Бизнесті дамытудағы кеден көмегі

Сенбі, 30 маусым 2012 7:55

Бүгінгі таңда кеден саласында жүзеге асырылып жатқан кешен­ді өзгерістердің басты бағыты кедендік рәсімдерді оңтайлан­дыру және жеделдету, әкімшілік кедергілерді жоюға бағытталған кеден қызметі мен кәсіпкерлік арасындағы өзара әрекеттесудің толыққанды жүйесін дамыту болып табылады. Бұл бағытта талай игі шаралар жүзеге асып жатыр. Соның бірі деп кеден саласында кәсіпкерлер үшін қажетті уәкілетті экономикалық оператор деген жаңа оңтайландыру жолын айта аламыз. Дегенмен, осы мәселе бойынша бізге хабарласып жатқан кәсіпкерлер де аз емес.

Сенбі, 30 маусым 2012 7:55

Бүгінгі таңда кеден саласында жүзеге асырылып жатқан кешен­ді өзгерістердің басты бағыты кедендік рәсімдерді оңтайлан­дыру және жеделдету, әкімшілік кедергілерді жоюға бағытталған кеден қызметі мен кәсіпкерлік арасындағы өзара әрекеттесудің толыққанды жүйесін дамыту болып табылады. Бұл бағытта талай игі шаралар жүзеге асып жатыр. Соның бірі деп кеден саласында кәсіпкерлер үшін қажетті уәкілетті экономикалық оператор деген жаңа оңтайландыру жолын айта аламыз. Дегенмен, осы мәселе бойынша бізге хабарласып жатқан кәсіпкерлер де аз емес. Жалпы, бүгінде “Уәкілетті экономикалық оператор” мәрте­бесіндегі сыртқы экономикалық қызмет қатысушылары тауарлар мен көлік құралдарын белгілі бір кеден ресімдеріне мәлімдеу мен кедендік тазартуда артықшы­лық­тарды пайдалануда. Аталмыш мәртебені алу және бизнесті дамытуда оны тиімді пайдалану жолдары туралы бізге Қаржы министрлігі Кедендік бақылау комитетінің маманы Гауһар Ақ­басова жан-жақты айтып берді.

Оның әңгімелеуіне қарағанда, уәкілетті экономикалық оператор бұл арнайы оңтайландырылған ресімдерді тәжірибе жүзінде қол­дануына мүмкіндік берілетін тұлғалар санаты болып табылады. Арнайы кедендік оңтайлан­дыруларды пайдалану кедендік операцияларды жүзеге асыруда қаржылық және уақыт шығын­дарын азайтып, логистикалық тораптарды жетілдіруге жол ашады.

Уәкілетті экономикалық оператор мәртебесі заңды тұлғаға өкілетті экономикалық операторлар тізіміне енгізу туралы куәлік берілу арқылы жүзеге асырылады. Уәкілетті экономикалық операторлар институты ұғымы – кедендік рәсімдерді оңтайлан­дыру және біріздендіру туралы Халықаралық конвенция және қауіпсіздік пен әлемдік сауданы жеңілдету стандарттарының ұсы­ны­сына сәйкес, Отандық кеден заңнамасына енгізілген жаңалық болып табылады. Аталмыш ұғым­ның болуы және сыртқы экономикалық қызмет қатысушы­ларына бұл мәртебені беру кеден қызметі мен бизнес-қоғамдас­тығы арасындағы әріптестіктің негізгі нышаны екені анық.

Қазіргі уақытта Қазақстанда мұндай мәртебе 18 заңды тұлғаға, яғни телекоммуникацияға қызмет көрсету құрал-жабдықтарын, құ­рылыс материалдарын, шина, фар­мацевтикалық тауарларды, азық-түлік, қағаз өнімдерін шетелден әкелетін ірі және орта кә­сіпкерлік субъектілеріне беріл­ген. Осы кәсіпкерлердің пікірін­ше, мұндай мәртебенің болуы олардың сыртқы экономикалық қызметтерін айтар­лықтай жеңіл­де­теді. Бюджет түсімдерінің ұлғаюы мемлекет үшін де пайдалы, әрі кеден мен бизнес арасын­дағы өзара тиімді әріптестікті нығайта түседі.

Сонымен қатар, аталған мәр­тебені алу арқылы берілетін жеңіл­діктер де бар екенін кәсіп­керлер жасырмайды. Атап айт­қанда, кедендік декларацияны ұсынуға дейін тауарларды жібе­ру, уақытша сақтау құқығы және оператордың жеке аумағында тауарларды жіберуге байланысты кедендік операцияларды жүзеге асыру мүмкіндігі, кедендік транзит кезінде кедендік баж және салықтарды төлеуді қамтамасыз ету қажеттігінің болмауы дейді. Кедендегі мұндай жеңілдіктердің бизнеске берері көп.

Бұл – кедендік шекараны өту рәсімін жеделдету, қаржылық шығындарды азайту, тауарларды тауарлар декларациясын ұсынуға дейін пайдалану, алдын ала және электронды декларациялау рәсі­мін қолдану мүмкіндігі, жүк­тердің сақталуын қамтамасыз ету, құжат айналымын қысқарту, құжаттар жиынтығының аздығы және ең бастысы, кедендік баж және салықтарды төлеу мерзі­мінің 40 күнге дейін ұзартылуы. Өтініш және аталмыш құжат­тарды ұсынғаннан кейін Комитет өкілетті экономикалық операторлар тізіміне тұлғаны енгізу туралы куәлікті беру бойынша немесе себебін түсіндіру арқылы аталмыш куәлікті беруден бас тарту туралы шешім шығарады.

Александр ТАСБОЛАТОВ,

«Егемен Қазақстан».