Саясат • 05 Сәуір, 2019

Премьер-Министрдің орынбасары Павлодар облысына жұмыс сапарымен келді

Гүлшара Əбдіқалықова бастаған Үкімет мүшелерінен құралған топ алдымен Екібастұз қаласындағы «Б.Нұржанов атындағы ГРЭС-1-» стансасына барды. Өңіріміздің қала мен аудан əкімдері, кəсіпорындар, бизнес-құрылымдар және кəсіподақ ұйымдарының басшыларымен жиын өтті.

Фарида БЫҚАЙ

Жиында Елбасының жуырда өткен «Нұр Отан» партиясының сьезінде қабылданған Жаңа əлеуметтік шараларын түсіндіру тобы осыған дейін жеті өңірді аралап шыққан.

- Басты міндет - Елбасы ұсынған əлеуметтік шараларды түсіндіру жəне талқылау, - деді Гүлшара Əбдіқалықова. - Негізгі мəселенің бірі - жұмыспен қамту. Оның ішінде жалақыны уақытылы төлеу мəселесі. Өйткені, елімізде еңбек дауларының 30 пайызы кəсіпорындардағы жалақыны уақытылы төлемеуден туындайды.

Яғни, елімізде еңбек жағдайы қауіпті өндіріс орындарында 640 мың адам еңбек етеді. Бұл еңбек қауіпсіздігін сақтауға баса назар аударуды талап етеді. Үкіметтік топ мүшелерінің хабарлауынша, биыл еліміздің тұрғындарын əлеуметтік қорғауға мемлекет тарапынан 2,3 триллион теңге бөлінбек. Ал жергілікті кəсіпкерлерге бизнестің əлеуметтік жауапкершілігі қағидасына сай көмекке зəру жандарға қолдау көрсету қажет.

Жиында сөз сөйлеген «Богатырь-Көмір» ЖШС персонал жəне əлеуметтік саясат жөніндегі директоры Азат Мəкеновтің айтуынша, кəсіпорында 6565 жұмыскер еңбек етеді.

- Алдағы үш жылда кəсіпорнымызда қосымша 600 жұмыс орны ашылады, - дейді Азат Мəкенов. - Қаңтар айынан бастап барлық жұмысшының жалақысы 5,4 пайызға артты.

Сондай-ақ, жыл сайын баспана сатып алуға жұмысшыларымызға жалпы құны 80 миллион теңге төленеді. Санаторлық-курортық емделуге биыл 260 жолдама беріледі.

Сапар барысында Премьер-Министрдің орынбасары «7-20-25» бағдарламасы бойынша пəтер алған екібастұздық отбасыларға барып, жастармен кездесті.

ПАВЛОДАР

Суретті түсірген Валерий Бугаев