«Жалпыға бірдей денсаулық» ұранымен Қоғамдық денсаулық сақтау ұлттық орталығының бастамасы бойынша Қазақстандағы Дүниежүзілік денсаулық сақтау ұйымының тұрақты өкілі Олег Честнов, белгілі әнші, «Қазақстан дауысы» байқауының жеңімпазы Шаhаризат Сейдахмет, мектеп оқушылары және мұғалімдердің қатысуымен жаппай жаттығу өтті. Аталған мектепте балалар мен жасөспірімдердің денсаулығын нығайтуға, денсаулыққа деген сауатты көзқарас қалыптастыруға, оны қолдау тетіктерін құру үшін жағдай жасауға бағытталған «Денсаулықты нығайтуға ықпалдасатын мектептер» жобасы іске асырылып жатқанын айта кеткен жөн. Жаппай жаттығулар өткізудің мақсаты – балалар мен жасөспірімдерді денсаулығына ұқыпты қарауға тәрбиелеу, саламатты өмір салты +машықтарын қалыптастыру. Балалар семіздігі мен басқа да жұқпалы емес аурулардың деңгейі артып келе жатқан жағдайда денсаулық мәдениетін дамытуға ықпал ететін осындай бастамалар денсаулықты сақтау және нығайтудың маңызын сөзбен ғана емес, іс жүзінде де көрсетті. Дене белсенділігі, қимыл-қозғалыс зейінділік пен оқу қабілетін жақсартады, күйзелістен арылтады. Әрі дұрыс салмақты ұстап тұру үшін де өте маңызды рөл атқарады», дейді ұйымдастырушылар.
Осы күні жаппай жаттығу №83 мектеп-гимназиясының 1300-ден астам оқушылары мен мұғалімдері, сондай-ақ БҰҰ Балалар қорының Қазақстандағы өкілінің орынбасары Вероника Ващенко, Денсаулық елшісі, Гиннес рекордтар кітабының 7 дүркін рекордшысы, әлемнің ірі шөл далаларын шарлап өткен жалғыз адам Марат Жыланбаевтың қатысуымен астанадағы Триатлон саябағында да өткізілді. Мұндай жаттығулар өңірлердегі мектептерде де өткізілетінін айта кеткен ләзім.
