Саясат • 02 Сәуір, 2019

1 дәрігердің жүктемесі 1 989 адамды құрайды - Е.Біртанов

Дәрігерлердің жүктемесін төмендету мақсатында 2018 жылы 1315 жалпы практика дәрігер учаскесі мен 79 педиатриялық учаскесі ашылды. Бұл туралы Денсаулық сақтау министрі Е. Біртанов Үкімет отырысында хабарлады.

Светлана ҒАЛЫМЖАНҚЫЗЫ

Министрдің айтуынша, бүгінгі күні 1 дәрігердің жүктемесі 1 989 тіркелген адамды құрайды екен. Ал жалпы практика дәрігері жүктемесінің ең жоғары көрсеткіші Қостанай, Батыс Қазақстан және Қарағанды облыстарында байқалады.

«Осылайша, жүктеменің жоспарланған деңгейіне жету үшін алғашқы медициналық көмек ұйымдарына қосымша 1 157 дәрігер қажет.

Еліміздің өңірлерінде, әсіресе ауылдық елді мекендерге келген жас мамандарға әлеуметтік қолдау көрсетудің және тұрғын үймен қамтамасыз етудің маңызы зор» деді Е.Біртанов.

Көтерме жәрдемақы ұсыну бойынша Алматы, Қостанай және Жамбыл облыстары жеткіліксіз жұмыс жүргізуде.

2019 жылы еліміздің медициналық жоғары оқу орындарында 5 000-нан астам түлегінің 1 515-і жалпы практика дәрігері маманы болмақ. «Бұл алғашқы медициналық көмек кадрларының тапшылығын түгелдей қамтуға жеткілікті. Жергілікті атқарушы органдар жас мамандарды тарту мақсатында барлық әлеуметтік қолдау шараларын жасауы қажет» дейді Министр.

Әлеуметтік қолдау шаралары ауылды мекендермен қатар, шағын қалаларда көрсету мүмкіндігі заңнамамен бекітілу қажет. Бұл сол жердегі кадр тапшылығын жоюға мүмкіндік береді.

«Сондай-ақ, жас мамандарға өз оқуын жеке меншік медициналық ұйымдарда жұмыспен өтеуге мүмкіндік беру қажет. Бұл алғашқы медициналық көмекті мемлекеттік-жекеменшік әріптестік механизмі арқылы дамытуға мүмкіндік береді» деді Е.Біртанов өз сөзінде.