«Астана қыраны» атанған Ғани Сейділдаев

Сәрсенбі, 11 шілде 2012 7:16

8 шілдеде Астанада қала әкімдігі мен Туризм, дене тәрбиесі және спорт басқармасының ұйымдастыруымен қазақ күресінен «Астана қыраны» жарысы өтті.

Осы күндері қыркүйекте жалауын көтеретін «Қазақстан барысы» турнирінің іріктеу жарыстары өңірлерде екі айдан бері жалғасып келе жатқаны белгілі. Жексенбі күні Астанада Балуан Шолақ балуанның ізін басқан  астаналықтар арасында өткен бәсекеге  78 балуан қатысып, солардың 32-сі түйе балуандардың сайысына жетті.

Сәрсенбі, 11 шілде 2012 7:16

8 шілдеде Астанада қала әкімдігі мен Туризм, дене тәрбиесі және спорт басқармасының ұйымдастыруымен қазақ күресінен «Астана қыраны» жарысы өтті.

Осы күндері қыркүйекте жалауын көтеретін «Қазақстан барысы» турнирінің іріктеу жарыстары өңірлерде екі айдан бері жалғасып келе жатқаны белгілі. Жексенбі күні Астанада Балуан Шолақ балуанның ізін басқан  астаналықтар арасында өткен бәсекеге  78 балуан қатысып, солардың 32-сі түйе балуандардың сайысына жетті.

Жарыстың ашылу салтанатына ұлттық спорттың жанашырлары – Спорт және дене тәрбиесі істері агенттігі төрағасының орынбасары Елсияр Қанағатов, «КТК» теле­ар­насының бас ди­рек­торы, «Қазақ­стан барысы» жарысы идеясының авторы Арман Шораев пен қала­лық Туризм, дене тәрбиесі және спорт басқар­масының бастығы Айталап Қорғамбаев қатысты.

Ресми бөлімінен кейін жарыс басталып та кетті. Алдымен 1/16 сайыстары өтті.  Спортшылар өз қарсыластарын жеребе бойынша анықтады. Түйе балуандардың са­йысын бастаған Қазақстан Респуб­ликасына еңбек сіңірген спорт шебері, Азия чемпионы, екі дүркін әлем чемпионы Ғани Сейділдаев алғашқы кезеңін Әлі­бек Байсеновпен өткізіп, оны 19-шы секундта-ақ таза жеңді. Ал екінші ауыр салмақтағы балуан Қазақстан Республикасының спорт шебері, Қазақстан мен Азия чемпионы атанған Дархан Би­жанов алғашқы кездесуінде жамбас ұпаймен же­ңіске жетті.  Ширек финалда Ғани Сейділдаев Төлеген Жетпіспаев­пен боз кі­лем­де 23 секунд қана өткізіп, бірінші қолданған әдістен кейін таза жеңсе, жарыстың бұл кезе­ңін Дархан Бижанов та уақы­ты­нан бұрын озып, 1/2 финалға жолдама алды.

1/4 финалға жеткен төрт жұп­тың ішінде сайыстың ең жас қа­тысу­шылары да бір-бірімен кез­десті. 20-жасар Айбат Сейтен (ла­қап аты – «Қыпшақ») 18 жасар Әлібек Зекеновпен (лақап аты – «Темеш») белдесіп, жамбас әдісі­мен жеңген Әлібек жартылай фи­налға шықты. Мұнда жас жігіт тә­жірибелі Дархан Бижановтан ұты­лып, қола жүлдеге ие болды. Ғани Сейділ­даев болса, финалға шығу үшін Азат Кенжебековті таза жеңді.

Сонымен, екі дос балуан қай­та финалда кездесті. Ғани да, Дархан да өзіне бір-бір ұпайдан тек негізгі уақыттың аяқталуына жарты минут қалғанда ғана қоса алды. Қосымша уақыттағы белдесуде жеңіске жетіп, «Астана қыраны» атағына балуан Ғани Сейділдаев ие болды.

Жеңімпаздардың барлығына қо­мақты қаржылай сыйақы тартылды. «Жау жүрек» лақап атын жа­мылған Ғаниға 1 миллион тең­ге бе­ріліп, иығына алтынмен қап­талған шапан жабылып, «Алтын белбеу» тағылды. Екінші орынды иеленген «Ерке бала» Дархан Бижановқа 300 мың теңге қаржы­лай сыйақы беріліп, күміспен қапталған шапан кигізілді. Осы екі балуан енді қыркүйекте Астанада жалауын көтеретін «Қазақ­стан барысы» дүбірлі додасында елорданың намысын қорғамақ­шы. Үшінші орынға ие болған Азат Кенжебеков пен Әлібек Зе­ке­новке әрқайсысына диплом мен 100 мың теңгеден сыйақы берілді.

– Финалда қарсыласым Дарханды жақсы танимын, бірге жат­ты­ғып, бір-біріміздің қылықта­ры­мыз­ды әб­ден білеміз, – деді жарыстан кейін «Ас­тана қыраны» Ғани Сей­ділдаев. – Сондықтан болар, сайысты қо­сым­ша уақыт­қа дейін жет­кіз­генбіз. Бұ­ған де­йінгі қарсы­ласта­рымнан оңай өтсем, финалда, әрине, қиындау болды. Қарсыла­сым өте мықты балуан. Қазір же­ңісіме өте қуанышты­мын. Қа­зақ­тың төл спортын қолдап, жарысты жоғары дәре­жеде өткізген ұйым­дас­­тырушыла­рға – қалалық спорт басқарма­мызға ал­ғысымды біл­діргім келіп отыр. Енді, «Қазақ­стан барысы» жарысына дайындаламыз.

Жарыс көрермендердің көңіл­дерінен де шықты. Тартысты белдесулерді тамашалаған аста­на­лық­тар мен қала қонақтары ұйымдастырушылар бекіткен ұтыс ойынына да қатысып, көбі үйлеріне бағалы сыйлықтармен қайтты. Ұялы телефондар, шаң­сорғыштар, микротолқынды пештер, ЖК-теледидар, тоңазытқыш, велосипедтер ойнатылды.

Еліміз үздік балуандарының басын қосатын «Қазақстан барысы» жарысы Астана қаласында қыркүйек айында өтпек.