Аймақтар • 11 Сәуір, 2019

Ақтауда бір күнде екі «Адалдық дүкені» ашылды

1438 рет
көрсетілді
2 мин
оқу үшін

«Маңғыстау – адалдық алаңы» жобасы аясында Ақтауда бір күнде ашылған екі «Адалдық дүкенінің» бірі - Ақтау қаласы Полиция басқармасында болса, екіншісі Ақтау қалалық мамандандырылған халыққа қызмет көрсету орталығында.

Ақтауда бір күнде екі «Адалдық дүкені» ашылды

Ақтау қалалық мамандандырылған халыққа қызмет көрсету орталығындағы ашылған «Адалдық дүкеніне» ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің басшысы, «Маңғыстау – адалдық алаңы» жобасының тең кураторы Нұргүл Жанназарова, «Азаматтарға арналған үкімет» МК КЕАҚ Маңғыстау облыстық филиалының директоры Ербол Байжігіт, қалалық мамандандырылған ХҚКО басшысы Мұрат Тасиров, жоба жетекшісі Киікбай Ешманов, мекемеме қызметкерлері және қызмет алушылар қатысты.

Ашылу салтанатында лента қиған қала тұрғыны қызығушылық танытып, аталған дүкеннен тауарын алып та үлгерді. Сонымен қатар, келген сатып алушылардың арасында дүкенге есептеуіш құралын (калькулятор) қоюға ұсыныс білдірген азамат та болды

Енді сатушысыз дүкенде кез келген азамат арнайы төлем жәшігіне ақшасын қалдырып, қалаған нәрсесін ала алады. Яғни, сатып алушылар дүкенде сатушының жоқтығына қарамастан, адалдық қағидасына орай өздеріне өздері етеді. Дүкеннің басты ерекшелігі де осында.

Агенттіктің аумақтық департамент басшысы Нұргүл Жанназарова мұндай дүкендердің ашылуы қоғам мен азаматтар арасындағы адамгершілік қасиеттерін дамытуға, мейірімді, адал болуға және өзін-өзі дамытуға бағытталғанын атап өтті.

Айта кету қажет, Ақтау қалалық мамандандырылған халыққа қызмет көрсету орталығына күніне шамамен 1500 адам келіп, қызмет алады. Демек, орталыққа келіп-кетушілер саны айына 30 мыңға жуық адамды қамтиды. Ал полиция басқармасында 600-ден астам қызметкер мен келушілер сатушысыз дүкеннен қалаған нәрсесін сатып ала алады. Бұл дегеніміз – қызмет алушылар арасында және қоғамда сенім атмосферасын қалыптастырып, өздерін жақсы, адал тұлға ретінде тануға мүмкіндік беру. Сондай-ақ, халықтың әлеуметтік жауапкершілігін шыңдап, «Сыбайлас жемқорлыққа қарсы иммунитетті» қалыптастыруға әсер ететін нысан болып табылады.

Мемлекеттік қызмет істері және сыбайлас жемқорлыққа қарсы іс-қимыл агенттігінің Маңғыстау облысы бойынша департаментінің баспасөз қызметінің хабарлауынша, жоба шеңберінде аталған дүкендердің саны қазіргі таңда жүзден асты. Алдағы уақытта да халық көп жиналатын орындарда «Адалдық дүкендерінің» ашылуы жалғасын табатын болады.