Қазақстан Президенті «Болашақ» зауытының өндірістік нысандарын тікұшақпен аралап көрді.
Мемлекет басшысына мұнай-газ саласының ахуалы мен оны дамыту перспективалары жөнінде баяндалды. Сонымен қатар Қасым-Жомарт Кемелұлына мұнай өңдеудің және тұрақтандырудың, сұйытылған газды мұнайдан ажыратып алу мен тазалаудың, табиғи күкіртті өндірудің және оны сақтау мен тасымалдаудың технологиялық үдерістері таныстырылды.
Қасым-Жомарт Тоқаев өндіріс орнының Атырау қаласынан алыс емесін атап өтіп, қоршаған ортаны қорғауға ерекше көңіл бөлуге шақырды. Сонымен қатар Мемлекет басшысы Қазақстан азаматтарының еңбек құқығын сақтаудың маңыздылығына тоқталды.
Қазақстан Президенті кәсіпорын ұжымын тәулігіне 370 мың баррель мұнай өңдеп, рекорд жаңартуымен құттықтады және мұнайшыларға табыс, бақ-береке тіледі.
Қазақстан Президенті Қасым-Жомарт Тоқаев одан кейін АРЕС PetroTechnic жоғары колледжіне барды. Мемлекет басшысы колледждің оқу корпусын, лабораторияларын, шеберханаларын, кітапханасы мен жатақханасын аралап көрді.
Қазақстан Президентіне халықаралық стандарттар мен әлемдік озық тәжірибені, сондай-ақ шетелдік және отандық мұнай-газ компанияларының талаптарын ескере отырып әзірленген инновациялық білім бағдарламаларын пайдалану APEC PetroTechnic колледжінің басты ерекшелігі екені баяндалды.
Тәжірибеге негізделген оқыту барысында шынайы өндірістік үдерістер жасалады. Соның арқасында түлектер колледж бітірген соң, бірден өндірістегі күрделі міндеттерді табысты атқара алады.
Студенттермен және оқытушылар ұжымымен әңгімелесу барысында Қасым-Жомарт Тоқаев ірі халықаралық мұнай-газ компаниялары үшін мамандарды шетелдерде емес, Қазақстанда даярлаудың маңыздылығын айтты. Оның пікірінше, бұл үшін колледжде барлық жағдай жасалған.
Президент Қасым-Жомарт Тоқаевтың өңірге жұмыс сапары бүгін жалғасады.
Атырау облысы
