Бұл туралы Өңірлік коммуникациялар қызметінде Ордабасы ауданының әкімі Қайрат Жолдыбайұлы мен облыстық денешынықтыру және спорт басқармасының басшысы Полат Қырықбаев мәлімдеді. Дәстүрлі турнир 54 мемлекетте күреске түсіп, 48 медаль жеңіп алған, жауырыны жерге тимеген қазақ халқының тұңғыш кәсіпқой балуаны, орасан күштің иесі, күрестің бірнеше түрінен әлем чемпионы Қажымұқан Мұңайтпасұлын ұрпақ жадында жаңғыртып отыруға бағытталған. «ҚР Тұңғыш Президенті Нұрсұлтан Назарбаев Мәңгілік ел болу мұраты бабалардың ерлігі, бүгінгі буынның ерен істері және жас ұрпақтың жасампаздығы арасында сабақтастық болса ғана жүзеге асатынын үнемі айтып келеді. Тарихта есімі алтын әріптермен жазылған ұлы тұлғаларды дәріптеу – осы сабақтастықты жалғастыру болмақ. Қажымұқан Мұңайтпасов – барша қазақтың мақтанышы. Оның ерлігі, елдің атын әлемге танытуға сіңірген еңбегі ұшан теңіз. Өмірінің соңғы күндерін Ордабасыда өткізіп, осы қасиетті мекенді мәңгілік тұрағы еткен балуанды бүгінде Ордабасыдан бөле жара сөз ете алмаймыз. Күш атасының асыл сүйегі жатқан ауданымыздан әлемдік, халықаралық жарыстарда топ жарып жүрген балуандар Ұлас Момынов, Нұрлан Асылов, Дәулет Байжігітов, Қуат Байқожаев, Елтай Сыдықов, Оңғар Үндемесов, Оңдыбай Үндемесов, Сейдахмет Қонақбаев сынды жігіттер Қажымұқанның ізімен жүрді», деді Ордабасы ауданының әкімі.
Бүгінде ауданда Қажымұқандай болсам деген мақсатпен спорттың осы түрімен айналысып жүрген жастар көп. Ал Жұманазар Ерсұлтанов, Әділжан Ыстыбаев, ағайынды Ғұмар, Ғұсман Қырғызбаевтар, Абзал Арыстанбек талай дүбірлі додада топ жарып, Ордабасы өңірінің мерейін тасытып жүр. Айта кетелік, Ордабасы жерінен ҚР еңбегі сіңген 6 жаттықтырушы, 3 спорт қайраткері, күрестен 100-ден аса спорт шебері, бірнеше халықаралық дәрежедегі спорт шебері, Әлем біріншіліктерінің, Азия чемпионаттарының жеңімпаздары мен жүлдегерлері шыққан.
Түркістан облысы
