Кештеу болса да мәлім болған оқиғаға байланысты көңілді осылай жұбатып алғанымызбен, өгей ананың қатыгездігі, қорғансыз қыздардың денесіне ғана емес, жүрегіне түскен жара туралы ақпараттар еңсені езіп, ауыр ойға жетелейді. Иә, әлеуметтік желіде ақпарат жарияланбай тұрып, Түркістан облысы Жетісай ауданында мектеп мұғалімдері оқушылардың денесінен ісік пен ұрып-соғу іздерін байқап, полиция қызметкерлерін шақырды. Балаларды жәбірлеген әйел бірден полицияға жеткізілді. Әлеуметтік желі белсендісі таратқан ақпаратқа қарағанда, апалы-сіңлілі – 16, 14 және 12 жастағы қыздардың көрмеген қорлығы қалмаған. Өгей анасы, 1991 жылғы Жұлдыз кәмелет жасына толмаған қыздарды ұрып-соққаны аздай, жантүршігершік тәсілмен денелеріне жарақат салып, азаптаған. Оның мұндай қатыгездікке не себепті барғаны әзірге беймәлім. Өгей ана Жұлдыз 2016 жылы жергілікті азаматқа тұрмысқа шыққан. Жәбірленген үш қыз азаматтың алғашқы әйелінен туған. Аудан әкімінің кеңесшісі Айдар Сейдәзімнің айтуынша, отбасының әлеуметтік жағдайы жаман емес. Отағасы көлік жөндеумен айналысады. Өгей ананың балаларды ұрып-соғуы әкелері үйде жоқ кезде болған көрінеді. Көршілері де күдіктенер ештеңе байқамаған. 2017 жылы олардың арасында бір ұл дүниеге келген. Туыстарының айтуынша, осы кезден бастап келіннің мінез-құлқында өзгерістер байқалыпты. Бірақ оған мән бермеген. Жұлдыз қыздарды ұрып-соғып және оны ешкімге айтпауды ескертіп отырған. Қыздар бұл туралы ешкімге тіс жармаған. Оған қорқыныш пен қорғансыздық қана емес, «әкеміз тағы да ажырасып кетпесін» деген жанашырлық ой да себеп болған сияқты.
Иә, ананың жылы алақанын, мейірімін аңсаған, сағынған, армандаған қыздар өздерінің бауыры, екі жасар інісінің ертеңін ескерген де болар. Бауырының толық отбасында тәрбиеленгенін қалаған шығар. Бірақ өгей ананың қатыгездігі шектен шықты. Қыздардың туған анасы бүгінде Шымкент қаласында тұрып жатқан көрінеді. Естуімізше, екі арада байланыс үзілген. Қыздарына қарайламаған ананы қатыгез немесе мейірімсіз деп кінәлауға қақымыз жоқ. Ал отбасындағы жағдайды қыздарының қабағына қарап-ақ білуге болатын отағасының осы уақытқа дейін ештеңе білмей келгені көпшілікті таңғалдырып отыр. Өгей ана қыздардың денесінің көзге көріне бермейтін жерлерін көгертіп келгені айтылуда. Әкелері байқамаған болар, бірақ қыздарымен жиі әңгімелессе, қасында көбірек болса бірден-ақ аңғарар еді. Бұл да бүгінгі ата-ана мен балалар арасындағы алшақтықты білдіреді. Қыздардың ата-әжелері де алыста емес. Соңғы жылдары ерлі-зайыптылардың ажырасу деректерінің арта түсуі де ой салады. Иә, біз кінәліні іздеп отырған жоқпыз, жұртты дүрліктірген осы оқиғаның себебін білсек дейміз.
Осы оқиғаға байланысты өткен баспасөз мәслихатында Түркістан облыстық полиция департаменті баспасөз қызметінің жетекшісі Салтанат Қаракөзова өгей анасының қатыгездікпен балаларын ұрып-соғып, дене жарақаттарын салу арқылы зорлық көрсеткені анықталғанын мәлім етті. Қазіргі таңда балалар Жетісай аудандық орталық ауруханасында дәрігерлер қарауында. Олардың денсаулығы мен өміріне еш қауіп жоқ. Аталған оқиғаға қатысты пікір білдірген Ішкі істер министрлігінің ресми өкілі Нұрділдә Ораз мәселені министр Ерлан Тұрғымбаев өз бақылауына алғанын хабарлады. Мәселенің мән-жайын анықтау үшін арнайы комиссия құрылды. Білім және ғылым министрі Күләш Шәмшидинованың тапсырмасымен министрдің кеңесшісі Раиса Шер жедел түрде Түркістан облысына аттанған.
Түркістан облысы
