Аймақтар • 17 Мамыр, 2019

Түркістан облысында 21 608 отбасыға 4,7 млрд теңге АӘК төленді

Түркістан облысында бүгінгі таңда 24 748 отбасыға атаулы әлеуметтік көмек тағайындалып, 21 608 отбасыға 4,7 млрд.теңге төленген. Сонымен қатар, І тоқсанда қайта қаралып, 15 422 отбасына атаулы әлеуметтік көмек көбейтіле берілген.

Ғалымжан ЕЛШІБАЙ

Бұл туралы Өңірлік коммуникациялар қызметінде өткен брифингте облыс әкімінің орынбасары Ербол Садыр мәлімдеді. Өңірде атаулы әлеуметтік көмекке байланысты Елбасы бастамаларына сәйкес арнайы штаб құрылып, әлеуметтік карта жасалынған. «Әлеуметтік карта бойынша облыстағы 86,6 мың көпбалалы отбасының 19 мыңы аз қамтылған қатарына енгізілді. Биылғы 1 сәуірден бастап атаулы әлеуметтік көмекке жүгінген 56,9 мың азаматқа заңдық кеңес беріліп, облыс бойынша қабылданған 32 326 отбасы өтініштері «Е-халық» ақпараттық электрондық жүйеге енгізілді. Ағымдағы жылы, енген өзгерістерге байланысты шартты ақшалай көмек 12 айға, шартсыз ақшалай көмек 6 айға тағайындалатыны көзделді. Бір отбасыға атаулы әлеуметтік көмектің айлық мөлшері орта есеппен 100-150 мың теңгені, жылдық мөлшері 1,8 - 2 млн. теңгені құрайды. Осыған байланысты, қомақты қаржыны тиімді пайдалану үшін және өз ісін ашып, қосымша табыс табу мақсатында облыста аз қамтылған азаматтарды кәсіпкерлікке тарту бойынша жұмыстар жүргізілуде», - деді Ербол Садыр.

Сондай-ақ облыс әкімінің орынбасары өткен жылдың тәжірибесі негізінде атаулы әлеуметтік көмектің біржолғы төлеміне басымдық беріп, аталған қаржы есебінен әзірленген 15 кіші бизнес-жоба іске асырылып жатқанын атап өтті. «Нәтижесінде 2019 жылдың 1 тоқсанында 400-ге жуық отбасы өз ісін ашты. «Атамекен» Ұлттық кәсіпкерлер палатасымен бірлесіп «Еңбек» мемлекеттік бағдарламасына тиісті өзгерістер енгізілгеннен кейін көпбалалы отбасыларға қайтарымсыз 500 мың теңге мемлекеттік гранттар берілетін болады», - деді облыс әкімінің орынбасары. Облыста көпбалалы отбасыларға арналған «Ырыс» микроқаржы ұйымы тарапынан бір пайыздық 2 млн.теңгеге дейін жеңілдетілген шағын несие берілуде. Осы мақсатқа 100 млн.теңге қаржы бөлінген. Бұдан бөлек, биыл республикалық бюджет есебінен 1248 отбасын тұрғын үймен қамтамасыз ету жоспарланып отыр. Ал облыстық бюджеттен халықтың осал топтарына 44 тұрғын үйдің (2309 пәтер) құрылысына 7,3 млрд. теңге бөлінді. Ербол Садырдың мәлімдеуінше, көпбалалы отбасыларды тұрғын үймен қамтамасыз ету жұмыстары демеушілер есебінен де жүргізілуде. Ағымдағы жылы демеушілер тарапынан 18 көпбалалы отбасы тұрғын үймен қамтылып, 34,3 мың көпбалалы отбасыға 285 млн. теңгеге қаржылай және заттай материалдық көмек көрсетілген.

Түркістан облысы