Аймақтар • 14 Мамыр, 2019

Түркістан облысының әкімі спортшыларға құрмет көрсетті

781 рет көрсетілді

Сәуір айында Түркияның Анталия қаласында өткен тоғызқұмалақтан Әлем чемпионатында түркістандықтар сәтті өнер көрсеткен болатын.

Жиырмаға жуық елден спортшылар қатысқан дүбірлі бәсекеде Түркістан облысының спортшылары 2 алтын және 2 күміс медальға қол жеткізді. Сондай-ақ Тайландта өткен  бокстан ересектер арасындағы Азия чемпионатында түркістандық Бек Нұрмағанбет жеңімпаз атанды.

Бұл өңір спортшыларының соңғы айлардағы ғана жетістігі. Ел абыройын асқақтатып жүрген спортшылар мен бапкерлер Түркістан облысының әкімі Өмірзақ Шөкеевпен кездесті.  Олардың қатарында бокстан ҚР еңбегі сіңген жаттықтырушы Мырзағали Айтжанов, тоғызқұмалақтан ҚР еңбегі сіңген жаттықтырушы Камила Көпбаева, бокстан ҚР халықаралық дәрежедегі спорт шебері, Азия чемпионы Бек Нұрмағанбет, тоғызқұмалақтан ҚР еңбегі сіңген спорт шебері Әсел Далиева, тоғызқұмалақтан ҚР халықаралық дәрежедегі спорт шебері, Әлем чемпионы Лина Каримова және тоғызқұмалақтан спорт шебері, Әлем чемпионатының күміс жүлдегері Саят Жандарбек бар. Облыс әкімі еліміздің абыройын асқақтатқан спортшылар мен білікті жаттықтырушыларға құрмет көрсетіп, сый-сияпат жасады. Өз кезегінде спортшылар өңір басшысына ризашылықтарын білдіріп, алдағы байрақты бәсекелерде жеңісті жолды жалғастыруға күш салатындарын жеткізді.

 

Түркістан облысы

 

Соңғы жаңалықтар

Ұқсас жаңалықтар