Түркістанда инсульт орталығы ашылды

Медицина • 15 Маусым, 2019

Түркістанда инсульт орталығы ашылды

329 рет көрсетілді

Түркістан қалалық орталық ауруханасында «Инсульт орталығы» мен «Триаж» жүйесімен жабдықталған жаңа қабылдау бөлімі ашылды.

Ғалымжан ЕЛШІБАЙ

Ауруханаға жатып емделуге немесе тексерілуге келген науқастар өз кезегін біліп отырады. Ақпараттық киоск – науқастардың туыстары жоспарлы және жедел түрде өздері немесе жедел жәрдем бригадасымен келген науқастардың қай бөлімшеде қашан жатқанын білуге мүмкіндік жасалған. «Триаж» жүйесі бойынша медициналық іріктеу үздіксіз және сабақтастықпен жүргізіледі. Бір пациенттің жағдайын бағалау процесі 60 секундтан аспайды. Бағалау аяқталғаннан кейін пациенттер арнайы түрлі-түсті лента түріндегі іріктеу санатының бір түсімен белгіленеді. Жедел жәрдем бригадасы алып келе жатқан науқас туралы толық ақпарат аурухананың қабылдау бөлімінде көрініп тұрады. Аурухананың қабылдау бөліміндегі «SOS» бағдарламасы батырмасын басу арқылы дәрігерлерді және зертхана маманын шұғыл көмекке шақыруға мүмкіндік береді. Медицина саласының қызметкерлері кешенді медициналық ақпараттық жүйесімен жұмыс істейді. Қазірдің өзінде науқастардың барлық құжаттары электрондық түрде жүргізілуде.

Аурухананың жұмысымен танысуға келген Түркістан облысы әкімінің орынбасары Жолдымұрат Аманбаев пен облыстық денсаулық сақтау басқармасының басшысы Мұқан Егізбаев жоғары сапалы CANON технологиясы негізінде әзірленген «Aquilion Prime SP-160» компьютерлік томографы туралы кеңірек ақпарат алды. Жабдықтықтың ерекшеліктері - Aquilion Prime SP компьютерлік рентгендік сканер 78 см кеңейтілген апертураға ие. Экспозициялық бақылау және итеративті реконструкция сәулеленудің дұрыс деңгейімен жақсы сападағы айқын кескіндерді алуға мүмкіндік береді. Түркістан өңірінің тұрғындарына енді облыс орталығында заманауи жабдықтың көмегімен сапалы қызмет көрсетілетін болады.

Түркістан облысы