып, халықтың тыныш өміріне кепілдік беріліп келеді. Бұл жасақтың қызметкерлеріне спортпен үзбей айналысуларына бар жағдай жасалған», – дейді Е.Тұрғұмбаев.
Алматы қалалық ІІД мен барлық аудандық бөлімдері қала тыныштығына бір кісідей жұмылдырылған. Мұнда күн-түн демей, демалыссыз бес мыңнан астам сақшы еңбек етуде. Техникалық жарақтану мүмкіндігі мол, кәсіби мамандар арасында мемлекеттік жоғары марапаттарға 19 полиция қызметкері ұсынылып, оның 15-і «Даңқ» және «Айбын» ордендерімен наградталған. Бейбіт күндегі қылмысқа қарсы күресте 142 алматылық тәртіп сақшысы түрлі жарақаттар алса, 18 қызметкер қызмет барысында қаза тапқан.
Үстіміздегі жылы Президент Н.Ә.Назарбаев бірнеше аса ауыр қылмыс жасаған қарулы қылмыстық топтың көзін жойған «Сұңқар» арнайы бөлімшесінің сарбаздарын ІІ дәрежелі «Айбын» орденімен наградтау туралы Жарлыққа қол қойды. «Сұңқар» шабуылшыларын марапаттау рәсіміне ІІМ Ішкі әскер қолбасшысы генерал-майор Руслан Жақсылықов келіп, өздерінің қызметтік борышын абыроймен атқарған полицейлерге салтанатты түрде мемлекеттік наградалар табыс етті және бөлімшенің барлық жеке құрамына алғыс білдірді. Сегіз сарбазға ІІ дәрежелі «Айбын» ордені табыс етілді, арнайы бөлімшенің тағы төрт қызметкері «Ерлігі үшін» медалімен марапатталды. Әлі күнге дейін ем қабылдап жатқан «Сұңқардың» екі қызметкеріне ІІМ мен Алматы қаласының ІІД басшылығы олардың наградаларын ауруханада тапсырды.
«Сұңқар» және басқа бөлімшелердің қоғамдық тәртіпті қамтамасыз ету жұмыстары өте жоғары жауапкершілікті талап етеді, ал кей жағдайларда олардың өмірі қатерге толады. Бірақ мұндай қауіпті шақ арнайы дайындықты, сонымен бірге, сабырлылықты, төзімділік пен жанқиярлықты да талап етеді. Бүгінгі таңда арнайы жедел шаралар кезінде жарақат алған екі сарбаз ғана ауруханада жатыр, ал қалғандары қазір сапта. Олардың ерлігін Мемлекет басшысы, ІІМ басшылығы мен азаматтар жоғары бағалады. Бұл орайда Ерлан Тұрғұмбаев полицияның осы бөлімшесінде өз ісінің нағыз шеберлері, рухы күшті, табанды және адал адамдар қызмет ететінін атап айтты. «Бұлар мыңдаған арнайы шараларды сәтті аяқтаған, көптеген қауіпті қылмыскерлерді құрықтаған адамдар. Бұл бөлімшенің әрбір қызметкері Отанына қалтқысыз қызмет етеді. Олардың ісінің нәтижесі – азаматтардың қауіпсіздігі», – дейді басшылық.
Жалпы, тарих қойнауына енген 2011 жылда елді елең еткізген оқиғалар жетерлік. Соның бірі – Алматы қаласында 35 жастағы өмірден түңілген келіншектің сәбиін 5-қабаттан лақтырып жібергені еді. Естіген елдің жағасын ұстатқан бұл оқиғаның қайғылы аяқталмауына дер кезінде көмекке келген сақшылардың ерлігі мен кәсібилігі ғана сеп болды.
Түсінікті болуы үшін оқиғаны басынан баяндайық. Әуезов ауданындағы шағын аудандардың бірінде тұратын әйелдің бауыр еті баласы – небәрі 3 жастағы ұлын өлтірмекке бел буғаны туралы дабыл түсісімен, оқиға орнына алғашқылардың бірі болып қалалық ІІД ППП-ның «Боран-086» мүшелері жетеді. Баласын өлтіруді, артынан өзіне де қол салуды ойлаған келіншектің ессіз әрекетін тоқтату үшін экипаж мүшесі, аға лейтенант Серік Жапаров үйдің шатырына көтеріледі. Ал бұл кезде оның көмекшісі, полиция аға сержанты Заитжан Аюпов өлімге бас тіккен әйелді сөзге тартып, келіссөз жүргізіп тұрған. Бір кезде ашуға булыққан келіншек қолындағы баласын 5-қабаттан лақтырып жіберіп, артынша өзі де секіреді. Осы сәтте шатырдан төмен құлдилаған баланы аға сержант қас қағым сәтті қалт жібермей аса ептілікпен қағып алады. Не болып, не қойғанын түсінбеген сәби тарс жұмған көзін ашқанда өзіне күлімсіреп қарап тұрған жылы жүзді бейтаныс адамды көреді. Дегенмен, қатты шошынып қалған сәбиге психологиялық көмек көрсету үшін жедел жәрдем қызметкерлері оны 1-қалалық балалар ауруханасына жеткізеді. Ал ауыр жарақат алған әйел қалалық 7-клиникалық ауруханасына жөнелтіледі.
Қысылтаяң сәтте сабырлылық сақтап, қырағылық танытқан аға сержант Заитжан Аюповтың бұл ерлігі елеусіз қалған жоқ. Ол Мемлекет басшысының Жарлығымен «Ерлігі үшін» медалімен марапатталды. Патрульдік полиция қызметкеріне бұл марапатты қала әкімі Ахметжан Есімов табыс етті.
«Ең бастысы, марапатталуда емес, бүлдіршіннің амандығында ғой. Сәбидің жағдайын біліп, ауруханаға барып тұрамын. Мен тек өзіме жүктелген міндетімді абыроймен атқардым деп сенімді түрде айта аламын. Осындай деңгейдегі марапатқа ие болу үлкен мәртебе», – дейді аға сержант Заитжан Аюпов. Міне, біздің қалада мұндай полиция қызметкерлері баршылық.
Гүлнәр ЖАМАНҚҰЛОВА, Алматы қаласы ІІД қызметкері.
АЛМАТЫ.
