– Біздің саяси ұйым Елбасы анықтап берген жаңғыру жұмыстары мен еліміздің қазіргі даму қарқынының әрі қарай сақталуы үшін жұмыс істейді. Тұңғыш Президентіміздің тікелей бастамасымен қолға алынған ауқымды экономикалық, әлеуметтік, саяси және рухани жаңғырулар партия мен мемлекетіміздің алдағы жұмыс бағыттарының негізгі басымдығы болып қала береді, – деді облыс әкімі, Nur Otan партиясы облыстық филиалының төрағасы Архимед Мұхамбетов.
Конференцияда партия мүшелері А.Байтұрсынов атындағы Қостанай мемлекеттік университетінің ректоры, облыстық мәслихат депутаты Алма Досжанова, партияның Соколов-Сарыбай кен өндіру бірлестігі аудандық филиалы төрағасының орынбасары Александр Макаренко сөз сөйледі. Мәселен, А.Макаренко еліміз өндірісінің көшін бастайтын Соколов-Сарыбай кен өндіру бірлестігінің үлкен ұжымы Мемлекет басшысы Қасым-Жомарт Тоқаевтың дер уақытындағы шешімін қызу қолдап отырғанын айтты.
Nur Otan партиясының ХVIII съезінде партия Төрағасы Нұрсұлтан Назарбаев тапсырған «Халыққа көмек», «Бақытты отбасы», «Ауыл – ел бесігі», «Құтты мекен» жобалары өңірлерді әлеуметтік-экономикалық дамытудың тетігі. «Құтты мекен» жобасы бойынша биыл облыс өңірінде жергілікті маңызы бар 531 шақырым жол жөндеуден өтеді. Мұнда жолдарды негізінен орта жөндеуге басымдық беріледі. Осы жұмыстардың 50 пайызы республикалық, 50 пайызы жергілікті бюджеттен қаржыландырылады.
– Ауылдық жерлерді ауыз сумен қамтамасыз ету жоба бойынша қолға алатын өте маңызды жұмыс болып отыр. Облыста барлығы 548 ауылдық елді мекен бар. Соның 172-і ғана орталықтандырылған ауыз су құбырымен қамтамасыз етілген. 376 елді мекен орталықтандырылмаған ауыз суды пайдаланады және тасып беріледі. 2020 жылға дейін елді мекендерді ауыз сумен қамту үшін 22 жоба жүзеге асырылады, оған биыл 7,8 миллиард теңге қаржы бөлінді. Биыл 19 ауылға орталықтандырылған ауыз су құбыры тартылатын болады, – деді партияның облыстық филиалының төрағасы, облыс әкімі Архимед Мұхамбетов.
