Қоғам • 14 Мамыр, 2019

«Баламекен» жобасы басталды

Nur Otan партиясының XVIII съезінде көп балалы аналар мен аз қамтамасыз етілген отбасыларға мемлекеттік бағдарламалар арқылы үй-жай беру мәселесі көтеріліп, аймақ басшыларына тапсырма берілген болатын.

Бақтияр ТАЙЖАН

Қызылорда облысында Тұңғыш Президенттің тапсырмасын тиянақты орындау үшін облыстағы баспанаға мұқтаж көп балалы отбасыларды анықтау мақсатында жұмыс комиссиясы құрылды. Қазіргі таңда комиссия Қызылорда қаласындағы 150 отбасын анықтаған.

Облыста өткен жиында көп балалы отбасыларды тұрғын үймен қамту үшін Болат Өтемұратов қорының қайырымдылық көмегі есебінен тұрғын үйдің бір бөлігін салу туралы мәселе талқыланды. Соның нәтижесінде, жергілікті бюджет есебінен – 50 отбасы, қор есебінен, қалған 100 отбасы баспанамен қамтамасыз етіледі.

Баспананың 1 шаршы метрінің құны 70 мың теңгені құрайды. Күзгі қара суыққа ұрынбау үшін тұрғын үй құрылысы 1 қыркүйекке дейін аяқталады деп жоспарланып отыр. Осы мақсатқа байланысты Болат Өтемұратов қоры тарапынан тұрғын үйлерді салу бойынша «Баламекен» жобасының жүзеге асырылуына 450 миллион теңге бөлінбек.

– Әкімдік өз тарапынан барлық инженерлік инфрақұрылымдар – электр, газ, су, телефон байланысы мен автожолдар құрылысын аяқтауға, сондай-ақ әрбір үйге 6 сотық жер телімін бөлуге кепілдік береді, – дейді облыс әкімі Қырымбек Көшербаев.

Бүгінде облыс бойынша тұрғын үйге мұқтаж азаматтар саны – 27 906 адам. Оның ішінде халықтың әлеуметтік жағынан осал топтары санаты бойынша 14 074 адам кезекте тұр, олардың 2038-і – көп балалы отбасы.

Қызылорда облысының көп балалы және әлеуметтік жағынан аз қорғалған отбасыларға үй салып беру тәжірибесі Премьер-Министр Асқар Маминнің жұмыс кеңесінде кеңінен талқыланғанын айта кетейік. Республикада бес жыл ішінде 28 мың пәтер беру көзделуде. Нарық жағдайында көзсіз тәуекелге бару оңай емес. Мұндайда үй берудің ең тиімді тетіктері пайдаланылуы керек. Премьер-Министр А.Мамин әлеуметтік жағынан аз қорғалған отбасыларға Қызылорда облысының оң тәжірибесін пайдалануды тапсырды.

Жақсыдан үйрену – табысқа жетудің кілті. Қалай болғанда да, Қазақстанда үйсіз-күйсіз жүрген отбасылар пәтермен қамтылуы керек. Қайырымды жандар көмектесіп жатқанымен, үйге қолы жеткен әлеуметтік жағдайы төмен отбасылар санаулы ғана. Енді осы мемлекеттік бағдарламалар тиімді жұмыс істесе, 30 мыңға жуық отбасының кеудесінде ертеңге деген сенім нығаяды. Ал бұл – үлкен қуаныш.

Қызылорда облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз