Қасіретті тарихқа қатысты еске алу, тағзым ету шарасын Қазақстан халқы Ассамблеясы ұмыт қалдырған емес. Олар «Тарихтан тағылым – өткенге тағзым» халықаралық жобасының іс-шараларын алғаш рет 2010 жылы Астана қаласында ұйымдастырып, «АЛЖИР» мұражай-мемориалдық кешенінде «Тарихтан – бүгінгі күнге» атты ТМД елдері тарихшыларының бірінші форумы өтті. Оған 300-ден астам академиялық тарих ғылымдарының отандық және шетелдік ғалымдары қатысты. Форум нәтижесі бойынша тарихи мұраны зерттеудің бірыңғай жолдарын әзірлеу бойынша Астана Хартиясы қабылданды.
Биыл Маңғыстау облысы Қазақстан халқы Ассамблеясы «Тарихтан тағылым – өткенге тағзым» атты жыл сайынғы халықаралық жобаның шеңберінде Қарақия аудан орталығында Саяси қуғын-сүргін құрбандарын еске алу күніне арналған «Тарих қасіреті» акциясын өткізді.
Ұлттық бірлік пен қоғамдық келісімді нығайтуға және жалпы құндылықтарды қалыптастыруға ықпал етуге, тарихта із қалдырған қасіретті оқиғаны келешек ұрпаққа тарихи дерек ретінде жеткізіп, оларды өткенді қастерлеуге, ұлт тарихына және тәуелсіздікке, татулық пен бейбітшілікке құрметпен қарауға тәрбиелеу ісінде азаматтық қоғам мен мемлекетті біріктіру мақсатындағы акцияны Маңғыстау облысы Қазақстан халқы Ассамблеясы Қарақия ауданы әкімдігі қолдауымен ұйымдастырды. Іс-шараға қатысқан Қазақстан халқы Ассамблеясы мен өңірлік ассамблеяның мүшелері, мемлекеттік органдардың, шығармашыл зиялы қауым, этномәдени бірлестіктердің, жастар ұйымдарының өкілдері, саяси қуғын-сүргін және депортацияға ұшыраған халықтар өкілдерінің ұрпақтары, музей және мұрағат қызметкерлері, БАҚ өкілдері үшін аудан орталығында орналасқан мұнай мұражайына экскурсия ұйымдастырылды. Одан соң «Қасірет» мемориалының алдында саяси қуғын-сүргін құрбандарын еске алу митингісі өтті. Митинг Саяси қуғын-сүргін құрбандарын еске алу күніне арналған концертпен аяқталды.
Ассамблея өкілдері ұйымдастырған Саяси қуғын-сүргін құрбандарын еске алу шарасы Ақтау қаласында да жалғасын тапты. Маңғыстау облысы Қазақстан халқы Ассамблеясы мен «Чосон» корей этномәдени бірлестігі ұйытқы болды. Этномәдени бірлестік өкілдері мен Маңғыстау облысы ҚХА мүшелері және еліміздің әр қаласынан жиналған «Қазақстан корейлер қауымдастығы» мүшелері есімі ел есінде сақталған қайраткерлердің бірі, қарапайым жұмысшыдан мемлекет қайраткері дәрежесіне дейін көтерілген тұлға Жалау Мыңбаев ескерткішіне гүл шоқтарын қойды. Сондай-ақ Достық үйінде «Ұлы дала мұрасы» және «Корей нақыштары» атты көрме өтті. Көрмеге «МартАрт» және тағы да басқа өнер студияларының көрнекті картиналары қойылды. «Чосон» этномәдени бірлестігінің төрайымы Раиса Маденова көрмедегі өнер туындыларының мәні мен мағынасын таныстырды. Көрме барысында қонақтарға қазақтың ұлттық тағамдары бауырсақ пен шұбат ұсынылды.
«Қазақтану» жобасы аясында қазақтың салт-дәстүрінің бірі «Тұсаукесер» ұйымдастырылып, шараның құрметті қонағы – «Қазақстан корейлері қауымдастығының» төрағасы Огай Сергей бір жасқа толған қазақ баласының тұсауын кесіп, тәй-тәй басқан балдырғанға ақ тілегін арнады.
Корейлер қиын жылдары бауырына басқан қазақ халқына деген ризашылығын білдіріп, қазақтың салт-дәстүріне құрметпен қарайтындығын жеткізді.
Маңғыстау облысы
