Күдіктілерді құрықтаған қыз
Бейсенбі, 8 наурыз 2012 8:37
Ақтөбе облысының ІІД Есірткі бизнесіне қарсы күрес басқармасының қызметкері, полиция капитаны Жанат Тайшекеновадан жұмысының қиындығы мен қызығы жайлы айтып беруін сұрағанбыз.
– Сіз неліктен ішкі істер органында қызмет еткіңіз келді?
Бейсенбі, 8 наурыз 2012 8:37
Ақтөбе облысының ІІД Есірткі бизнесіне қарсы күрес басқармасының қызметкері, полиция капитаны Жанат Тайшекеновадан жұмысының қиындығы мен қызығы жайлы айтып беруін сұрағанбыз.
– Сіз неліктен ішкі істер органында қызмет еткіңіз келді?
– Маған қым-қуыт тіршілікке толы тәртіп сақшысының қызметі ұнайды. Әрі өз отаныма, еліме, жұртыма көмегім тисін деген ниетпен қолымнан келгенінше ішкі істер саласында еңбек етудемін.
– Осы салада жүрген соң қылмыскерлермен бетпе-бет келген сәттер болған шығар?
– Біз, яғни қыздар, көбіне қылмыскерлер құрықталғаннан кейін, егер күдікті әйел болған жағдайда тексеру жұмыстарын жасауға барамыз. Бірақ 2006 жылы бір қызық жайт орын алды. Бірде кешқұрым жұмыстан кеш шығып, үйге келе жатқанмын. Кенеттен ту сыртымнан біреудің келе жатқан дыбысы естілді. Мен қорғану үшін сөмкемнен ұялы телефонымды алып, қоңырау шалмақ болғанмын. Сол сәтте басыма және арқама ауыр екі соққы тиді. Қолымдағы телефон жерге түскен кезде бір жігіт сөмкеме жабысып, екіншісі телефонымды алып қаша жөнелді. Мен есімді жиып, күдіктілердің соңына түстім. Соңдарынан қалмай қуып жетіп, сөмкем мен телефонымды қайтаруды талап еттім. Тіпті бір жігітпен жағаласып жүріп, самбо күресінің әдісімен оны жерге құлатып, қолындағы ұялы телефонымнан 112 нөмеріне хабарласып, полиция шақырдым. Ал екінші жігіт қашып кетті. Бірер минуттан кейін патрульдік полиция қызметкерлері келіп, күдіктіні бөлімге алып кетті. Кейін екінші жігіт те қолға түсті. Мен ертеңіне жұмысқа келсем, әріптестерім менің түндегі іс-әрекетімді әңгіме етіп күліп жүр. Меніңше, кез келген тәртіп сақшысы осылай жасар еді деп ойлаймын.
– Күдіктіні тырп еткізбегеніңізге қарағанда спорттан хабарыңыз бар сияқты?
– Мектепте жүргенде волейбол, баскетбол, каратэ, самбо күресімен әуестенгенім рас. Сол әдіс-тәсілдер қазір маған пайдасын тигізіп жатыр. Әрі ішкі істер саласында жүрген соң спорттан да алшақ болу мүмкін емес.
– Есірткіге қарсы күрес басқармасында қызмет еткендіктен күдіктілерді тексеру кезінде қызық жайттар болып тұратын шығар?
– Бірде біздің басқармаға келіп түскен жедел ақпарат бойынша 20 жастағы қызды тексердік. Күдікті қыз бала болғандықтан жедел уәкілдер менің жұмыс жасауыма ниетті болды. Бірақ іздеген есірткі заттары табылмады. Алайда қыздың аяқ киіміне қарай беретінін аңғардым. Аяқ киімін тексеру барысында ұлтарағының астынан 2 грамм героин тәркіленді. Облыс орталығындағы Тұрғындар қалашығында 50 жастан асқан әйелдің қылмысын әшкерелеуге қатыстым. Әлгі әккі әйел есірткі сатуға өзінің кәмелетке толмаған қызын жұмсайтын болыпты. Алдын ала тергеу барысында күдікті әйелдің өзі де есірткі қолданатыны анықталды. 50 жастағы әйелдің есірткі сататындығын дәлелдеп, істі сотқа жолдаған уақытта нашақор азаматша аурудан қайтыс болды. Медициналық сараптама нәтижесі әйелдің есірткіні шамадан тыс көп мөлшерде қолдану салдарынан көз жұмғандығын дәлелдеді.
Мәди ҚУАНЫШҰЛЫ.
Ақтөбе облысы.
