Облыстық және 16 аудандық, қалалық ақпараттық-ресурстық орталық бар. Әкімдіктер жанындағы кеңестер мен комиссияларға ҮЕҰ өкілдері енгізілген. Яғни, үкіметтік емес ұйымдардың қоғамда алар өзіндік орны бар, атқарар рөлі де елеулі. Күні кеше үкіметтік емес ұйымдардың жетекшілері бас қосып, еліміздегі басты саяси оқиға – сайлауға қатысты өз ой-пікірлерін ортаға салды.
«Түркістан облысының Азаматтық Альянсы» заңды тұлғалардың қауымдастық нысанындағы бірлестігінің төрағасы Шәріпбек Жамалбектің төрағалығымен өткен жиында «Жайылма» қоғамдық бірлестігінің төрағасы Жанболат Сүйінбаев, Түркістан қалалық «Семей ядролық сынақ полигоны» қоғамдық бірлестігінің төрағасы Ахмет Оспанов, «Эко Атамекен» қоғамдық бірлестігінің төрайымы Гүлнәр Ниязова өз пікірлерін білдірді. Мысалы, «Түркістан облысының іскер әйелдер ассоциациясы» қоғамдық бірлестігінің төрайымы Инара Намазбаеваның айтуынша, бірлестік ұжымдық үнқосуын әріптестеріне жолдаған. «Әлем жұртшылығы еліміздегі татулықтың қуаты мен құндылығына көз жеткізіп отыр. Қазіргі уақытта Қазақстан өзінің экономикалық дамуының жаңа үрдістерімен де сыртқа танылып, саяси тұрақтылықтың нәтижесінде дамып келеді. Елдігімізді көрсететін, тұтастығымызды дәлелдейтін шақ жетті. Сол үшін сайлауға бір кісідей жұмылып атсалысамыз. Еліміздің өзге өңірлеріндегі іскер әйелдер де бұл бастаманы қолдайды деп сенеміз», дейді И.Намазбаева.
Ал жиынды жүргізіп отырған Шәріпбек Жамалбек әрбір адам өзінің азаматтық белсенділігін танытып, елдік мәселе қозғалған саяси оқиғалардан шет қалмауы керектігін айтты. «Ата-бабамыз көксеген Тәуелсіздік туы көгімізде желбіреп тұр. Ендігі мақсат әрі басты міндет – сол тәуелсіздікті көздің қарашығындай сақтау және оны одан әрі нығайту. Елбасының бастауымен Қазақстан барлық салада жетістікке жетті. Бірлігімізді нығайта ел мүддесі жолында тынбай еңбек етуіміз керек. Президенттің өзі айтқандай, қоғамдық-саяси келісімді қамтамасыз ету үшін айқындық қажет. Сол үшін үкіметтік емес ұйымдар сайлауға бір кісідей жұмылып, атсалысайық», деді Шәріпбек Жамалбек.
Өз кезегінде сөз алған үкіметтік емес ұйым басшылары Президент Қасым-Жомарт Тоқаевтың шешімін қолдайтындарын, сайлауға белсенді түрде қатысатындарын жеткізді.
