Біліксіз кадрлардан арылмай болмайды
Бейсенбі, 19 сәуір 2012 7:53
Елбасымыз Н. Назарбаевтың «Қазақстан Республикасы құқық қорғау органдарының қызметкерлерін кезектен тыс аттестаттаудан өткізу туралы» Жарлығы дер кезінде қабылданған құжат деп білемін. Мұндай ауқымды шара елімізде алғаш рет өткізіліп отырғанына қарамастан, алға қойған мән-мақсаты жағынан маңызы өте зор. Өйткені, аталмыш сала бойынша қордаланып қалған проблемалар әлі де көп.
Бейсенбі, 19 сәуір 2012 7:53
Елбасымыз Н. Назарбаевтың «Қазақстан Республикасы құқық қорғау органдарының қызметкерлерін кезектен тыс аттестаттаудан өткізу туралы» Жарлығы дер кезінде қабылданған құжат деп білемін. Мұндай ауқымды шара елімізде алғаш рет өткізіліп отырғанына қарамастан, алға қойған мән-мақсаты жағынан маңызы өте зор. Өйткені, аталмыш сала бойынша қордаланып қалған проблемалар әлі де көп.
Солардың бірі білікті кадр, өз ісін жетік меңгерген маман жайына қатысты. Бұл мәселе төңірегінде ой қозғасақ, кеңестік замандағы құқық қорғау органы қызметкерлерінің сымға тартылғандай түр-тұлғасын, ішкі жан дүниесін сөз етпей болмайды. Жұртшылық бұл сала өкілдерін ала жіпті аттап өтпейтін әділдігі үшін шын пейілімен сыйлайтын, олар заңнан қия аттамайтын. Қазір заңға емес, кімнің қолы ұзын, кім бай, соған тәуелді секілді. Неге? Өйткені, бүгінгі құқық қорғау қызметкерінің қатарын «заманына қарай амалын тапқан» кездейсоқ адамдар көбейтіп жіберген. Үкімет берген өкілеттілік пен билікті жеке басына шексіз пайдаланып, алдына неше түрлі сауалдармен, өтініштермен келгендерді ұршықша үйіруге төселіп алған. Әрине, бәрін кінәлаудан аулақпыз. Бірақ «бір қарын майды бір құмалақтың шірітуі» байқалады. Біреу айтыпты ғой, «қарнымның ашқанына емес, қадірімнің қашқанына налимын» деп. Сол айтқандай, қадірін кетіріп жүрген – өздері. Өздері деп отырғаным – прокуратура, қаржы полициясы, кеден, ішкі істер саласының өкілдері. Иығына погон ілгендердің өздері сыбайлас топ құрып, қылмыскер болып шықса, тамыр-таныстық жолымен жылы орындарды иеленіп отырса, кәсіптік біліксіздік танытып жатса, балықтың бастан шірігені осы болмай ма? Қазір шикіөкпе, бозөкпелер құқық қорғау органының жалына жармасуға еш именбейді. Қолынан келе ме, білімі жете ме – шаруасы жоқ. Бар ойлары – алдымен орналасып алайын, сосын бір жөні болар. Бірде жұмыс бабымен бір күштік құрылымға бара қалдым. «Қалқам, бастығыңа жолығайын деп едім» деп жөнімді айта бергенім сол еді, жоқ, тез айтыңыз, асығыспын деп түйеден түскендей солқ еткізді. «Театр киім ілгіштен басталады» дегендей, кірмей жатып мынасы етегімнен алса, шені үлкен, қызметі жоғары бастығы қандай екен деп қатты налыдым.
Бірде облыстық прокуратураның жылдық есебін оқып отырып, жағамды ұстадым. Ұмытпасам, М.Жұмабаев ауданында болу керек, ішкі істер органының тергеушісі жақ сүйегі, бірнеше қабырғасы сынған адамды өзі құлап, жарақат алды деген қорытынды шығарыпты. Кейін анықталғандай, оны бірнеше адам тепкілеп ұрған. Бірнеше куәлардың болғанына қарамастан басқаша ұйғарым шығаруы атқаратын лауазымына мүлдем сәйкессіздігін танытып тұрған жоқ па? Айыртау ауданында болған мына оқиға талайымыздың жағамызды ұстатты. Ішкі істер органының екі қызметкері араққа сылқия тойып алғаннан кейін түн ортасы ауа әлдебір азаматтың үйіне келіп, әңгір-таяқ орнатқан. Оның соңы адам өліміне ұрындырған. Мені құқық қорғау органдары қызметкерлерінің жұмысқа орналаспай жатып-ақ, шетелдік көлік мінетіні, зәулім үй салатыны алаңдатпай қоймайды. Демек, жең ұшынан жалғасқан жемқорлық тыйылмай отыр деген сөз. Сондықтан аттестаттау кезекті науқанға айналмас үшін оның құрамына қоғамдық ұйым өкілдері, ардагерлер, жастар көптеп тартылғаны жөн. Өйткені, мұндай сынақ кезінде аттестаттаудан өтушінің адамгершілік қасиеттері де жан-жақты сараптаудан барынша ашық түрде өтіп, біржақтылыққа үзілді-кесілді тыйым салынуы тиіс.
Әрине, бір аттестаттау арқылы барлық құқық қорғау органдарындағы кадр мәселесін шешу қиын. Десек те, осындай сүзгілеуді жиі ұйымдастырып тұрса, сала тазарып, өз ісіне барынша адал адамдармен толыға түсері күмәнсіз.
Болат САҒЫНДЫҚОВ, Солтүстік Қазақстан облыстық ақсақалдар алқасының төрағасы.
Солтүстік Қазақстан облысы.
