Осы бағытта қандай жұмыстар атқарылды? Алда қандай жұмыстар жоспарланған? Кеше Орталық коммуникациялар қызметінде өткен арнайы брифингте Энергетика министрлігінің басшылығы осы туралы баяндады.
Бүгінде Қазақстанның барлық электр стансаларының жалпы қуаты 21 ГВт-ға тең. «Қазақстандық күн энергетикасы қауымдастығы» ЗТБ директорлар кеңесінің төрағасы Нұрлан Қапенов осылай деді. Оның айтуынша, 2018 жылдың қорытындысы бойынша әлемдік күн энергетикасының белгіленген қуаты 500 ГВт-дан асты. 2018 жылдың ішінде 100 ГВт-дан астам қуат өндіретін фотоэлектрлік стансалар салынды.
Н.Қапеновтің айтуынша, ғаламшарда электр қуатын өндіру үшін күн энергиясын пайдаланатын 90 ел бар. 32 елде 1 ГВт-дан астам қуат өндіретін стансалар орнатылған. Күннен энергия өндіретін нысандардың қуатын 300-ден 500 ГВт-ға көбейтуге 2 жыл уақыт кетіпті. Салыстыру үшін айтар болсақ, АЭС-тердің қуаты шамамен 400 ГВт-ны құрайды. Беделді әлемдік сарапшылар 2019 жылы әлемде 129 ГВт фотоэлектрлік күн электр стансалары салынады деген болжам жасап отыр.
Былтыр елімізде өндірілген «жасыл» энергияның көлемі 1,35 млрд кВт-ға жетіп, электр энергиясының жалпы көлеміндегі үлес салмағы 1,27 %-ды құраған болатын. Алдағы уақытта бұл көрсеткіш қарқынды түрде өсуі тиіс.