Қоғамдық бірлестіктің жетекшісі Дәурен Бабамұрат бұл жолғы сайлаудың алдыңғыларға ұқсамайтынын, жаңа жағдай екенін тілге тиек етті. «Қалыптасқан жағдайда осы уақытқа дейін экономика мен халықаралық деңгейдегі Елбасының жетістіктерін сақтай отырып, жаңа белестерге ұмтылу үшін халыққа да саяси айқындық қажет. Халықтың көкейінде не бар, қандай мәселелер мазалайды? Көпшілік сайлауға түсетін азаматтардан осыны күтеді. «Экономика елге жұмыс істеуі керек. Шағын және орта бизнеске еркіндік беру керек. Жемқорлықпен күресті шынайы түрде жүргізу қажет. Саяси реформаларға жол ашу керек. Елге бірлік, сайлауға әділдік, экономикаға тұрақтылық қажет. Сол себепті сайлау науқанына барынша қатысу дәл қазір әрбіріміздің міндетіміз», деді Д.Бабамұрат.
Спикер сондай-ақ шетелден келген инвесторларды ертең Қазақстанда жағдай қандай болады, халықтың жағдайы қалай қалыптасады, алға қойған мақсаттарымыз қайтіп шешіледі деген мәселелер алаңдатып отырғанын жеткізді. Себебі «халықаралық заң Президенттің міндетін уақытша атқарушы» дегенді қабылдамайды. Мұның соңы елден инвестицияның жылыстауына алып келуі де әбден мүмкін.
«Қазақ елінің бірлігіне және біртұтастығына сына қаққысы келетіндер өз ішімізде де, сырт елдерде де баршылық. Ел басқаруға лайықты тұлғаны танып, оған сенім білдіруді кешіктіруге болмайды», деп атап өтті Д.Бабамұрат. Оның айтуынша, Қазақстанның мүдделерін әлемде ілгерілету және нәтижелі халықаралық байланыстарды сақтап қалу үшін мемлекет билігінің сабақтастығы қажет.
Халқымыз соңынан жұртты ерте алатын, әлемдік қоғамдастық алдында Қазақстанды лайықты таныстыра алатын тұлғаны өркениетті жолмен таңдауы тиіс. Заңды сайлау – ел болашағының тұрақтылығының кепілі. Сондықтан жастар өкілдері бұл науқанды заң аясында өткізуге барынша атсалысатын болады.
