Қаланың қақ ортасына, яғни Алтынсарин және әл-Фараби көшелерінің қиылысына "Жолда қабылдау" акциясының шатыры тігілді. Онда Қостанай облысы ПД бастығының бірінші орынбасары, полиция полковнигі Нығымет Ысмағұлов және Қостанай қаласы Полиция басқармасының бастығы, полиция полковнигі Құрмет Мәжікенов бастаған тәртіп сақшылары азаматтарға қызмет көрсетті. Тұрғындар түрлі сұрақпен келген, олардың мәселесі осы жерде талқыланып, әрі қарай заң жүзінде әрекет етуге жіберілді. Көлік тізігндеген азаматтар айыппұлдарын тексертіп, сол мезетте төлеп жатты.
Тәртіп сақшылар көмегіне жүгінгендердің бірі - Владимир Сон. Ол соңғы 17 жыл Қостанай қаласында тұрады, бірақ құжаттарының дұрыс болмауына байланысты ҚР азаматтығын ала алмай жүр. Қостанай полицейлерінің араласуымен енді ол алдағы аптада ҚР азаматтығын алатын болды.
Қостанай қаласының 21 жастағы тұрғыны Игорь Гаврилов әскери борышын өтеп, мамандандырылған орта білім алған. Енді ол полицияға жұмысқа орналасқысы келеді. "Жолда қабылдау" акциясына осындай сұрақпен келген Игорьға бағыт-бағдар берілді. Қостанай қаласы Полиция бақсармасының кадр жұмысы бөлімі алдағы уақытта бос орындар болса, оған хабарласуға уәде етті. Ол үшін Гаврилов мемлекеттік емтихан тапсыруы қажет.
"Жолда қабылдау" акциясы облыс бойынша ұйымдастырылуда. Осы жолы тек жол бойында ғана емес, көп қабатты тұрғын үй аулаларында да азаматтарды қабылдау жүрді.
Кенже ҚОНЫСБАЙ,
Қостанай облысы ПД баспасөз қызметі
