Елімізде қазір туризмді дамыту жұмыстары қолға алынуда, бұл бағытта негізінен біткен істен бітірер іс көп деуге болады. Туризмді түлету барысында әлі талай тың идеялар туындап, небір қызықты жобалардың тұсауын кесуі ғажап емес және бұл алыс-жақын болашақтың еншісіндегі олжаларымыз дей тұрайық, тіпті ол бүгінгі жас буынның қолымен атқарылуы да әбден мүмкін.
Даласы сұлу көріністерге толған, тылсым сырлары тұнған Маңғыстау – Қазақстанның туристік аймағы саналатын үздік ондыққа енеді, яғни туристік әлеуеті жоғары аймақ қатарында.
Алайда тоғыз жолдың торабына айналған, төрт тараптың кең дәлізі Маңғыстауда аталмыш сала тынысын кеңінен алып, құлашын кеңге жайып кете алған жоқ. Әл жетпей ме, әлеует жетпей ме, әлде қаражаттан қысылу бар ма, жоқ білік олқы соғып келе ме? Әйтеуір, барды ұқсатуда дүрк көтіріліп кете алмай тұрғанымыз ақиқат.
Ақтаудағы өңірлік кәсіпкерлер палатасында өткен басқосуда көптің көкейіндегі осы мәселе тілге тиек болды. Расында, ғажап жерлерге туризмді дамытуға не кедергі? Саяхатшыларды өлкеге көптеп тарту үшін қандай жобалар жүзеге асуы керек?
– Ақтау қаласы мен Құрық паром кешені аралығын қамтитын аумақтағы туризмді дамытуға республикалық бюджеттен 18 млрд теңге бөлінді. Сонымен қатар жағажай демалысын дамыту басты назарда. Оған осындағы инфрақұрылым жасақталып, Ақтау мен «Алау» лагері жолдары жөнделетін болады, – дейді «Kazakh Turism» ұлттық компаниясының басқарма төрағасы Ө.Бисақаев.
Жағажай туризмін дамыту және балалар демалысын, яғни балалар туризмін дамыту – өңірде жиі айтылып келе жатқан жағдай. Қазіргі таңда туризмді дамытуға қатысты жасалып жатқан жұмыстардың көбі осы бағыттарға саяды.
«Атамекен» ҰКП Басқарма төрағасының орынбасары О.Ордабаевтың айтуынша, Маңғыстау туризмін дамыту үшін алдымен туристерді күтіп алу талаптарын жетілдіру керек. Әуежай мен темір жол вокзалының дайындығы қандай? Сондай-ақ автокөлік жолдары бойында туристерге сервистік қызмет көрсету қай деңгейде? «Саяхатшыларды қарапайым шайханамен емес, қызықты, тың жобалармен тартуды ойластыру керек. «Жобалау офисі» жобасы осы жайттарды жүзеге асыруға мүмкіндік береді» дейді ол. Шындығында, алыс жолдар бойындағы сервистік қызмет көрсететін орындардың саны да, сапасы да сын көтеретіндей емес. Тың жобалар былай тұрсын, айтсаң ұят, айтпасаң болмайтын ең қарапайым нәрсе – әжетханалардың ахуалы-ақ адам шошырлық халде. Бұл «әркім баратын жер» – негізі барлық нысанда, барлық орында, тіпті жол бойларында да жаңғырып, тазалық пен мәдениеттің нақты көрінісі бола алса ғой!
Дөңгелек үстелде туристік айтақтарға халықты тарту үшін ішкі әуе қатынастарын оңтайландыру ұсынылды. Мектеп демалысы маусымында балалар билеттерін субсидиялау, бір ересек адамға екі баланы тегін алып жүру жағдайын қарастыру турасында пікір айтылды. Сонда отбасы бюджеті 30 пайызға үнемделіп, халық шетелге емес, отандық туристік жерлерге ынта білдіреді екен. Тур-полиция қызметін құру, авто керуен, медициналық туризм, балалар туризмі, өзге де жұмыстарды дамыту уақыт еншісінде және мұның бәрі Қазақстанды туристік тартымдылығы бар 50 елдің қатарына қосу міндетін жүзеге асыруға көмектеспек.
– Иран мен Түрікменстан сияқты көршілес елдерге рейс аша алмай отырмыз. Ниет білдірген компанияларға рұқсат берілмеді. Көрші Әзербайжанда бұл мәселе жоқ. Ирандық туристер Бакуде визасыз жүр. Бакуге туристер толассыз келеді. Қосымша рейстер ұйымдастырып жатамыз. Бізге неге сондай жағдай жасамасқа? Сондай-ақ туристерді тіркеу әуежай ғимаратында болуы керек, олар көп уақытын құжаттармен әуре-сарсаңға жұмсамауы тиіс. Ішкі рейстерді субсидиялау жеделдетіп қолға алынса екен. Жаз мезгілінде Атыраудан күніне 4 рейс жасалады. Осындай сұраныс еліміздің барлық аймағынан, жақын шетелдерден де түсеріне сенім мол, – дейді Ақтау халықаралық әуежайының директоры Е.Жолдасов.
Басқосудың ортақ айтары Үкіметке жолданбақ. Мүмкін, өңірде келешекті күтпей, қазір-ақ шешілу жолары табылып тұрған туризмді дамытуға қатысты ірілі-ұсақты мәселелердің бірқатары шешімін тауып қалар деген ойдамыз.
Маңғыстау облысы
