Сөз басында Мәулен Әшімбаев кезектен тыс президенттік сайлау өткізу туралы шешімнің өте орынды әрі уақтылы қабылданғанын атап өтті. Сондай-ақ ол Президенттің бұл жауапты шешім бойынша Елбасымен ақылдасқанына, Парламенттегі қос палата спикерімен, Премьер-Министрмен кеңескеніне, Конституциялық Кеңестің келісіміне жүгінгеніне және Парламенттегі партия жетекшілерімен кездескеніне назар аударып, Nur Otan партиясының аталған тарихи шешімді қолдайтынын жеткізді.
– Бұл биліктің тұрақтылығы мен елдің бірлігін нығайту үшін қабылданған уақтылы әрі өте орынды шешім. Nur Otan партиясы сайлау науқанына тас-түйін дайын. Ол үшін біз өзіміздің ұйымдастырушылық, кадрлық, саяси және ақпараттық әлеуетімізді пайдаланып, заң аясында жұмыс істейміз. Сайлау еліміздегі тұрақтылық пен бірліктің одан әрі күшеюіне оң әсерін тигізіп, халықты Елбасының саясаты аясында жаңа мақсаттарға жетелейді деп сенеміз, – деді М.Әшімбаев.
Сонымен қатар ол сайлауға Nur Otan партиясының белсенді түрде қатысатынын жеткізді.
– Еліміздегі жетекші саяси партия ретінде Nur Otan президенттік сайлауға белсенді түрде қатысады. Партия Төрағасының тапсырмасына сәйкес партиямыз сайлауға қатысу үшін өз кандидатын ұсынады. Соған байланысты Нұрсұлтан Әбішұлы Назарбаев 2019 жылдың 23 сәуірінде партияның кезектен тыс XIX съезін шақыру туралы Қаулыға қол қойды. Сол съезде Nur Otan атынан сайлауға қатысатын кандидаттың есімі белгілі болады, – деді М.Әшімбаев.
Nur Otanda өткен жиналыста Елбасы – партия Төрағасы Нұрсұлтан Назарбаев «Бақытты отбасы», «Құтты мекен», «Ауыл – ел бесігі» және «Халыққа көмек» жобаларын тиімді жүзеге асыру мәселелеріне арнайы тоқталған еді.
Атап айтқанда, «Халыққа көмек» жобасы халықтың проблемаларына жан-жақты әрі жедел назар аудару керек дегенді білдіреді. Партияның қоғамдық қабылдау бөлмелері базасында 234 әлеуметтік терезе құрылса, оларға Қазақстан Республикасының кез келген азаматы өзінің басында бар мәселелерімен барып көмек сұрауына болады. Ал жобаны жүзеге асыру үшін мобильді топтар құрылған. Оларға жергілікті атқарушы органдар мен үкіметтік емес ұйымдардың өкілдері кіреді. Азаматтардың барлық өтініш-тілектері бірі қалмай «осы жерде және қазір» қағидаты бойынша қарастырылады.
«Ауыл – ел бесігі» жобасы ауылдағы әлеуметтік инфрақұрылымдарды дамытуға, мамандармен қамтамасыз етуге және ауылды жерлерде жастардың кәсіпкерлігін өрістетуге бағытталған.
Ал «Құтты мекен» жобасының мақсаты инженерлік және әлеуметтік инфрақұрылымдарды дамыту үдерістеріне партиялық бақылау жүргізу болып табылады. Оларды жүзеге асыру үшін бақылаудың үш деңгейлі жүйесі құрылған. Аудандық деңгейде мониторинг жүргізетін топтар бақылауды тікелей инфрақұрылымдардың нысандарында қамтамасыз етеді. Ал аумақтық деңгейде қаржының мақсатты жұмсалуын бақылап, ағымдағы жағдайға талдау жүргізеді және шектеулі сипаттағы ұсынымдамалар жасайды. Орталық деңгейде мемлекеттік органдар мен партия құрылымдарының жобаны жүзеге асыру барысындағы есептері тыңдалатын болады.
Жиын соңында М.Әшімбаев партияның Орталық аппараты мен барлық деңгейдегі филиалдарына және бастауыш партия ұйымдарына алдағы сайлау науқанына қатысты бірқатар нақты тапсырма берді.
Елбасы анықтап берген аталған төрт жобаның басты мақсаты – азаматтардың әл-ауқатын арттырып, әлеуметтік жағдайын жақсарту. Сондықтан қашанда халықтың мүддесін бірінші кезекке қоятын Nur Otan үшін бұл басымдықтар партия жұмысының негізгі бағыты болып саналады.
