Ал екінші үшемнің анасы Сайера Туклиева – 29 жаста. Бірлік ауылында тұратын келіншек 27 мамыр күні босанған. Кесарь тілігі арқылы екі қыз бен бір ұлды өмірге әкелген жас ананың үйінде тағы үш перзенті бар. Нәрестелері де айы-күніне толып, өз үйлеріне жіберілді. «Үшемдерге жүкті екенімді бесінші аптада білдім. Үй-ішімізбен қуандық. Бастапқы жүктілік кезінде біраз қиналған кездерім болды. Бірақ ерекше күтім жасап, дәрігерлердің айтқанын орындадым. Перзенттерімді аман-есен босандым. Дәрігерлерге алғыс айтқым келеді, бізге жақсы ем-дом жасап, жақсы қарады. Есімдерін Фатима, Исмайл, Зухра деп қойдық. Осылайша өмірге үш перзент әкеліп, батыр ана атандым. Алла тағалама осындай перзенттер бергені үшін ризамын», дейді Сайера Туклиева.
Үйлеріне шығарыларда қос ана мен нәрестелерге облыстық әкімдіктің атынан сый-сыяпаттар жасалды. Әр нәрестеге арба мен кереует, киім-кешек, ойыншық табыс етілді. Облыстық денсаулық сақтау басқармасының басшысы Мұқан Егізбаевтың айтуынша, сәбилер алдағы уақытта да ерекше күтімге алынады. «Қазіргі таңда нәрестелердің жағдайы жақсы. Медициналық күтім жасап, үйлеріне жақсы жағдайда шығарып жатырмыз. Бұдан былай әр отбасына медбике бөлінетін болады. Үшемдердің жағдайын қарап, бақылауда ұстап отыратын боламыз», деді Мұқан Егізбаев.
Жыл басынан бері өңірде үш үшем дүниеге келген. Екі ана Түркістан қаласында, тағы бір ана Шымкент қаласындағы облыстық перинаталдық орталықта босанған.
Түркістан облысы
