Қазақстан халқы Ассамблеясы: этносаралық үнқатысудың ұтымды ұйымы
Сейсенбі, 16 сәуір 2013 2:06
Тәуелсіздіктің алғашқы күрделі жылдары мемлекеттің барлық саласында реформалар терең жүріп жатты. Елдің саясат майданындағы түйінді проблемалар және күрделі қоғамдық-әлеуметтік мәселелермен қатар, сыртқы саясатта да келелі мәселелер күн тәртібінен түскен жоқ. Шешімін уақытында қабылдауды талап етті. Қазақстан қоғамы өзінің құндылықтарын қайта бағалау мен ұлттық бірегейлігін іздеудің қиын жолын өткерді. Өмірдің күрделі кезеңдерінде халықтың даналығы мен ұлттың рухы бақылаушы әрі бағдарлаушы қызмет атқарды.
Сейсенбі, 16 сәуір 2013 2:06
Тәуелсіздіктің алғашқы күрделі жылдары мемлекеттің барлық саласында реформалар терең жүріп жатты. Елдің саясат майданындағы түйінді проблемалар және күрделі қоғамдық-әлеуметтік мәселелермен қатар, сыртқы саясатта да келелі мәселелер күн тәртібінен түскен жоқ. Шешімін уақытында қабылдауды талап етті. Қазақстан қоғамы өзінің құндылықтарын қайта бағалау мен ұлттық бірегейлігін іздеудің қиын жолын өткерді. Өмірдің күрделі кезеңдерінде халықтың даналығы мен ұлттың рухы бақылаушы әрі бағдарлаушы қызмет атқарды.
Елбасы Н.Ә.Назарбаев сабырлылық пен шыдамдылыққа басымдық беріп, елдің барлық азаматтарының мүдделерін, тәуелсіз мемлекеттің стратегиясы мен әдістерін негізге ала отырып, еліміздегі, әлемдегі баламасыз ұйым – Қазақстан халқы Ассамблеясын құрды. Мемлекет басшысы осыдан аттай 18 жыл бұрын мақсатын айқындап, даму траекториясын белгілеп, іргесін қалаған Қазақстан халқы Ассамблеясы қазіргі таңда ауызбіршілік пен келісімнің түпнегізі, тұрақтылық пен тыныштықтың мызғымас шаңырағы іспетті. Ассамблея өз дамуында, айшықты жолдан өтті, байыпты, пайымды да парасатты тәжірибе жинақтады. Ол еліміздегі этносаралық және конфессияаралық қатынастарды дамытудың іргелі де зерделі институтына, толеранттылық пен келісімнің берекелі бекетіне айналды.
Қазақстан халқы Ассамблеясының қалыптасу мен даму жолының алғашқы кезеңінде-ақ аталған маңызды да нәзік салаға ғылыми қауымдастық өкілдерінің қатысуына көңіл бөлген Мемлекет басшысы, ҚХА Төрағасы Н.Ә.Назарбаев Қазақстан халқы Ассамблеясының XVII сессиясында ғылыми қауымдастық өкілдеріне, тарихшылар, саясаттанушылар, әлеуметтанушыларға үндей отырып: «Қоғамымызда аталған сала бойынша елімізде ғана емес, сонымен қатар, әлемде болып жатқан үдерістерге нақты сипаттама беру, этносаралық қатынастар қалыптасуының болашағын тану, білу, ұғу, зерделеу қажеттіліктері туындап отыр», – деп атап өткен болатын.
Осыған байланысты, Мемлекет басшысының тапсырмасын тыңғылықты орындау, сондай-ақ еліміздегі этносаралық қатынастар саласы мен мемлекеттік саясатты тиімді жүзеге асыруда ғылыми негізделген бағыттар мен салиқалы саяси шешімдерді айқындауды талап еткен қоғамдық сұранысты қамтамасыз ету және елімізде бейбітшілік пен келісім, тәуелсіздік пен ұлттық бірлік идеясын дамытуда мемлекеттік және азаматтық құрылымдардың күшін бір арнаға тоғыстырып, қуатты институтқа айналып отырған Ассамблея қызметін ғылыми-сарапшылық сүйемелдеу мақсатында 2009 жылы құрамына 25 доктор, 11 ғылым кандидаты, 6 қоғам қайраткері енген Қазақстан халқы Ассамблеясы Ғылыми-сарапшылық кеңесі құрылды.
Облыстар, Астана және Алматы қалалары Қазақстан халқы ассамблеялары жанынан ғылыми-сарапшылық топтары жұмыс істеуде. Олардың жұмысының тиімділігін арттыру мақсатында жоғары оқу орындарының өкілдері, қоғам қайраткерлері, этномәдени бірлестіктердің жетекшілері, этносаралық және конфессияаралық қатынастар мәселесімен айналысатын мемлекеттік қызметшілер арасынан 52 ғылым докторы, 73 ғылым кандидаты, барлығы 183 адам тартылған.
ҚХА Ғылыми-сарапшылық кеңестің міндетіне еліміздегі этносаяси, әлеуметтік-экономикалық және конфессиялық даму үдерістерін кешенді сараптамалық бағалау, аталған үдерістердің елдегі және әлемдегі дамуына болжам жасау, Ассамблея қызметін этносаралық және конфессияаралық қатынастар саласындағы мемлекеттік этносаясаттың өзекті бағыттары бойынша ғылыми сараптамалық сүйемелдеу, этносаралық және конфессияаралық қатынастар саласындағы ғылыми-зерттеу жұмыстарын үйлестіру, Ассамблеяның демократияны дамытуда, қазақстандық қоғамның тұтастығын нығайтуда, жалпыұлттық келісімге қол жеткізуде саяси және азаматтық институт ретіндегі рөлін күшейтуге жәрдемдесу және т.б. кірді.
Кеңестің қызметі ғылыми-зерттеу, талдау және білім беру сынды негізгі үш бағытта жүзеге асуда. Қазіргі таңда, кеңес қоғамдық келісім, тұрақтылық, толеранттылық пен ұлттық бірлік, этносаралық және конфессияаралық қатынастар саласындағы өткір мәселелерді ғылыми алаңдарда ашық талқылап, сараланған, зерделенген шешім қабылдауға мүмкіндік тудырып отыр. Кеңес жұмысына мемлекетіміздің ұлағатты істеріне атсалысып жүрген еліміздегі беделді ғылыми-зерттеу институттары мен отандық және шетелдік тәуелсіз сарапшылар, қоғам қайраткерлері мен этномәдени бірлестіктер өкілдері тартылып, ауқымды жұмыстар атқаруда.
Ғылыми-сарапшылық кеңес құрылған сәттен бастап, оның негізгі қызметінің мән-мағынасы мәдениетаралық үнқатысу мен этносаралық қатынастар қырларының барлық жиынтықтарын жүйелеу мен үлгілеуді теориялық тұрғыдан әзірлеу болды. Бұл, өз кезегінде, нормативтік-құқықтық және қоғамдық-саяси өзгерістер мен толықтырулардың ғылыми мәнін ұғынуды және жүйелеуді қажет етті. Ол үшін Қазақстандағы этносаралық қатынастардың ерекшеліктері, Қазақстан халқын нығайту жөніндегі ұлттық бірліктің бірегей тәжірибесі қосымша тарихи, әлеуметтік-саяси тұрғыдан қайта зерделеніп, қайталанбас үлгінің әдістері, үдерістері және оның даму бағыттары әзірленді.
Осындай тынымсыз да қажырлы еңбектің нәтижесінде Қазақстан халқы Ассамблеясы Ғылыми-сарапшылық кеңесінің тікелей бастамасымен қазақ, орыс және ағылшын тілдерінде «Нұрсұлтан Назарбаев. Бейбітшілік және қоғамдық келісім идеясы» монографиясы жарыққа шығып, оның тұсаукесер рәсімі М.В.Ломоносов атындағы ММУ-де, Ресей мемлекеттік гуманитарлық университетінде, Ыстамбұл университетінің Еуразия институты мен өзге отандық және шетелдік ғылыми қауымдастықтар алаңдарында өткізілді. Бүгінгі уақытта аталған еңбек отандық және шетелдік ғалымдар, дипломаттар, қоғам қайраткерлері мен студенттердің ғылыми еңбектерінің негізгі арқауына айналып отыр.
Қазақстан халқының рухани ахуалын, шығармашылық әлеуетін, оның жаңа мақсаттар мен идеяларға ұмтылысын дамыта отырып, «Бір ел – бір тағдыр», «Тегі басқа – теңдігі бір», «Ұлт рухының дамуы» сияқты жалпыадамзаттық құндылықтарға негізделген ұлттық бірліктің өзекті қағидаттарын азаматтардың санасына орнықтыруды мақсат тұтқан «Қазақстанның Ел бірлігі доктринасы» жарыққа шықты. Аталған еңбек әр азаматтың тағдыры мен Отанының – Қазақстан Республикасының тағдыры ортақ екенін ұғынуға, этностық, болмаса басқа да шыққан тегіне, діни ұстанымына және әлеуметтік жағдайына қарамай тең мүмкіндіктерін сезінуге, жұдырықтай жұмылған қазақстандық ұлт болып дамуына негіз бола білді.
Елімізде тұратын барлық ұлыстардың, жалпы қоғамның санасына сәуле құятын дәйекті мұрағат материалдары мен құжаттарға негізделген, Қазақстанда тұратын әртүрлі ұлт пен ұлыстың өкілдері туралы сыр шертетін «Қазақстан халқы Ассамблеясы: тарихи очерк» атты ғылыми еңбек жарық көрді. Сондай-ақ, өткен ғасырдың бірінші жартысында елімізге мәжбүрлеп қоныс аударылған және қуғын-сүргінге ұшыраған азаматтар туралы, олардың кеңпейілді, дархан мінезді қазақ халқы жөніндегі пікірлерінен тұратын «Қазақстан бізді біріктірді» атты ғылыми-ағартушылық еңбегі қоғамдық жағымды пікір тудырып, көпшілік іздеп оқитын кітапқа айналды.
Қазіргі таңда, этносаралық саладағы үдерістерді тиімді түсінуге бірегей көзқарас қалыптастыру мақсатында мемлекеттік органдарға арналған талдау материалдары мен әдістемелік ұсынымдардан түзілген этносаясаттың императивтері мен олардың қазақстандық ерекшеліктері негізделген «Мемлекеттік этносаясаттың императивтері» атты ауқымды еңбек жарық көрді.
Қазақ халқының ХХ ғасырдың басындағы ұлт-азаттық қозғалысы жетекшілерінің бірі, мемлекет қайраткері, ақын, публицист, қазақ тіл білімі мен әдебиеттану ғылымдарының негізін салушы ғалым, ұлттық жазудың реформаторы, ағартушы Ахмет Байтұрсынұлы мен оның жұбайы Бәдрисафаның (Александра Ивановна) тағдыры туралы нақты оқиғаларға негізделіп, сол дәуірдің дауылды жылдары мен өмір шындығынан алыс кетпеген «Ақ келіннің махаббаты мен ажалы» атты театрлық қойылымы Қостанай облыстық орыс драма театрында алғаш рет қойылды. Орыс драма театры қойған бұл қойылым алдына жалпы қоғамның санасына сәуле құйып, тарихты зерттеу, өткеннен тағылым алу, ұлт болып жұмыла түсуге серпіліс жасау мақсатын қойды.
Сонымен қатар, Ассамблеяның тікелей қолдауымен «Тарихтан тағылым – өткенге тағзым», «Қазақ диаспорасы арасында Алаш Орда философиясының қазіргі заманғы түсіндірмесі: жағдайы, баға беру, сабақтары (әлеуметтік-тарихи талдау)» сынды бірқатар маңызды халықаралық жобалар, әлеуметтік зерттеулер ұйымдастырылып, олардың негізінде (қазақ, орыс және ағылшын тілдерінде) ғылыми-ағартушылық фильм түсіріліп, Тәуелсіздіктің 20 жылдығына орай «Сөнбесін от алауы» атты монография жарық көрді.
Аталған ғылыми еңбектер мен жобалардың негізгі мәні, мазмұны Н.Ә.Назарбаевтың Этносаралық толеранттылық пен қоғамдық келісімнің қазақстандық үлгісінің теориялық және құрылымдық негізін қалап, бірегей үлгінің нақты жүйеленген нұсқасы мен электронды тұсаукесерін жарыққа шығаруға мүмкіндік берді. Н.Ә.Назарбаевтың Этносаралық толеранттылық пен қоғамдық келісімінің қазақстандық үлгісінің тұсаукесері әлемнің 11 мемлекетінде, оның ішінде ЕҚЫҰ-да (Вена), БҰҰ-да (БҰҰ-ның Нью-Йорктегі және Женевадағы штаб-пәтерлерінде) өткізіліп, отандық және шетелдік сарапшы мамандар тарапынан жоғары бағаға ие болды.
Этносаралық толеранттылық пен қоғамдық келісімнің қазақстандық үлгісінің әдістемесі әлемнің бірнеше тіліне аударылып, ЕҚЫҰ-ның барлық тілдерінде жарық көрді. Бүгінгі таңда, М.В.Ломоносов атындағы ММУ және РМГУ-де (Мәскеу) «Этносаралық толеранттылықтың қазақстандық үлгісі» тақырыбында қазақ және орыс тілдерінде 36 сағаттық арнайы курс енгізіліп, оқытылған. Аталған курсты елімізге белгілі этносаралық және конфессияаралық қатынастар, толеранттылық, қоғамдық келісімді сақтау саласындағы ғалымдар, жетекші сарапшы мамандар жүргізген.
Қазақстан халқы Ассамблеясы Ғылыми-сарапшылық кеңесінің үйлестіруі нәтижесінде 2009 жылдан бері Қазақстан Республикасының Ұлттық академиялық кітапханасында толеранттылық, қоғамдық келісім, тұрақтылық, этносаралық және конфессияаралық қатынастар саласындағы баспа және электронды нұсқадағы 1000-нан аса ғылыми ақпараттарды құрайтын Ассамблея депозитарийі жұмыс істеуде. Қазақстан халқы Ассамблеясы депозитарийінің ғаламтордағы порталын 2012 жылы әлемнің (Ресей, Қытай, Германия, Түркия, АҚШ, Австралия және басқа) 73 мемлекетінен 135 161 адам тұрақты қолданған.
Қазақстан Республикасы – азаматтық бірлікке негізделген, этностық, өңірлік, аумақтық бірегейліктен азаматтық бірегейлікке басымдық берген ұлттық мемлекет. Қазақстан Республикасының Конституциясы «Біз, Қазақстан халқы…» формуласы негізінде барлық азаматтардың бірлігін бекітеді. Халықаралық аренадағы елдің берік тұғыры, сенімді экономикалық негізі, тиімді саяси құрылымы және ұлттың ынтымақтасу идеясы – Қазақстан халқының бірлігі мен әл-ауқатының іргетасы. Ал тәуелсіздік идеясы қазақстандық қоғамның барлық әлеуметтік топтарының бір бағытта қозғалуына мүмкіндік беретін орасан зор біріктіруші функцияға ие.
Мәлік ШЕГЕБАЙ,
Қазақстан Республикасы Президентінің жанындағы Мемлекеттік басқару академиясының Этносаралық және конфессияаралық қатынастарды зерттеу орталығының ғылыми қызметкері.