Емханада емделушілерге арнайы көпсалалы дайындықтан өткен тәжірибелі дәрігерлер қызмет көрсетеді. Тұрғындарға сапалы алғашқы медициналық-санитарлық көмек беруді мақсат еткен емханада ақпараттық қолдау жүйесі жұмыс істейді. Соның ішінде тәулік бойы қызмет көрсететін call-орталық, сенім телефоны және емхананың веб-сайты бар.
Сондай-ақ Қасым-Жомарт Тоқаев Маңғыстау Өңірлік кәсіпкерлер палатасына барды.
– «Бизнеске арналған Үкімет» жобасы арқылы әр кәсіпкер өзінің бизнесін дамыту, біліктілікті жоғарылату мен қаржыландыруға қатысты консультациялар мен қызмет көрсетудің кең ауқымын ала алады. Кәсіпкерлерге барлық қызметтерді бір жерден алуға жағдай жасалған. Ең бастысы – кәсіпкерлер мәселенің күрделілігіне қарамастан, қайда жүгіну қажет екенін нақты біледі. «Бизнеске арналған Үкімет» арқылы біз кәсіпкерлерге арналған бірыңғай хаб құрамыз, бұл жұмыс, жалпы алғанда, ел экономикасына оң әсер ететін болады. «Атамекен» келешекте аталған жобаны республиканың барлық өңірлерінде таратуды жоспарлап отыр», – деп атап өтті «Атамекен» ҰКП басқарма төрағасы Абылай Мырзахметов.
Жұмыс сапары барысында Қазақстан Президенті Қасым-Жомарт Тоқаев өңірде «Бастау» жобасы арқылы кәсіп ашқан кәсіпкерлермен кездесті. Солардың бірі – Алтынгүл Қауқарова. Ол кәсіпкерлік негіздерінен білім алып, Шетпе ауылында балабақша ашты. «Атамекен» өңірлік микроқаржылық ұйымы 10 млн теңге несие бөлді. Түпқараған ауданынан Айтөре Бұхаева стоматологиялық кабинет ашты. Енді тұрғындар аудан аумағынан ұзамай-ақ кешенді ем қабылдай алады. Құрық ауылынан жас кәсіпкер Көмекбай Қойбағар түйе шаруашылығын қолға алды. Қазір ауыл халқын түйе сүті өнімдерімен қамтамасыз етіп отыр.
Жалпы Маңғыстау облысында 2018 жылы кәсіпкерлікке берілген несие көлемі 11,9 млрд теңгені құрайды. Жалпы сомасы 4,8 млрд теңгеге 424 жоба субсидияланды. «Бизнестің жол картасы-2020» бағдарламасы бойынша 168 жобаға 3,3 млрд теңге бөлінсе, «Нұр капитал» бағдарламасы шеңберінде 44 жобаға 845,4 млн теңге жұмсалды. Ал шағын несие ретінде 710 жобаға 7,1 млрд теңге бағытталды.
Мемлекет басшысы Yessenov University-де болып, жастармен кездесті. Президентті университет басшысы бір топ оқытушылармен қарсы алды. Оқу орнында Мемлекет басшысына алдымен Студенттерге қызмет ету орталығы таныстырылды.
Университет ректоры Берік Ахметов Мемлекет басшысына университеттің инфрақұрылымы жөнінде баяндап, университетте енгізіліп жатқан жаңа тың идеяларды таныстырды.
Баяндамадан соң Президент Теңіз академиясының жұмысымен танысты. Мемлекет басшысының назарына норвегиялық Kongsberg компаниясының кеме жүргізушілерді және кеме механиктерін оқытуға арналған жоғары технологиялық тренажерлары көрсетілді. Тренажерларды жұмыс кезінде студенттердің өздері таныстырған болатын. Қазіргі таңда Yessenov University студенттері Каспий теңіз және өзен көлігі институтында тәжірибеден өтуде. Аталған институт – теңіз, өзен және аралас «өзен-теңіз» суларында жүзетін барлық үлгідегі кемелерде жұмыс істеуге құқығы бар су көлігі үшін мамандар дайындайтын Каспий маңындағы жалғыз салалық білім беру кешені. Студенттердің ірі салалық кәсіпорындарда, сондай-ақ өзен және теңіз флотының кемелерінде практикалық дағдыларды алуға мүмкіндігі бар.
Сондай-ақ Қазақстан Президенті Қасым-Жомарт Тоқаев «Ақтау халықаралық теңіз сауда порты ұлттық компаниясы» акционерлік қоғамына барды.
Сапар барысында Мемлекет басшысына Ақтау теңіз портының қазіргі жұмыстары, Каспий теңізі арқылы өтетін жүк тасымалын арттырудың перспективалары, сондай-ақ Ақтау қаласындағы шипажай аймағының инфрақұрылымын дамыту жөнінде мәлімет берілді. Қасым-Жомарт Тоқаев өндірістік міндеттерді толыққанды орындауға, соның ішінде жүк тасымалы операцияларын жүргізуге, кемелерді айлаққа қоюға және қызмет көрсетуге септігін тигізетін порттың техникалық мүмкіндіктерімен танысты.
Премьер-Министрдің орынбасары Жеңіс Қасымбек Ақтау халықаралық теңіз сауда портының жаһандық көлік дәлізінің қиылысында орналасуы, жылына 17,7 миллион тонна құрғақ жүктерді, шикі мұнай мен мұнай өнімдерін тасымалдауға мүмкіндік беретінін баяндады.
Сонымен қатар Қазақстан Президентіне «Маңғыстау» зымыранды-артиллериялық кемесі көрсетілді. Сондай-ақ Қазақстан Республикасы Қорғаныс министрлігінің Әскери-теңіз күштерінің арнайы техникасымен, қару-жарақтарымен және киім үлгілерімен танысты.
Мемлекет басшысының Маңғыстаудағы сапары жалғасуда.
Маңғыстау облысы
