Қаржы полициясынан қолы тазалар қорықпайды
Жұма, 20 шілде 2012 7:43
Құдай біледі, «қаржы полициясы» дегенде кез келген жанның жүрегі дір ете қалатын шығар, сірә… Шынын айту керек, тек қаржы полициясы ғана емес, жалпы погон тағып, фуражка, арнайы әскери форма киген ағайындарда әйтеуір бір сұс бар ғой… Үстіндегі киімінің құдіреті ме, жоқ, әлде қолындағы билігінің құдіреті ме, түсініксіз.
Жұма, 20 шілде 2012 7:43
Құдай біледі, «қаржы полициясы» дегенде кез келген жанның жүрегі дір ете қалатын шығар, сірә… Шынын айту керек, тек қаржы полициясы ғана емес, жалпы погон тағып, фуражка, арнайы әскери форма киген ағайындарда әйтеуір бір сұс бар ғой… Үстіндегі киімінің құдіреті ме, жоқ, әлде қолындағы билігінің құдіреті ме, түсініксіз.
Жалпы, сіздің қаржы полициясы туралы ойыңыз қалай? Қаржы полициясынан неге қорқасыз? «Ойбай, ана бір шенеунікті кабинетінде пара алып жатқан жерінен ұстапты», «Пәленше түгеншеге пара беріп жатқан жерінен ұсталып қалыпты». Жасыратыны жоқ, біздің қаржы полициясы туралы түсінігіміз, білетініміз, пайымымыз осы төңіректе ғана. Олардың жұмысының сырын, қырын, мақсатын терең түсінбегендіктен қаржы полициясының өзі түгілі, қарасынан қорқамыз.
Жоқ, сіз қателесесіз. Қаржы полициясы сіз ойлағандай қорқынышты емес. Қаржы полициясы органдарының басты міндеттерінің бірі – мемлекетіміздің экономикалық қауіпсіздігін қамтамасыз ету, кәсіпкерлердің заңдық құқықтарын қорғау, қаржылық, жемқорлық сипаттағы қылмыстарды тергеу, ашу, жолын кесу. Жеке және заңды тұлғалардың арыз-шағымдарын мұқият қарау, оларды сапалы шешу болып табылады. Нақтырақ айтқанда, ел ең алдымен қаржы полициясын тек жемқор ұстаушы емес, бизнестің қорғаушысы, қалқаны, қамқоршысы деп сезінуі қажет.
Статистикаға сөз берсек, осы жылдың 6 айында департаментке 2973 арыз-шағым түсіпті. Оның 92-сі кәсіпкерлерден, 158-і ұжымдардан түскен. Оңтүстік Қазақстан облысы қаржы полициясы құжат айналымын қамтамасыз ету бөлімінің бастығы А.Көкебаеваның айтуына қарағанда, арыздардың көбісінде алаяқтық мәселесі айтылған. Облыстық қаржы полициясы әр сенбі сайын аудан-ауылдарға шығып, тұрғындармен кездесу өткізеді. Тіпті, сол кезде де елдің көбісі алаяқтарға алданып қалғанын айтып арызданады екен. Яғни, бүгінде алданбаған адам аз. 2011 жылы алаяқ Ж.Әлімованың бүкіл елді шулатқаны бәріміздің есімізде. Ол заңсыз кәсіпкерлікпен айналысып, 2008 жылы «Әлем Қазына» микрокредиттік ұйымын ашады. Өзі құрылтайшы әрі өзі директор Ж.Әлімова өзгенің дүниесін алдап алу мақсатында қылмыстық кесте жасап, «қаржылық пирамида» құрған. Сөйтіп, қаншама адамның қаржысын, қаншама жандардың тірнектеп жиған дүниесін жоқ қылып, обалына қалды. Бұл мәселеге қаржы полициясы араласпағанда алаяқ әйелдің қай жерге дейін тайраңдап, қаншама жанның көз-жасына қаларын бір құдай біледі.
Елдің бәрінің құқықтық сауаты жоқ қой. Әрі бұл өмірде оңай олжаға кенелгісі келетіндер де көп. Біздіңше халық қаржы полициясын анадайдан айналып жүрмей, есігін емін-еркін ашып: «Мен мына ұйымға ақша салайын деп едім, пайдаға қарық боласың деп жатыр, бұл ұйым қаншалықты заңды?» немесе: «Мен мынадай бір тірлік бастайын деп едім, мынандай кедергілер болып тұр, бұл заңға сәйкес пе?» деп ақыл-кеңес сұраса, көп алаяқтың жолы о бастан-ақ кесілер еді. Жақында жергілікті газеттің бірінен Шымкент қаласының тұрғындары Н.Өмірбекова мен А.Әзімханқызының қаржы полициясына рахмет айтқан шағын хабарына көзім түсті. Бұл екеуі де алданып қалған, әйтеуір қаржы полициясының арқасында алаяқтық фактілері ашылып, бәрі өз орнына келіпті. Кейінірек қаржы полициясындағы мамандардан білгенім, департаментке мұндай алғыс айтушылар көп екен.
Бәріміз «қорқатын» қаржы полициясы қайырымдылық жасаудан да кенде емес. Оңтүстік Қазақстан облысы қаржы полициясының бастығы Серікбай Ерімбетовтің бастамасымен бұл ұжым Шымкент қаласындағы №3 балалар үйін өз қамқорлықтарына алыпты. «Жетім көрсең, жебей жүр» деген Наурыз мерекесінде, одан Балаларды қорғау күні ұжым мүшелері осы мекемеде болып, түрлі сый-сияпаттар жасапты. Бара салып, базарлығын беріп, «осымен миссиямыз бітті» дегендей көзбояушылық жасап, қайтып кетпестен, қызметкерлер балалармен отырып ас ішіп, әңгімелесіп, ойындарын, өнерлерін тамашалап, жаны жабырқау бүлдіршіндерге бір күндерін арнапты.
Яғни, қаржы полициясы сіз ойлағандай әзірейіл емес. Әрине, «бес саусақ бірдей емес», бұл салада да қызметін пайдаланып, қалтасының қамын ойлайтындар жоқ деп айта алмайсың. Ондай жемқорлардың тірлігі әйтеуір бір әшкере болатынын өмірдің өзі көрсетіп жүр. Қаржы полициясынан қолы таза, жүрегі ақ, малын емес, алдымен арын ойлайтын адамдар ғана қорықпайды.
Оралхан ДӘУІТ,
«Егемен Қазақстан».
Оңтүстік Қазақстан облысы.
