Құқықтық мемлекет өркендеуінің алғышарты
Бейсенбі, 17 мамыр 2012 8:19
Еліміз егемендігін алған 20 жылдың ішінде дүние жүзіне демократиялық, әлеуметтік, құқықтық мемлекет ретінде танылғаны, сонымен бірге, Қазақстан Бірікен Ұлттар Ұйымынан бастап, көптеген беделді халықаралық одақтардың тең мүшесі болып табылатыны баршаға аян. Қазақстан барлық мемлекеттермен терезесі тең ел бола отырып, көптеген жұрт таныған халықаралық шарттарды ратификациялады.
Бейсенбі, 17 мамыр 2012 8:19
Еліміз егемендігін алған 20 жылдың ішінде дүние жүзіне демократиялық, әлеуметтік, құқықтық мемлекет ретінде танылғаны, сонымен бірге, Қазақстан Бірікен Ұлттар Ұйымынан бастап, көптеген беделді халықаралық одақтардың тең мүшесі болып табылатыны баршаға аян. Қазақстан барлық мемлекеттермен терезесі тең ел бола отырып, көптеген жұрт таныған халықаралық шарттарды ратификациялады. Осындай игі қадамдарды жүзеге асыруда халықаралық құқық нормаларын, олардың жалпы жұрт мойындаған қағидаларын әділетті түрде жүзеге асыруда Парламенттің, құқық қорғау органдарының, сот жүйесінің қызметі ерекше. Өйткені, Қазақстан Конституциялық құрылымы жөнінен құқықтық мемлекет. Құқықтық мемлекеттің басты белгісі адам, қоғам, мемлекет мүддесі үшін істелетін игілікті істердің барлығы дерлік құқық, заң нормаларымен реттелетіндігінде. Біздегі жүзеге асырылатын, қабылданатын, қолданылатын құқықтық актілер әділеттілік қағидасына, мемлекет пен жеке адамның мүддесіне қызмет атқаруы тиіс. Мұндай күрделі міндеттерді жүзеге асыруда заңгерлер қауымдастығының маңызы ерекше екендігін өмір тәжірибесі көрсетіп отыр. Көптеген өркениетті елдерде заңгерлерді біріктіретін одақ, ұйым немесе ассоциациялар бар. Мұндай ұйымдар өз мемлекетінің құқықтық жүйесін өркендетуге тиісінше үлестерін қосуда. Қазақстан Республикасы алғаш тәуелсіздік алған жылдары Республикалық Заңгерлер одағы болды, егемендіктің өркендеуіне бұл одақ едәуір қызмет атқарды. Бірақ кейіннен одақтың қызметі белгісіз себептермен тоқтап қалды. Бұрын Заңгерлер одағы біріктіріп, бір бағытта қызмет істейтін бөлімшелер жеке-жеке ұйымға бөлінді. Мысалы: адвокаттар одағы, нотариат палатасы және т.б. Соның нәтижесінде Заңгерлер одағының жұмысы мүлдем көзге көрінбей қалды.
Қазіргі дүниежүзілік дамудың алғышарты – заңгерлік қызметті жетілдіру екені баршаға аян. Кез келген мемлекетаралық қарым-қатынас құқықтық халықаралық заңдылық шарттарға негізделген. Қазақстан мемлекеті құқықтық мемлекет ретінде Заңгерлер одағының жұмысын қайта жандандырып, еліміздің өркендеуіне, өркениетті, әділетті, құқықтық нормалардың мемлекет, қоғам, адам мүддесі үшін қызмет етуін жүзеге асыру керек.
Заңгерлер одағының құрылуы – осы салада қызмет ететін ғалымдарды, мамандарды еліміздің құқықтық тәрбиесін, сапасын өркендетуге, сондай-ақ заң шығарушы орган – парламент жұмысына да белсенді қатысып, сапалы заңдар жобасын әзірлеуге атсалысуға, еліміз бойынша білімді заңгер мамандарды даярлауға өз үлесін қосар еді.
Арықбай АҒЫБАЕВ
заң ғылымдарының докторы, Қазақстанның еңбек сіңірген қайраткері.
