Бендидің мықтылары ауылда
Дүйсенбі, 12 наурыз 2012 7:53
Бүгінгі таңда отандық спорт индустриясын дамытудың уақыты жеткені анық көрініс табуда. Қазіргі Үкімет оны дамыту бастамаларына тиісті қолдау шараларын қарастыруға дайын екенін көрсетіп отыр. Жыл басында Спорт және дене шынықтыру істері агенттігінің кеңейтілген алқа мәжілісінде вице-премьер Е.Орынбаев өз сөзінде: «Агенттіктің өзі әрбір өңірде спортта дарынды жастарды анықтаудың тиімді жүйесін ойластырып алғаны жөн. Ондай балаларды бірден тауып, олардың қабілет-дарынын дамыту үшін қажетті барлық жағдайларды жасау қажет. Болашақта сол спортшылар ел намысын қорғайтын болады», деген болатын.
Дүйсенбі, 12 наурыз 2012 7:53
Бүгінгі таңда отандық спорт индустриясын дамытудың уақыты жеткені анық көрініс табуда. Қазіргі Үкімет оны дамыту бастамаларына тиісті қолдау шараларын қарастыруға дайын екенін көрсетіп отыр. Жыл басында Спорт және дене шынықтыру істері агенттігінің кеңейтілген алқа мәжілісінде вице-премьер Е.Орынбаев өз сөзінде: «Агенттіктің өзі әрбір өңірде спортта дарынды жастарды анықтаудың тиімді жүйесін ойластырып алғаны жөн. Ондай балаларды бірден тауып, олардың қабілет-дарынын дамыту үшін қажетті барлық жағдайларды жасау қажет. Болашақта сол спортшылар ел намысын қорғайтын болады», деген болатын. Яғни, бұл – ауылдық жерлерде бұқаралық дене шынықтыру, спорт жұмыстарын ұйымдастыру және ауыл спортшыларының спорттық шеберліктерін арттыру мақсатында Үкімет тарапынан жан-жақты қолдау болады деген сөз.
Ақтоғай спорты дегенде ең алдымен ауызға волейбол мен допты хоккей келетіні сөзсіз. Өткен ғасырдың 70-ші жылдарында мұз айдынында жасындай жарқылдаған Ж.Қорабаев, А.Ноғаев, М.Төлегенов сияқты ағаларымыздың сара жолын кейіннен Қ.Хасенов, К.Люпп, А.Кәрімханов, М.Сейсепов, Е.Омарбаевтар жалғастырып, бүгінгі толқынға аманаттап отыр. Жылда дәстүрлі түрде өтетін Ж.Қорабаев атындағы жарыс және мереке күндері өтетін ойындарда ауыл жастары бендидің қыр-сырын толықтай меңгеріп, мұз айдынында әдемі, сапалы ойындарымен көпшілікті таңқалдыруда. Ауыл балалары ешқандай тәжірибесіз бенди ойынында ойнақтауды ешкімнен де үйренбей, саңлақ ойыншылардан кем еместіктерін анық байқатуда.
Биылғы жылдың басында Алатаудың бөктерінде өткен допты хоккейден әлем біріншілігінде атой салған Қазақ елінің құрамасы қоржынға қола жүлдені салды. Мақтандық, қуандық. Бірақ, Қазақ елі деп отырған құрамамызда жалғыз қазақ жігітінің жүргені намысты қамшылайды екен. Кілең Ресей біріншілігінде ойнайтын, сонда тұратын жігіттерден жасақталған құрамада ауылдан шыққан қазақ жастарына орын бұйырмағаны, әрине, өкінішті. Ондай жастар жоқ деп айтуға мүлде болмайды. Бар, жеткілікті олар. Бірақ, соларды көретін көздер болмай тұр.
Ертеде спорт селекционерлері ауыл-ауылды аралап, балалардың мүмкіншілігін қарап, оларға бағыт-бағдар беріп, дарыны асып жатса, спорт-интернаттарға алып кетіп жататын. Бүгінгі күнде ондай жұмыс мүлде жүргізілмейді. Ауыл балаларының барлығының ондай оқу орындарына барып білім алуларына мүмкіншіліктері келе бермейтіні сөзсіз. Жоғарыда айтып өткенімдей, агенттік жер-жерлерде нақты жұмыстар жүргізетіні құр сөз жүзінде ғана болып қалмаса деймін. Алдағы уақытта дарынды жастарымызды көруге Алаштың үш арысының атамекені – Ақтоғай өңіріне бенди ойынының майын ішкен білікті мамандарды шақырамын, келіп мүмкіндігінше оларға қолдау көрсетеді деп сенемін.
Абылай АМАНЖОЛОВ.
Қарағанды облысы,
Ақтоғай ауданы.