Дайындық қыза түсті

Аймақтар • 21 Мамыр, 2019

Дайындық қыза түсті

Облыстық аумақтық сайлау комиссиясының төрайымы Гүлнәр Аманжолованың айтуынша, өңірде саяси науқанға дайындық белсенді жүргізілуде, әр кандидат үгіт-насихат жұмыстарын жалғастырып, аумақтық сайлау комиссиялары әзірліктерін пысықтауда.

Фарида БЫҚАЙ

Ал өңірде 543 учаскелік сайлау комиссиясы бар. Оның 140-ы облыс орталығында, 65-і Екібастұзда 40-ы Ақсуда орналасқан. Сонымен бірге, 14 аумақтық комиссия жұмыс істейді. Осы 543 учаскелік комиссияның 3467 мүшесі бар. Сонымен қатар аумақтық комиссияларда 98 адам қызмет етеді. Жалпы, штабтар, учаскелік комиссиялар туралы ақпараттар әкімдіктердің сайттарына орналастырылды.

Қазір барлық сайлаушының тізімдері нақтылануда. Шамамен аймақтың 500 мыңнан астам тұрғынының дауыс беру құқығы бар. Учаскелік комиссиялар сайлау күніне 20 күн қалғанда жұмысына кіріседі. Яғни, 20 мамырдан бастайды. Оларға сайлаушылардың тізімі беріледі. Сайлаушылар өздерін тізімнен тексере алады.

– Биылғы жаңашылдық сол, азаматтар қай сайлау учаскесіне тіркелгенін, қай мекенжай бойынша орналасқан учаскеде дауыс беретінін учаскелік комиссияға бармай-ақ та біле алады. Әр қала, аудан әкімдіктерінің ресми сайтына кіріп, тексере алады, – деді Г.Аманжолова.

Ол үшін сайтта «Қоғам» тарауына кіріп, «Сайлау» қосымшасын таңдау қажет. Мұнда сайлауға қатысты барлық ақпарат орналастырылған. «Өзіңді тап» деген бөліміне азаматтар жеке сәйкестендіру нөмірін енгізіп, қай учаскеде дауыс беретінін, тізімде бар-жоғын анықтай алады.

Облыс орталығында сайлаудың уақыты, болатын күні жайында ақпараты бар 52 билборд орналастырылды. 4 Led-экранда да осы ақпарат күні-түні көрсетіліп тұрады.

Егер өз өңірінде болмайтыны алдын ала белгілі болса, онда ол азамат өзінің сайлау учаскесінен сайлау күніне 20 күн қалғанға дейін есептен шығару талонын алуы қажет. Содан кейін сайлау күні тұрақтайтын аймақта дауыс беруге мүмкіндік алады.

Барлық сайлау учаскелері компьютерлермен, мемлекеттік рәміздермен, телефондармен, факстармен жабдықталуда. Дауыс беруге келетін мүмкіндігі шектеулі жандарға да жағдай жасалатын болады.

Павлодар облысы